Read Sidama_Qullaawa _Maxaafa HOOSEI 6 Bible Online

HOOSEI 6 - Sidama_Qullaawa _Maxaafa bible

HOOSEI 6

¹Israeelete manni, «Amme, Kaaliiqiwa hingona! Isi hiiqqinonkente gede, isinni sissannonke. Isi madiissinkente gede, isinni madankera gaga ganannonke.

²Lamu barri gedensaanni baqqi assannonke; sayikki barra kayisannonke. Albasiinnino lubbotenni hee'neemmo.

³Amme, Kaaliiqa afate lowo geeshsha diinaggaambona. Isino soodimari xawaabbinna baatto duushshannohu badheessi xeeni gede addinta ninkewa daanno» yaanno.

⁴Kaaliiqi kayinni, «Israeeletenna Yihudu manna! Ki'ne hiissummoro woyyate? Ki'ne ane baxxinanni baxilli soodimari guunjonna guto loji gede rahe ba"anno.

⁵Kunni daafira himanaano'ya widoonni qole murmurannohanna gorre shaannoha qaale'ya soommo'ne; yoo'yano banqote gede beleqqanno'ne.

⁶Ani kakkalotenni roorse baxille hasi'reemmo; shilqinshanni kakkalonni roorse mannu Magano afannota doodheemmo.

⁷«Insa kayinni, Addaami gede ane ledo e'ino gondooro diiggino. Hakkiicho anera ammanantinokkire ikkansa egensiissino.

⁸Geleaadi bushu manninna manna shitannori wo'mitino katama ikkino.

⁹Addi-fulootu manna shitara duggannohu gede, qeesootu gaamono hatto assitanno. Sekeemi massitanno doogora nafa manna shitanno; saalsiissanno bunshe assitanno.

¹⁰Israeelete giddo macca cu'mi'nanni coye afoommo. Hakkuno, mannu kaphu magano magansi'ratenni battaawino.

¹¹«Ki'ne Yihudu manna! Wixidhinoonniha mixxitinanni yanna dagganni no.