Read Sidama_Qullaawa _Maxaafa DAANIEELI 12 Bible Online

DAANIEELI 12 - Sidama_Qullaawa _Maxaafa bible

DAANIEELI 12

¹Shaalado seesallitte uddano uddi'rino sokkaasinchi, «Mannakki agarannohu jawu sokkaasinchi Mikaaeeli hatte yannara leellanno. Mannu kalaqantunkunni ikke egenninokkihu lowo qarri ikkanno. Su'mansa Maganu maxaafira borreessinoonnihu gobbakki manni kayinni hatte yannara gatanno.

²Balaxe reyino manni giddonni haammatu kae lubbotenni hee'ranno; insa giddonni gamu hegere heeshsho afidhe hagiidhitanna, gama kayinni hegere saalinna gadadu amade shetisannonsa.

³Hatte yannara egennaammu gordu xawaabbi gede xabbanno; lowo manna rosiisse halaalu widira qoltannori baalu hegerera gordu beeddahe gede warri yite xabbanno» yii.

⁴Qoleno, «Daanieeli, kalqete goofimarchi geeshsha maxaafa cuffe maatama aanaho gani. Hatte yannara lowo manni egenno hasi'ranni dargunni darga sa"anno» yii.

⁵Hakkunni gedensaanni xashshu gama 2 manchi ka'aanninna kawaanni uurrite noore afummo.

⁶Insa giddonni mittu xashshoho aleenni hige uurre noo sokkaasincho, «Kuni maalalete coyi baalu wo'ma geeshsha mageeshshi yanna adhanno?» yee xa'mi.

⁷Sokkaasinchuno lamenta angasi gordo qole gotti asse Hegerera Hee'ranno Magani su'minni xaaranni, «Sase dironna darate gudanno. Maganu manni aana daanno qarri uurra geeshsha kuni coyi baalu wo'manno» yii.

⁸Sokkaasinchu coyi'rinore baala macciishshoommo; ikkollana wodancha didandoommo. Kunnira, «Mooticha'ya, kunni baalu magarinni ikkanno coyeti?» yee xa'moommo.

⁹Isino qole, «Daanieeli, goofimarchu iilla geeshsha maxaafa cunfe maatama aanaho gannoonnina, ati keerunni ha'ri.

¹⁰Lowo manni ko'rishantenna ximbiiwante fulte kullanniri nookkire ikkitanno. Haxawarrootu kayinni mittoreno wodanchitannokkihura bunshete aana bunshe leddanno. Wodancha dandiitannori egennaamma callaho.

¹¹«Barru barrunkunni shiqinshanni kakkalo gatteenna baote batte uurritanno gede assinanni yannanni kayise 1,290 barri sa"anno.

¹²Tenne giddo 1,335 barri sa"a geeshsha amma'nasi agadhe hee'rannohu ba'raa'rinoho.

¹³«Ati Daanieeli, goofimarchu geeshsha ammanamatenni hee'ri. Hakkunni gedensaanni fooliishshi'ratto; goofimarchu barrano ka'e qeechakki adhatto» yiinoe.