Read Sidama_Qullaawa _Maxaafa HOOSEI 12 Bible Online

HOOSEI 12 - Sidama_Qullaawa _Maxaafa bible

HOOSEI 12

¹«Israeelete manni barra wo'ma loosanno loosi, bubbete gede amadamannokki gumiweelooti; qoleno soojjaatinni dagganno hombobolatte gede hunannoho. Xagarronna haxawarrimma mereeronsa batidhino; hakkunni ka'aannino Asoori ledo gondooro e'ino; zayitensano Gibitse soqqitanno» yii.

²Kaaliiqira Yihudu manna abbooshshi'ranno coyi noosi. Yaiqoobi mannano qaafonsa garinni qorichishanno. Assitinohu bushu loosinsa deerrinni waagansa aanno.

³Albihu anninsa Yaiqoobi amasi godowi giddo hee're lakkichu rodiisi ginde amadino. Lophihu gedensaannino Maganu ledo sharramino.

⁴Sokkaasinchu ledono sharrame qeelino; baxannosi gedeno wi'le huucci'rino. Wole yannarano Maganu ledo Beeteli xaaddeenna isi widoonni qole ninke ledo hasaawino.

⁵Ledonke hasaawihu Olantote Magani Kaaliiqi, su'misi Kaaliiqaati.

⁶Kunnira ki'ne Yaiqoobi sirchi Magani'ne kaa'lo hexxe; isiwano higge. Baxillenna halaalaancho yoo duudhine amadde. Agurtinikkinni Magano cincatenni agadhe.

⁷Kaaliiqi, «Israeelete manni Kana"aanootu gede hexxinannikkiha ikkino; kaphu keenaasinchinni manna doganno.

⁸Insa, ‹Ninke dureeyye ikkinoommo; lowo jirono gamba assi'noommo. Duroo'mitinohu doogimaletenniiti yee sao aananke afannohu dino› yitanno.

⁹Gibitsete gobbanni massage fushshummo'nehu kayinni ani Magani'ne Kaaliiqaati. Daasu Ayyaana ayirrinsanni yannara dukkanaho heedhininte gede, galagaltine higgine dukkanaho heedhinanni gede asseemmo'ne.

¹⁰«Balaxe himanaanote afiinni coyi'roommo; lowo ajuujano leellishoommo. Himanaanote widoonni qole masalsanni lowo qorophishiishsha oommo.

¹¹Kuni baalu ikke hee'reennanni Geleaadi gobbara kaphu magannara kumbuultanno. Kaphu magannara kumbuultannori kayinni ba'anno. Galgalaho woraamma kakkalote shiqishshanno. Kakka'litanno darguwa kayinni hiiqqaqqante loosu mereero kinnate duuno ikkite gattanno» yii.

¹²Albi anninke Yaiqoobi Mesiphexoomiya yinanni gobba xooqe ha'rino. Hakkiicho galte afi'rara yee ge'reewu allaalaancho ikke soqqamino.

¹³Kaaliiqi soyino himanaanchi widoonni qole Israeelete manna Gibitsetenni massage fushshino. Hakkunni himanaanchi widoonni qoleno towatinonsa.

¹⁴Ikkollana Israeelete manni Kaaliiqa lowo geeshsha hanqisino. Assitino saorano reyotenni qorichishannonsa; su'masi xonsiissinorirano yoo yaanno.