Read Sidama_Qullaawa _Maxaafa HOOSEI 10 Bible Online

HOOSEI 10 - Sidama_Qullaawa _Maxaafa bible

HOOSEI 10

¹Israeelete manni lowo hunduruurro amaddino haqqicho woyinennite gedeeho. Qiniitu bati'rinsa deerrinni, batinye kakkalote darga seekkidhino. Baattonsa guma uyite duroonsitunsa deerrinni, kaphu magannara kumbuullannita kinchu misilla seesiisse seekkidhu.

²Wodaninsara xagarro wo'mitino; assitino saono amaddannonsa. Kaaliiqi, kakka'litanno darga baalanka hunanno. Kaphu magannara kumbuultara seekkidhino sooddiyyeno hiiqqaqqanno.

³Mannuno, «Kaaliiqa waajja agurroommo daafira gashshannonke moote hoongoommo; moote hee'roommenkerono ma"assannonkehu baino?» yaanno.

⁴Gumiweelo ikkino coye coyidhanno; kaphu xaaronni gondooro e'anno. Kunninni kainohunni, halaale dawisa loosu giddo mu'rinohu harfaamu ishini gede ikkitanno.

⁵Samaariyu katamira hee'ranno manni Beetiaweeni nooha siitu suudinni seekkinoonniha kaphu magano lowo geeshsha waajjanno. Ayirrinyisi mulqaminohura mannisi wi'lanno. Kaphu magani qeesootino, «Woo» yite wi'litanno.

⁶Kaphu magano Asoori gobba massineenna jawu mootera afansha ikke shiqanno. Busha amaale ha'runsatenni kainohunni Israeele saalunna shollinyu amadannonsa.

⁷Samaariyu moote wayi aani hambii gede ikke gatanno.

⁸Israeelete manni Aweeni[10] yinanni katamira kaphu magano magansi'ranni cubbo loosanno gaarra diigantanno; kakkalonsa dargi aanano utunna kokko'lu fulanno. Hattenne yannara mannu ilaalla, «Maaxxenke» gaarrano, «Gollenke» yaanno.

⁹Kaaliiqi, «Israeelete manni Gibia katamira cubbo loosi yannanni kayise techo geeshsha, ane dadillisa diagurino. Kunnira Gibia olu ka"annonsa.

¹⁰Kore haxawarroota qorichishate murci're kaoommo. Daga baalanti gamba yite insa aana diinoomunni ka'anno. Erote cubbinsa daafirano lowo qorichi iillannonsa.

¹¹«Israeeli qajeelino middichi gedeeho; ikkeennano biiffino haxosi aana qambara duhisiiseemmosi. Kunni garinni Yihudu hawuuranno; Israeeli waaxame baatto shaqqishanno.

¹²Anino, ‹Kunni ka'a galo baatto hawuurre; keeraanchimma umi'nera wixidhe; anera ammanantinoonnire ikka'nenni daanno atoote gamba assidhinannina. Kuneeti ane Kaaliiqi'newa higginanni yanna xaati! Anino daye atoote xeenimma dirriseemmo'ne› yoommo.

¹³Ki'ne kayinni bunshe wixidhine cubbo mixxitinoonni; kaphi'ne abbino guma ittinoonni. «Umi'ne wolqanna ejjeetto'ne batinye addaxxitinoonni daafira,

¹⁴manni'ne aana jawaatu oli daanno; qiisho'ne baalanti diigantanno. Kunino Shalamaani yinanni moote Beeti-Arbeeli yinanni katama olunni diigi gedenna amuuwa oosonsa ledo baattote aana cancane gudi yanna gede ikkanno.

¹⁵Beeteli manna! Loossinoonnihu cubbi'ne batinyinni kainohunni ki'nerano hattoo bao iillitanno'ne. Olu ka"anni hee'reennanni hakkawoyintenni Israeelete moote horonta ba"anno» yaanno.