Read Sidama_Qullaawa _Maxaafa DAANIEELI 3 Bible Online

DAANIEELI 3 - Sidama_Qullaawa _Maxaafa bible

DAANIEELI 3

¹Moote Nabukadanatsoori hojja 60 cigile, hala'linye 6 cigile ikkitanno misile culkunni seekkisiise, Baabilooni gashshootira Duura yinanni xawira uurrisi.

²Uurrisino misile maassora dagganno gede gashshaano, ayirradda, shoomantinore, amaalaasine, miinju mini murroota, daanyoota, seeru egennaammanna woloota roorroota noo noowiinni woshshiishi.

³Maassote woshshinoonni manni baalu daye misilete albaanni uurri.

⁴Hatte yannara mittu lallawa kulannohu qoonqosi naggi asse, «Ki'ne addi addi gobbanninna addi addi gosanni dagginoonniri, babbaxxino afiinni coyidhinanniri baalu,

⁵xurumbu, gingilaatu, maasinqote, kiraarete, baganunna suusullete qoonqo macciishshitinanni yannara, baattote aana ubbine moote Nabukadanatsoori uurrisinotera culku misilera kumbuultinanni gede hajanjoonni'ne.

⁶Baattote aana uwe kumbuulannokki manchi hee'riro, hakkawoyintenni bubbanno giira giddo tugamanno» yii.

⁷Kunnira addi addi gobbanninna addi gosanni dayinohu, babbaxxino afiinni coyi'ranno manni baalu xurumbu, gingilaatu, maasinqote, kiraarete, baganunna suusullete qoonqo macciishshi yannara baattote aana gombisame moote Nabukadanatsoori uurrisinotera culku misilera kumbuuli.

⁸Hatte yannara mitu mitu Baabilooni amaalaasine konne coye irkidhe Yihudoota su'ma huntunsa.

⁹Moote Nabukadanatsoorira, «Moote, hegerera hee'ri!

¹⁰Moote, ati xurumbu, gingilaatu, maasinqote, kiraarete, baganunna suusullete qoonqo macciishshannohu baalu baattote aana gombisame culku misilera kumbuulanno gede lallawisootto.

¹¹Baattote aana gombisame kumbuulannokkihu hee'riro bubbanno giira giddo tunganni gede hajajootto.

¹²Xa kune kayinni Baabilooni gashshitara shoomoottori Sidiraaqi, Misaaqinna Abidinaago yinanni Yihudooti hajajokki diayirrissino; magannakkino magansi'ra gibbino; uurrisootto misilerano dikumbuultanno» yitu.

¹³Moote konne coye macciishshe lowo geeshsha buwe hanqe Sidiraaqi, Misaaqinna Abidinaago abbinanni gede hajaji.

¹⁴Insano daggeenna Nabukadanatsoori, «Ki'ne Sidiraaqi, Misaaqinna Abidinaago maganna'ya magansi'ra giwa'nenna uurrisoommotera culku misilera kumbuula hooga'ne halaalenko?

¹⁵Xa xurumbu, gingilaatu, maasinqote, kiraarete, baganunna suusullete qoonqo macciishshitinanni woyite uurrisoommo misilera baattote aana gombisantine kumbuultiniro woyyate; kumbuula gibbiniro kayinni hakkawoyintenni bubbanno giira giddo tugantinanni. Anga'yanni gatisanno'ne magani nookkita egenne!» yiinsa.

¹⁶Sidiraaqi, Misaaqinna Abidinaago kayinni, «Moote, kunni coyira umonke gargadhate yine dawaro diqolleemmohe.

¹⁷Ninke soqqammeemmosi Magani tenne bubbanno giiranninna ate anganni gatisankera dandaanno.

¹⁸Moote! Gatisa giwinkero nafa magannakki magansi'neemmokkitanna uurrisoottotera culku misilera kumbuulleemmokkita afi» yitusi.

¹⁹Hatte yannara Nabukadanatsoori Sidiraaqi, Misaaqinna Abidinaagora lowo geeshsha buwe hanqeenna albisi kolishshi'ri. Kunnira, giira albinni roore 7 ero bubbanno gede hajaji.

²⁰Sasenka usurte bubbanno giira giddo tugganno gede olantosi mereerinni dhaabbata manna wori.

²¹Insano giddoyidi uddano, lukonsanna koffiyinsa aanansa hee'reennanni usurte bubbanno giira giddo tuggunsa.

²²Kaajjado mootete hajajo garinni giira wala yite bubbanni noo daafira Sidiraaqi, Misaaqinna Abidinaago giirate tuggure giirate foorari shii.

²³Sasunku manni kayinni duu'ne usurroonni gedeenni giirate buwani giddo ubbu.

²⁴Hakkunni gedensaanni moote Nabukadanatsoori dhaggeeffatanni kubbe kae, «Usurre bubbanno giira giddo tungummo manni 3 calla di"ikkino?» yee amaalaasinesi xa'mi. Insano, «Eewa moote!» yite dawartu.

²⁵Mooteno, «Kuneeti ani giira kissunsakkinni usurunni tidhante buwanu giddo kawanna ka'a ha'rantanni noore 4 manna la"anni noommo; shoolkihu magannate beetto lawanno» yii.

²⁶Kunnira Nabukadanatsoori bubbanno giirawa xullicho shiqqi yee, «Wo'munkura Aliidi Magani soqqamaano ikkitinoonniri Sidiraaqi, Misaaqinna Abidinaago! Rakkine fultine kawa amme!» yee woshshinsa. Insano hakkawoyintenni fulte daggu.

²⁷Hakkunni gedensaanni gashshaano, ayirraddu, shoomantinorinna amaalaasine baalu insa doyissite uurritu. Giira kissinonsakkita, uminsa dananchi nafa itaminokkita, uddanonsa dani soorraminokkitanna giirate fooli nafa kisinonsakkita affu.

²⁸Hakkunni gedensaanni moote Nabukadanatsoori, «Sidiraaqi, Misaaqinna Abidinaago Magani galatamo! Isi sokkaasinchosi soye soqqamaanosi gatisino. Insa Maganonsa addaxxite, iso agurranna wole magannara kumbuultannokki gede mootete hajajo gibbe lubbonsa sayisse uyitino.

²⁹«Togo asse gatisannohu wolu magani dino. Kunnira gashshooti'ya giddo hee'rannohunna addi addi afiinni coyi'ranno manni baalu mereero Sidiraaqi, Misaaqinna Abidinaago Magano xonannohu hee'riro, bisosi murmurre minesino diinge hunnanni gede hajajoommo» yii.

³⁰Hatto yiihu gedensaanni moote Sidiraaqi, Misaaqinna Abidinaago Baabilooni gashshooti giddo ayirrado darga worinsa.