Read Sidama_Qullaawa _Maxaafa DAANIEELI 10 Bible Online

DAANIEELI 10 - Sidama_Qullaawa _Maxaafa bible

DAANIEELI 10

¹Faarisi moote Qiroosi moohihunni sayikki diro, Bilxaasoori yinannihu Daanieeli wole ajuuja afi. Kulloonnisi coyi halaalehona, kayinnilla giddo olu duduwo amadino; tirono ajuujatenni afino.

²Hatte yannara ani Daanieeli 3 lamala wo'ma dadillanni keeshshoommo.

³Mitteno dancha sagale, maala woy woyinete xajje suumete dimassi'roommo; sasenti lamala sa'a geeshsha albi'yara mittoreno dibuudhoommo.

⁴Dirunnihu umi agani eihunni lemiina shoolki barra, lowiidihu Xegiroosi Wayi gama uurre noommo.

⁵Haxo gotti yee laeemmo woyite, waajjo shaalado uddano uddi're halloho dancha culku qabatto qodhinoha mitto mancho afummo.

⁶Kunni manchi bisi dilqu kinchi gede xawanno; albisino banqote gede bilicci yaanno; illuwasino giirate buwano labbanno; anguwasinna lekkuwasi fiinoonni camo gede xabbanno; qoonqosi lowo mannite gede shooshshitanno.

⁷Ajuuja laoommohu ane callaati; ledo'ya noo manni mittoreno diafino. Lowo geeshsha waajjino daafira xooqe bai.

⁸Ani tenne dhaggete ajuuja la"anni calli'ya gatoommo. Wolqa baala ba'eennae daafure waa ikkoommo; albi'ya bande anfannikki gede ikke soorramino.

⁹Manchu huuro macciishshummo yannara, mase anenee hawe baattote aana gombisame uwoommo.

¹⁰Hakkunni gedensaanni angasinni amade kayise, huxi'ranni hee'renni anga'yanni irkisi're gulupheemmo gede assinoe.

¹¹Sokkaasinchuno, «Maganu lowo geeshsha baxannohehu Daanieeli! Kuneeti ani atewa soqqame dayommona, noottowa sammi yite uurri. Kuleemmohereno seekkite wodanchi» yiie. Togo yiie yannara huxi'ranni uurroommo.

¹²Ledeno, «Daanieeli! Waajjitooti. Wodancha afi'ratto gede umokki Maganikki albaanni shollishate murci'ritto barrinni kayisse huuccattokki macciishshantino. Ani soqqame atewa dayommohuno huuccattokkira dawaro higginohuraati.

¹³Faarisi gashshoote agaranno sokkaasinchi 21 barra wo'ma ittisinoe. Ani Faarisi callate noommota afe, sokkaasinete albisi Mikaaeeli kaa'laera dayino.

¹⁴Ani dayommohuno albillitte mannikki aana daanno coye kulammoheraati. Tini ajuujano albillitte ikkanno coye xawissannote» yiie.

¹⁵Konne coye kulie yannarano coyi'reemmore hooge uulla hige dugunuunoommo.

¹⁶Hakkunni gedensaanni mancho lawannohu hakku sokkaasinchi angasi diriirse suumma'ya kisi. Anino, «Mooticha'ya! Tini ajuuja lowo geeshsha masissinoehura mannimma'ya daaqqino.

¹⁷Mootichisi albaanni uurrino borojjichi gede ikkoommohu ani, ate ledo hasaawa hiitto ikke dandeemmo? Lowo geeshsha masoommo daafira foola nafa hoogoommo» yoommo.

¹⁸Hakku mancho lawanno sokkaasinchi lede kisieta jawaante afi'roommo.

¹⁹Isino, «Ate Maganu baxannohena, waajjitooti! Jawaati! Kaajji!» yiinoe. Isi coyi'ri yannara jawaante lexxe, «Mooticha'ya, jawaante oottoena yaattore ledde kulie» yoommosi.

²⁰Isino lede, «Atewa mayira dayommoro afootto? Ani atewa dayommohu halaalu maxaafira borreessinoonnire kulammoheraati. Qoleno rahe ha're Faarisi gashshoote agaranno sokkaasinchi ledo gaarameemmo. Ani ha'rummohu gedensaanni Giriikete gashshoote agaranno sokkaasinchi daanno. Ikkollana Israeele agaranno sokkaasincho Mikaaeeli agurranna ane kaa'lannohu wolu dino.