Read Sidama_Qullaawa _Maxaafa HOOSEI 7 Bible Online

HOOSEI 7 - Sidama_Qullaawa _Maxaafa bible

HOOSEI 7

¹«Israeele hursatenna galagalche duroo'mitanno gede assate hasi'reemmo yannara cubbinsanna saonsa xabbe leeltanno. Insa insanaawa kapho coyidhanno; mine unte moortanno. Garo kalaqidhe dooggate manna mulqidhanno.

²Kayinnilla ani tenne bunshensa baalanta la"anni noommota horontanni diwodanchitino. Kunninni kainohunni uminsa cubbinni qoqqowantino; bushu loosinsa baalu albi'yanni dimaaxamino» yii.

³Kaaliiqi, «Mannu, mootoolla awaawuratenni, roorrootano dogatenni hagiirsiisanno.

⁴Insa aana ka'annori baalunku ammanantinokkireetinna foortannoreeti. Gibbonsa, tima ganannohu liinsoonni bullee shiishsha geeshsha dumbe agarroonni giira gedeete.

⁵Mootensa jili barra, gashshaano lowota woyinete xajje agge dimbite dhiwantu. Tima ganannohuno[9] haariimannosi mannira malaate leellishara angasi kayisi.

⁶Gano ganate wodaninsa giirate booso gede iibbinoho. Hanqinsa hashsha wo'ma wiliilanni galanno; soodanno woyite kayinni bubbanno giira gede wala yaanno.

⁷«Baalunku hanqunni giirate booso gede iibbite gashshaanonsa ittu; mootoollansano bado badontenni huntu. Kuni baalunku ikkanna, insa giddonni mittu nafa ane woshshi'rinohu dino» yii.

⁸Kaaliiqi, «Israeelete manni dagate ledo karsamino. Insa galchiminokki timi gedeere ikkitino.

⁹Allaggu wolqansa guddu; insa kayinni diwodanchitino. Geedhimma leellishate awuuwe fultinonsa; insa kayinni diwodanchitino.

¹⁰Israeelete mannira uminsa adawarshi naqqasanno. Kuni baalu ikke hee'reennanni ane Kaaliiqi Maganinsawa dihiggino; horontanni dihasidhinoe.

¹¹Israeelete manni lembooli gede busulle afi'rinokkiha balala ikkino. Kunnira kaa'lo afi'rate mito woyite Gibitse dodanno; mito woyite Asoori buuwanno.

¹²Ha'rantanno darga baalaho woshshaado'ya wore ceate gede asse amadeemmonsa. Loossinohu bushu loosinsa daafira qorichisheemmonsa.

¹³«Anewiinni faffe hadhino daafira, insara aanne'e! Anera mokkookkitinoehura bao daggannonsa. Wonara ani gatisammonsara hasi'roommo. Insa kayinni ane kaphunni magansidhinoe.

¹⁴Daallasinsa aana haabbe raartannota ikkinnina wodaninsanni anewa higge dihuuccidhanno. Gidenna woyinete xajje afidhara kayinni dagate gede bisonsa huduuxxitanni huuccidhanno; ane aanano mokkookkitanno.

¹⁵Qajeelchoommonsahunna wolqansa jawaattanno gede assoommohu aneeti; insa kayinni anera gano gantino.

¹⁶Anewiinni faffe kapho magansi'rate higgino; alaama so'rinohu shokkashshu digaani gede ikkitino. Roorrootinsano busha coye coyi'ratenni kainohunni bisetenni ganneenna reyitanno. Gibitsootuno qacifattannonsa» yii.