Read Sidama_Qullaawa _Maxaafa DAANIEELI 7 Bible Online

DAANIEELI 7 - Sidama_Qullaawa _Maxaafa bible

DAANIEELI 7

¹Baabilooni moote Belshaatsaari moohihunni umi diro ani Daanieeli hashsha goxe hee're haaqee haaqii'roommo; ajuujano afoommo. Afoommo coye baalano borreessoommo. Kuni coyino aane nooho:

²Shoolunku raginni ka'ino bubbe lowo baara shaffu.

³Shoolu addi addi daniri jajjabbu moyichi baaru giddonni fultu.

⁴Umi moyichi doobbiicho lawannoho. Isira allaattete gedee qoolla noosi; ani la"anni hee'reenna qoollasi tatta'u. Moyichono gotti yee mannu gede ikke 2 lekkanni uurranno gede assini; mannu wodanano uyinisi.

⁵Layinki moyichi lowohonna waajjishannoho. Badhiidi lekkuwanni shankaffi yee uurrinoha Dibi yinanni moyicho lawanno. Hinkosinni 3 midashshu miqqa ga'me hee'reenna, «Hasi'ritto geeshshi maala iti!» yine kullisi.

⁶Konne la"anni hee'reenna kuneeti wolu daguncho lawanno moyichi fuli. Isirano badhesira ceannita labbannoti 4 qoolla noosi. Isi 4 umo afi'rino; gashshannota roorreno uyinisi.

⁷Konne la"anni hee'reenna xaano wolqaataamu, bushunna waajjishannohu shoolki moyichi fuli. Isira jajjabba siwiilu hinko noosi. Ugaaxe afi'rinore hattenne hinkonni cancane itanninna lekkasinni kakkadanni no. Isi balaxe afummo moyichubbanni baxxinohonna 10 buuda afi'rinoho.

⁸Ani tenne buuddare hedanni hee'reenna mereerinsanni wolu mittu shiimu buudi fule hattenne buudda giddonni 3 buqqise hoolanna laoommo. Kuni shiimu buudi mannunnita labbanno illenna boo'natenni coyi'ranno arrawo afi'rinoho.

⁹Ani la"anni hee'reenna, ayirradda mootete barcimma, aante aantetenni dirantu. Hegerera Hee'rannohu umisi barcimi aana ofolli; uddanosi kaadete gedeete; shaallote gede waajjote. Isi ofollino barcimi giirate gede buwanno; qalaame barcimu lekkuwa giirate gede wala wala yitanno.

¹⁰Giirate buichono ayirradu barcimiwiinni fultanno; isira kumunni kiirranni soqqamaano noosi; albasiinni uurritannori tonne higge tonne kumeeti. Yoono hananfi; maxaaffano fanni.

¹¹Shiimu buudi boo'natenni coyi'rannota, macciishshanni hee'reenna, hakkonne moyicho shine giirate giddo tungi.

¹²Wole moyichubbatano roorrensa haa'ne hoolli. Ikkollana shiima yanna lubbotenni heedhara agurinsa.

¹³Hashsha ajuujatenni mannu ila lawannohu gomichunni dukkisame daanna afoommo. Isono hegerera hee'rannohuwa haa'ne abbini.

¹⁴Addi addi gobbara hee'rannohu, addi addi afiinni coyi'ranno manni soqqamannosi gede, roorre, ayirrinyunna wolqa aamantusi. Roorresino hegere hegerete; gashshootisirano gawalo dino.

¹⁵Ani Daanieeli tenne ajuuja lae lowo geeshsha waajje yaadummo.

¹⁶Hakkiicho uurrite noori giddonni mittunniwa shiqqi yee, kuri baalunkuta halaalaancho tiro kulannoe gede xa'moommo. Isino baalunku tiro,

¹⁷«Kuri shoolu jajjabbu moyichubba shoole baattote aana ka'anno gashshootuwaati.

¹⁸Ikkollana Wo'munkura Aliidi Magani gashshoote qullaawoota ikkitinorira ragisiiseenna hegerenni hegere geeshsha angansa keeshshanno» yiie.

¹⁹Hakkunni gedensaanni wole moyichubba baalatewiinni addiha ikkinohure shoolki moyichire roorse afammora hasi'rummo. Kuni moyichi lowo geeshsha waajjishannohonna afi'riha baala siwiilu hinkonninna camote culunqanni bibbide itannoho; gatinohano lekkasinni kakkadanno.

²⁰Qoleno konni moyichi umi aana noo buudda tonnenterenna mereerinsanni 3 buqqise tugihu gedensaanni fulihure shiimu buudire roorse afammora hasi'roommo. Kunni shiimu buudira illuwanna afuu noosi; wolootu baalunkunni roore waajjishannohonna boo'natenni coyi'rannoho.

²¹Ani la"anni hee'reenna hakku shiimu buudi qullaawootu aana ola kayise qeelinsa.

²²Hakkunni gedensaanni Hegere Hegerera Hee'rannohu Wo'munkura Aliidi Magani daye, halaalaancho yoo yeenna qullaawootu gashshoote ragidhanno yanna iillitu.

²³Qoleno, «Kuni shoolki moyichi baattote aana ka"anno gashshooti shoolkiho. Kuni gashshooti gashshootu baalunkunni baxxinoha ikkinohura baatto baala co'o asse gude, cancanenna kade gashshanno.

²⁴Tonne buudda hakko gashshootiwiinni fultannoreeti. Hakkunni gedensaanni albiidi mootoollawiinni baxxinohu wolu moote kae tonnu gashshooti giddonni sase galchanno.

²⁵Wo'munkura Aliidi Magani aana boo'natenni coyi'ranno; qullaawa Wo'munkura Aliidi Magani manna qarrisanno. Amma'note ayyaannanna seera soorrara wo'naalanno. Insano 3 dironna darate isi anga galtanno.

²⁶Hakkunni gedensaanni yoo yaate ofollinanni; gashshootisi roorreno angasinni hoolleenna hegere hegerera ba"anno.

²⁷Baatto baalate aana nooti gashshootu roorre, wolqanna gaacheenu baalu qullaawu Wo'munkura Aliidi Magani mannira aamantanno; gashshootunniti roorrensa hegere geeshsha kaajjite heedhanno. Gobba baalate gashshaano insara hajajante soqqantannonsa» yii.

²⁸Ani laoommohunna macciishshoommo coyi konneeti. Lowo geeshsha waajjoommohura maseenna albi'ya shibbi yii. Ikkollana baalanka coye wodani'ya giddo maaxe amadoommo.