Read Sidama_Qullaawa _Maxaafa DAANIEELI 11 Bible Online

DAANIEELI 11 - Sidama_Qullaawa _Maxaafa bible

DAANIEELI 11

¹«Medoonichu Daariyoosi moohihunni umi diro, iso kaa'lammoranna jawaachishammora mulesi uurre noommo» yii.

²Sokkaasinchu lede coy'ranni, «Ani xa kuleemmohe coyino ikkannoho: Wolootu 3 mootoolla Faarisi gobbara mookkanno. Insanni aane daannohu shoolki moote ku'urinni roore dureessa ikkanno; durummatenni wolqa afi'ranno yannara, gano gane woloota Giriikete gashshooti aana kayisanno.

³«Hakkunni gedensaanni mittu bareedu moote ka"anno; gashshootisino jawa ikkanno; isino hasi'rinore baala assanno.

⁴Ikkollana wolqasi batidhu deerrinni gashshootisi diigame shoolewa fulanno. Dargasino isi sircho ikkitinokki mootoolla amaddanno; insa giddonnino isi geeshshi wolqa afi'rannohu dihee'ranno.

⁵«Gibitsete moote lowo geeshsha jawaata ikkanno; ikkollana olantote hajajaano giddonni mittu isinni roore jawaate lowo geeshsha jawu gashshootira albisa ikkanno.

⁶Shiimu diri gedensaanni, Gibitsete moote Sooriyu moote ledo elle amadanno. Beettosino Sooriyu mootera aanno. Ikkollana ise wolqase jawaachishi'ra hoogasenni kainohunni isi wolqano jawaattannokkihura jaaloominsa dikeeshshanno. Kunnira ise ayiddaannise, beettisenna soqqamaanose ledo shinanni.

⁷Hakkawoyintenni ise fiixa ikkinohu mittu manchi moohanno. Isi aliyye olanto Sooriyu mootete ledo olamanno. Qiishonsa dhoose e"e qeelannonsa.

⁸Magannansa misillano insara fushshaate assine shiqinshoonni uduunni culkunnihunna birrunnihu ledo Gibitse haa're ha'ranno. Haammata diro Gibitsete moote Sooriyu moote qasara dika"anno.

⁹Hakkunni gedensaanni Aliyye moote Wodiidi moote horrara daanno. Ikkollana dayino lekkanni galagale baxikkinni gobbasi higanno.

¹⁰«Sooriyu moote ooso olaho qixxaabbanno. Oososi giddonni mittu lolahu gede jige mare Wodiidi gashshooti qiisho gawajjanno.

¹¹Hatte yannara Wodiidi moote lowo geeshsha hanqe Aliyye moote qasara ka"anno. Sooriyu moote qixxeessinota jawa olanto qeelanno.

¹²Afi'rino qeellenninna lowo olanto shee gudasinni boo'nanno. Ikkollana qeellesi anga dikeeshshitannosi.

¹³«Aliyye mooteno galagale gobbasi hige albita roortino olanto qixxeessi'ranno. Shiimu diri gedensaanni, seekke qodhisiisi'rinota lowo olanto adhe daanno.

¹⁴Hakkunni gedensaanni lowo manni Wodiidi mootera hajajama giwanno. Daanieeli, ajuuja wo'mitanno gede gosakki giddonni haxawarrootu gibbo kalaqqanno; ikkollana diqinaannonsa.

¹⁵Kunnira, aliyye moote mitto qiisho afi'rino katama gaangeesse, bushshunni seekkinoonni dirimi aanaanni hige sae amadanno. Wodiidi gaaddo iso ittisa didandiitanno; insa giddonni filantinori nafa iso hoo'late wolqa diafidhanno.

¹⁶Aliyyenni daanno hoorraanchi ittisannohu nookkiha hasi'rinore baala assanno. Hexxonnitera biifado Israeelete gobba aana uurre ise hunate wolqano afi'ranno.

¹⁷«Aliyye moote wo'ma olantosi adhe gaadoho qixxaawanno; diinisi gashshoote hunara hede, wodiidi moote ledo elle amade isira beetto aanno; ikkollana hedinori diqinaannosi.

¹⁸Hakkunni gedensaanni baaru qaccera noo gobba aana bala tuge lowo manna qafadanno. Ikkollana mittu wole gobba gaadaanni qeeleennasi boo'nasi hakko gawa'litanno. Boo'nanni xonanno xono baala umisira higganno.

¹⁹Hakkunni gedensaanni Aliyye moote umisi gobba qiishshawa higanno. Ikkollana qeelame uwanno daafira layinkimeeshsho dileellanno.

²⁰«Isi gedensaanni wolu moote ka"anno. Kuni moote gashshootisi ayirrinye agarate mitto giwire baatisiisannoha moohisanno. Konne moote kayinni shiima yanna gedensaanni mannu afanna woy olunni ikkikkinni maanxe shinanni» yii.

²¹Sokkaasinchu lede, «Isi gedensaanni mittu kaajjadu manchi ka"anno; mootimmate ayirrinye kayinni diuyinannisi; isino hedeweelcho ka"anno; roorreno xagarrotenni adhanno.

²²Maganunnihu qeesootu albisi nafa gatikkinni iso gibbanno olanto baala albisinni co'o asse hunanno.

²³Xagarrotenni keeru sheemaate kalaqe woloota gashshaano doganno; shiimu manni aana moohirono wolqate aana wolqa lexxanno.

²⁴Lowo geeshsha dureette ikkitinota mitte gobba bade hedeweelcho amadanno; akaakkasi giddonni mittu nafa asse egenninokki coye assanno; olunni adhino uduunnenna jajja baala olantosira beehanno. Qiishshate aana bala tugara hedanno; ikkollana shiima yannalla keeshshanno.

²⁵«Lowo olanto qixxeesse waajjikkinni Wodiidi mootera gaadanno; wodiidi mooteno jawa olanto qixxeessi're dagginosi olanto hoo'lanno; ikkeennano gannoonnisi ganonni kainohunni hedinori diqinaannosi.

²⁶Ledosi ittannori muli jaallasi huntannosi; gaaddosi lowoti reyitanno; olantosino gooffanno.

²⁷Hakkunni gedensaanni lamunku mootoolla wodanaho xagarro amadde heedhenni, mitteenni ittara mittu daaxaccira ofoltanno. Ku'u ko'onne dogara busha kapho coyi'ranno; ikkollana hendoonni yanna iillitinokkihura heddino gede di"ikkannonsa.

²⁸Aliyye moote gudhino jajja baala adhe higanno; higanno woyiteno Maganu manni amma'nano hunara hedanno. Hasi'rire baala assihu gedensaanni gobbasi higanno.

²⁹«Shiima yanna gedensaanni wodiidi gobba galagale horranno; ikkollana, albi gede diqinaannosi.

³⁰Roomaawootu markabbatenni dagge qassannosi daafira lowo geeshsha masanno. Badhera hige ha're lowo hanqinni Maganu manni amma'na hunara wo'naalanno. Amma'nansa agurtannori ledo jaaloomanno.

³¹Olantosino Qullaawa Mine batteessitanno; barru baala shiqinshanni kakkalono hooltanno; baote batte uurrisidhanno.

³²Moote balaxxe amma'nansa agurtinore baala doge baxxannosi gede assi'ranno; Magano seekke egennino manni kayinni jawaatanno; isi ledo gaaramanno; isono tiyyi're giwanno.

³³Mannu mereero noo egennaammi manna rosiisatenni egenno afi'ranno gede assitanno; shiima yanna gedensaanni kayinni gamisu giiratenninna bagadunni reyitanno; jironsa saamanteenna insano usurantanno.

³⁴Kuni lowo qarri aanansa dirranno yannara, shiima kaa'lo afidhanno; ikkollana insa giddonni mitu mitu goowi alita doggannoreeti.

³⁵Egennaammu giddonni mito mitoho lowo qarri iillannonsa; ikkeennano kunninni kainohunni ko'rishantenna ximbiiwante fultanno. Kuni coyi Maganu hedinoti goofimarchu yanna iillita geeshsha keeshshanno.

³⁶«Aliyye moote hasi'rinore baala wonshanno; umosino maganna baalate aliidiha asse kiiranno; maganna baalate aliidi Magani aana kunni albaanni macciishshine egenninoonnikkiha xonote qaale coyi'ranno. Maganu hedino coyi wo'ma hasiissanno daafira, Maganu hanqi aanasi daa geeshsha assannori qinaannosi. Maganuno hedinore baala assanno.

³⁷Moote akaakkasi maganna shollishanno; meentu baxanno maganna mishanno; umosi baalunkura aliidiha asse kiiranno daafira, maganna baala mishanno.

³⁸Hakkunninni roore, qiisho agaranno magano ayirrisanno; akaakkasi magansidhinokki maganira culka, birra, dilqa, seesu uduunnenna muxxe ikkino afansha shiqishatenni ayirrisanno.

³⁹Qiishshasi agartanno gede wole gobba maganna magansi'ranno manna woranno; albisaanchimmasi egentinore baala lowo ayirrinye ee mannu aana moohisanno; assitinosi galatirano baatto beehannonsa.

⁴⁰«Aliyye mootera goofimarchu iillanno woyite Wodiidi moote iso qasanno; ikkollana, Aliyye moote faradi gaaretenni, faradunninna markabbatenni hombobolattete bubbe gede ikke daye gawajjannosi. Lolahu gede asse lowo gobba horre gudanno.

⁴¹Hexxote gobbano horranno; tonne hige tonne kume manna shee gudanno. Edoomi, Moaabinna gatinohu Amooni manni angasinni gate fulanno.

⁴²Aliyye moote gashshootesi halashshi'ranno yannara, Gibitse nafa angasinni digattanno.

⁴³Gibitsete culka, birranna woleno ayirrado coye baala maanxoonni darginni adhanno. Liibiyunna Itiyophiyuno isi angara higanno.

⁴⁴Hakkunni gedensaanni soojjaatinninna aliyyenni daanno duduwi masisannosi. Lowo hanqinni kae lowo manna shee gudanno.

⁴⁵Mediteraaniyu Baarinna biifadu Tsiyooni Ilaali mereero jajjabba mootete dukkanna uurrisanno. Kuni baalu ikke hee'reenna isi umisi ba"anno; kaa'lannosihuno dihee'ranno» yii.