Read Sidama_Qullaawa _Maxaafa DAANIEELI 4 Bible Online

DAANIEELI 4 - Sidama_Qullaawa _Maxaafa bible

DAANIEELI 4

¹Moote Nabukadanatsoori addi addi gobbaranna addi addi gosara hee'rannohura babbaxxino afiinni coyi'ranno mannira aante noo sokka soyino: «Keeru ki'nera ikko!

²Wo'munkura Aliidi Magani, assinoeha dhaggete loosonna, maalale kulammo'nera hasi'roommo.

³Maganu leellishanno maalale, mageeshshi geeshsha jawate! Isi loosanno loosi mageeshshi geeshsha jawaataho! Maganu hegere hegerera mootete! Gashshootisirano gawalo dino.

⁴«Ani Nabukadanatsoori gashshooti'ya mine lowo geeshsha duroo'menna qawaaxxi're hee'reemmo.

⁵Mitto barra ma'na goxe hee're lowo geeshsha waajjishshanno haaqee haaqii'roommo; ajuujatennino masisanno coye afoommo.

⁶Kunnira haaqeete tiro kultannoe gede Baabilooni noore egennaamma baala anewa dagganno gede assoommo.

⁷Kiilaano, qaalloole, masaalaanonna ayyaanto baala woshshe haaqee'ya kuloommonsa. Insa kayinni haaqee'ya tiro kultaera didandiitino.

⁸Hakkunni gedensaanni magani'ya su'minni Bilxaasoori yine woshshinannihu Daanieeli ei. Kuni manchi qullaawa maganna ayyaana afi'rinoha ikkinohura haaqee'ya,

⁹‹Egennaammu sooreessa ikkoottohu Bilxaasoori! Qullaawa maganna ayyaani noohetanna go'lino coyi baalu maaxamannohekkita afoommo; kune haaqii'roommo haaqee kuleemmohena tirie› yee kuloommosi.

¹⁰«Ma'na'yara goxe hee're, mitte lowo haqqicho baattote mereero fultinota, ajuujatenni afoommo.

¹¹Tini haqqicho lowo geeshsha, lophite gordo iillate, kalqete noo manni baalu, la"a dandaanno geeshsha ikkitu.

¹²Darono latte biifado ikkitu; kalqe baalate itate ikkitannoti lowo laalo noose. Dubbu moyichi hundase caa'lanno; iimi ceano sinnase aana mine mi'nite galtu; lubbo noonsari baalu laalose ittanni no.

¹³«Ma'na'yara goxe hee're laoommo ajuujanni jawaate agarannohu mittu qullaawu sokkaasinchi gordunni dirranna afoommo.

¹⁴Isino qoonqosi naggi asse, ‹Hattenne haqqicho karre; sinnaseno murmurre; daroseno xuruurre; laaloseno gantine giggishshe. Moyicho hundisenni, ceano sinnase aaninni shorre.

¹⁵Cifichose kayinni siwiilunninna camotenni, seekkinoonni cagaagenni umo xaaxxine, baattote giddo agurre. Xawoho hayissote giddo noo gedeenni gatanno gede asse. « ‹Gordu lojino aanasi dirrona; dubboho hayissote mereero moyichu ledo hee'rona.

¹⁶Mannu hedowiinni fule, lamalu diri geeshsha saadate gariha ikko.

¹⁷Konne coye hirqitinori, jawaatte agartannori qullaawa sokkaasineeti; kuni ikkinohu, Wo'munkura Aliidi Magani, gashshootu baalu aana wolqa afi'rinota, mannu baalunku afanno gedeeti. Gashshooteno isi baxinohura aanno; minshoonnirirano roorre aanno› yii.

¹⁸«Ani moote Nabukadanatsoori haaqii'roommo haaqee tenneeti. ‹Xa Bilxaasoori, haaqeete tiro kulie; gashshooti'ya giddo noo egennaammi haaqeete tiro kultaera didandiitino; atera kayinni qullaawa maganna ayyaani noohe daafira kulattoera dandaatto› » yoommo.

¹⁹Hatte yannara Bilxaasoori yinannihu Daanieeli lowo geeshsha masino daafira shiima yanna sammi yee keeshshi. Anino, «Bilxaasoori! Haaqeeno tirono yaachishshoonkehe» yuummo. Bilxaasoorino daware, «Moote'ya! Haaqeeno haaqeete tirono atera ikkikkinni diinikkira ikkitara halcheemmo.

²⁰Kuneeti hojja gordo iillitinotanna kalqete manni baalaho leeltannota mitte jawa haqqicho ajuujatenni afootto.

²¹Tini haqqicho daro biiffanote; kalqete manni baalaho ikkitannoti lowo laalo noose; moyichu hundase caa'lanno; ceano sinnase aana mine mi'nite heedhanno.

²²«Moote'ya! Hatti seedanna jawaata haqqicho ateeti; jawimmakki gordu geeshsha iillitino; roorrekkino kalqe baala tuqqino.

²³Moote'ya! Ati la'anni heedheenna mittu agaraanchu qullaawu sokkaasinchi gordunni dirre, ‹Hattenne haqqicho karre; cifichose kayinni siwiilunninna camotenni seekkinoonni cagaagenni umo xaaxxine baattote giddo agurre; xawoho hayissote mereero hee'rona; gordu lojino aanasi dirrona; 7 diri geeshsha dubbu moyichi ledo hee'rona› yiino.

²⁴«Moote'ya! Kuneeti tiro tenneeti; Wo'munkura Aliidihu Maganu ate aana ikkanno gede hirqino coyi kunninni aane nooho:

²⁵Mannu mereerinni baxxite hadhe, dubbu moyichi ledo hee'ratto; lamalu diri sa"a geeshsha handu gede hayisso itatto; gordu lojino aanakki dirranno. Kuni baalu coyi iillannohehu Wo'munkura Aliidi Magani mannu gashshooti baalu aana roorre afi'rinotanna gashshoote baalano baxisinosihura aannota afatto geeshshaati.

²⁶Cifichu baattote giddo gatanno gede hajajinohu Maganu kalqe baalate aana roorre afi'rinota affe galagalte higge moohattota leellisharaati.

²⁷Kunnira moote'ya! Ani eemmohe mala macciishshi; cubbo loosa agurte, wo'manka woyite dancha coye assi; sao assa agurte gadadaamma marari. Hatto assittoro lowo yanna keere hee'ratto.

²⁸«Kuni baalu coyi ane Nabukadanatsoori aana iillinoe.

²⁹Tonaa lamu agani gedensaanni Baabilooni noohura mootete mini aanaanni seekkinoonni darga kawanna ka'a ha'ramanni hee're,

³⁰‹Kuni jawu Baabilooni Katami hee'rammora, jawimma'yanna ayirrinye'ya leellishate wolqa'yanni minsiisi'roommoha di"ikkino?› yoommo.

³¹«Coyi're gudummokkinni, ‹Moote Nabukadanatsoori! Atera hirqinoonni coye macciishshi! Kuneeti gashshootekki atewiinni hoolloonni.

³²Mannu mereerinni baxxite dubbu moyichi ledo hee'ratto; lamalu diri sa"a geeshsha handu gede hayisso itatto. Kuni ikkannohuno Wo'munkura Aliidi Magani mannu gashshooti baalu aana roorre afi'rinotanna gashshooteno baxisinosihura aannota afatto geeshshaati› yitanno huuro gordunni daggu.

³³«Yinoonni coyino hakkawoyintenni ane aana wo'mi; kunnira mannu mereerinni baxxe, handu gedeno hayisso itummo; gordunni dirrino lojino aana'ya eeli; dananchi'yano doowiru baalluwa gedeeha ikki; culunqa'yano doowirunnite gedeeta ikkitu» yii.

³⁴Qoleno, «Lamalu diri saihu gedensaanni ani iima gordoho hee'ranno Magano huucci'rummo; wodani'yano darga higie; Wo'munkura Aliidi Magano galaxxanni, « ‹Gashshootisi hegereho; Mootimmasirano gawalo dino.

³⁵Baattote aana hee'ranno manni baalu, isi albaanni mullareeti; gordu sokkaasinerano ikko, baattote aana hee'ranno manni aana, hasi'rinore assanno. Hedinore assannokki gede hoolannohunna, «Togo mayira assatto?» yaannosihuno dino› yaanni ayirrisoommosi.

³⁶«Wodani'ya darga higanni hee'reennanni hakkawoyintenni gashshooti'ya ayirrinyinna gaacheenu galagale higie; amaalaano'yanna ayirraddu hagiirrunni haadhue; albinni roorino ayirrinye lendeennae galagale moohoommo.

³⁷«Kuneeti ani Nabukadanatsoori Gordu Mootera galata, ayirrinyenna guwishsha shiqisheemmo; isi assano coyi baalu taaloho; doogosino suwashshote; boo'nitannore baala shollisha dandaanno» yii.