Read Sidama_Qullaawa _Maxaafa HIZIQEELI 8 Bible Online

HIZIQEELI 8 - Sidama_Qullaawa _Maxaafa bible

HIZIQEELI 8

¹Qafadammummohunni leelki diro, leelki aganira ontikki barra, Yihudunni qafadamino manni albisooti ane ledo mine'ya heedheenna, Mootichu Kaaliiqi wolqa hedeweelcho anewa daggu.

²Ale hige laeemmo woyite, dana giirate buwani gede xawannoha manna lawannoricho afummo. Hakku manna lawannorichino halli woro giira, halli ale fiinoonni camo lawannoho.

³Isino mannu anga labbannotenni umi'ya danancho amade gotti assie. Tenne ajuujanni Maganu Ayyaani baattotenni iima qole kayise, Yerusaalame iillishie. Aliyye ragaanni Kaaliiqa hanqissannoti kaphu maganna noowa Qullaawu Maganu Minira haa're massie.

⁴Hakkiicho hee're afummohu Israeelete Magani ayirrinyi, albaanni Kebaari Wayi mule hee're afummohu gedeeho.

⁵Maganuno, «Koo manchi beetto, aliyye widira higge lai» yiie. Laummo woyite, huxxu waalchira albaanni noo dargi kakkalonnihu mule Magano hanqisinoha kaphu magano afoommo.

⁶Maganuno, «Koo manchi beetto, ikkanni noo coye baala laitto? Israeelete manni konne assanni nooha tiyyi'nanni coye lai. Togo assansanni Qullaawu Dargi'yanni fafeemmo gede assitinoe. Kawiinni roorinoha lowo geeshsha saalsiisanno coye xaanni la"atto» yiie.

⁷Gobbaanni noo nafara e'nanni waalchiwa haa're massie. Kinchu huxxi giddo noota mitte xullo leellishe,

⁸«Koo manchi beetto, kawaanni qolte kinchu huxxa kurkuri» yiie. Kurkure, albaanni noo waalcho iillummo.

⁹Isino, «Giddora e'e, hakkiicho assitannoha bushanna tiyyi'nanni coye lai» yiie.

¹⁰Giddora e"e laeemmo woyite, xarrate aana hamasu, giwissannotinna intannikki saada misilla, hattono Israeele magansidhannoti kaphu maganna rarra'e no.

¹¹Saafaani beetti Azaaniya ledo hee'ranna, 70 Israeelete geerri hakkiicho no. Mittu mittunku hixaana giirranni baccicho anga amade no; hixaanuno wiliilanni no.

¹²Maganuno, «Koo manchi beetto, Israeelete geerri maaxante assitannore afitto? Misilla wo'mitino holge e'e kumbuultanno. Qolteno, ‹Kaaliiqi diafannonke; gobbankeno horonta facci asse agurino› yitanno» yiie.

¹³Galagale Kaaliiqi, «Kawiinni nafa roorinoha tiyyi'nanni coye assitanna la"atto» yiie.

¹⁴Kunnira, aliyye ragaanni noohuwa Qullaawu Mini huxxi waalchiwa haa're masse, Temuuzi yinannihu maganinsa reenna meentu wi'lanna leellishie.

¹⁵Isino, «Koo manchi beetto, tenne dhagge la"atto? Xaano kawiinni sainoha tiyyi'nanni coye afatto» yiie.

¹⁶Hakkunni gedensaanni, giddoonni noohuwa Qullaawu Mini nafarira haa're massie. Hakkiicho Qullaawu Minira e'nanniwa kakkalote darginna sa'nanni doogo mereero, 25 manni geeshshi no. Insano badhe Qullaawu Kaaliiqi Minira wodhite, fultanni noo arrishsho magansidhanni soojjaatira higge guluphite kumbuultanni no.

¹⁷Kaaliiqino, «Koo manchi beetto, tenne dhagge la"atto? Kuni Yihudu manni, konne la"attoha tiyyi'nanni coye baala assatenninna gobbate aana barshe halashsha callatenni deeffatannoha di"ikkino. Roorenka kawa Qullaawu Minira nafa suwe daye, konne baala assatenni ane layinkimeeshsho hanqisaera hasi'ranno; dandaaminsa garinni ane aarsate xontannoe gara lai.

¹⁸Addinta insa aana hanqo'ya dirriseemmo; horonta dimarareemmonsa. Digatiseemmonsa; raarte huuccidheenna nafa horonta dimacciishsheemmonsa» yiie.