Read Sidama_Qullaawa _Maxaafa DAANIEELI 1 Bible Online

DAANIEELI 1 - Sidama_Qullaawa _Maxaafa bible

DAANIEELI 1

¹Iyoaaqeemi Yihudaho moohihunni sayikki diro, moote Nabukadanatsoori Yerusaalamete bala tuge gaangeesse amadi.

²Mootichu wore agurino daafira Nabukadanatsoori Yihudu moote Iyoaaqeemi qafadi. Maganu Miniha qullaawa uduunne gudhi; mito mito usuranyoota Baabiloonira kaphu maganna minira haa're ha'ri; haa're ha'rinoha qullaawa uduunne baalano kaphu maganna uduunni mine wori.

³Hakkunni gedensaanni moote Nabukadanatsoori Ashifenaazi yinanniha gashshaanote roorricha qafadante noo Israeele giddonni mootoollate ayiddenna ayirraddu manni ooso ikkitino wedella dooranno gede hajajisi.

⁴Doorantanno wedellino mootete gashshooti mine soqqamate guuta manna ikkitanno gede dana xumuulle, egenno baala wodanchanna wo'manka coye rakke buuxa dandiitannore, uurrinsha subbinore ikka hasiissannonsata qaagiissino. Qoleno Baabiloonootu afoonna borreessate gara rosiisannonsa gede hajajisi.

⁵Hattono sagalensanna aggannoti woyinete xajje moote itannohunna agannohu aaninni haa'ne uyinanninsa gede hajaji. Kunni garinni 3 diri geeshsha qajeeltuhu gedensaanni mootete albira shiqqe loosonsa hanaffanno gede hajajinsa.

⁶Doorantinori giddonni Yihudu ga're ikkitinori Daanieeli, Hanaaniya, Mishaeelinna Azaariyaati.

⁷Gashshaanote roorrichi su'mansa soorre Daanieeli Bilxaasoori, Hanaaniya Sidiraaqi, Mishaeeli Misaaqi, Azaariya Abidinaago yee fushshi.

⁸Daanieeli mootete sagale itatenninna woyinete xajje agatenni battaawannokki gede agadhi. Tenne hedora sumuu yaannosi gede Ashifenaazino huucci'ri.

⁹Maganuno Daanieeli kaa'lanno gede roorrichu wodana shaqqishi.

¹⁰Ikkollana Ashifenaazi moote waajjino daafira Daanieeli, «Sagale'nenna agginannire hajajinohu mootete; ki'ne wolu wedelliwiinni baxxitine jaabbine leeltiniro moote shaannoe yee waajjeemmo» yiisi.

¹¹Hakkunni gedensaanni Daanieeli, isonna miillasi agarara worroonnihuwa Ashifenaaziwa mare,

¹²«Xoxxuu gedeere intanninna waa anganni keeshshineemmo gede assite ninke soqqamaanokki 10 barri geeshsha fonqolte lainke.

¹³Mootete sagale itanno wedellanna ninke taashshite laittohu gedensaanni, ninke aana hasi'rittore assa dandaatto» yiisi.

¹⁴Agaraanchuno yitino coye sumuu yee 10 barri geeshsha fonqole lainsa.

¹⁵Tonnikki barri wo'mihu gedensaanni mootete sagale itanno wedelli baalunkunni roore insa alba biiffe, maqayeno misse leeltu.

¹⁶Hattenne yannanni kayise agaraanchu mootete mininni sonkanninsa sagalenna woyinete xajje hoole insara shaanu gedeere uyinsa.

¹⁷Maganuno kuri shoolunku wedellira egennonna hayyo uyinsa. Qoleno borrote egenno wodancha uyinsa. Daanieelira kayinni hakkiinni sayise ajuujanna haaqee tirate egenno uyisi.

¹⁸Moote hirqinohu 3 diri goofihu gedensaanni, Ashifenaazi wedella baalanka haa're Nabukadanatsooriwa shiqishi.

¹⁹Moote baalanka hasaawisi yannara Daanieeli, Hanaaniya, Mishaeelinna Azaariyaasi ledo taalinohu wolu mittuno dino. Kunni daafira moote muli amaalaasine asse doodhinsa.

²⁰Egennotenna wodanchate daafira moote shiqishino xa'moranna haaqee baalate rahe dawaro qolate, gashshooti baalu giddo noo kiilaanonna bitaamma insa tonne anga roortino.

²¹Kunni garinni Daanieeli Faarisi moote Qiroosi Baabilooni horri yanna geeshsha mootete mini giddo amaalaancho ikke keeshshino.