Read Sidama_Qullaawa _Maxaafa HOOSEI 8 Bible Online

HOOSEI 8 - Sidama_Qullaawa _Maxaafa bible

HOOSEI 8

¹Kaaliiqi, «Manni'ya gondooro'ya diigino; hajajo'ya hunino. Kunnira, diinu manni'yara allamurchimma qoqqobbisanni noo daafira, qorophishiishshaho buudu xurumba ufuuffe!

²Insano, ‹Maganonke ballo! Ninke Israeele ate egenninoommo› yitanni ane widira higge raartanno.

³Israeelete manni kayinni dancha coye giwanno daafira diinu shorrannonsa.

⁴«Ani yuummokkinni moote moohisidhino; ane xa'midhukkinni gashshaano doodhitino. Birrinsanninna culkinsanni uminsara ba"ate ikkitannota kaphu maganna seekkidhino.

⁵Samaariyu manna! Siitu suudinni seekkinoonnita kaphu maganna'ne shagaggi're giwoommo. Hanqi'ya ki'ne aana giirate gede buwanno. Cubbi'nenni keeraabbinannikkihu mamooti geeshshaati?

⁶Insa Israeele di"ikkitino? Kuni siitu suudinni seekkinoonnihu kaphu magani makaa'lannonsa? Ogeessu angasinni seekkinoha ikkino daafira, magano ikkara didandaanno. Kuni, Samaariyu manni siitu suudinni seekki'rino magani, hiiqqaqqame uwanno.

⁷Insa bubbe wixidhe hombobolatte mixxitanno; gideho gumu dihee'rannosi. Gumu hee'riro nafa allaggichu itanno.

⁸Israeelete manni dagate mereero egemmamino daafira, hiiqqamino uduunnichi gede tidhinokkiha ikkino.

⁹Baandeelannohu gobba harrichi gede mullawa raataabbanni Asoori gobba hadhino. Ha'litannonsa gede dagate woxe baatte eegantanno.

¹⁰Dagate woxe baaxxite eeganturono, mitteenni gamba asse qorichisheemmonsa. Asoori mootenna roorrootu kadde gashshitannonsa yannara, shettote batinyinni kainohunni raartanno.

¹¹«Israeelete manni cubbo agursiisi'rate, batinye kakkalote darga seekki'rino. Ikkollana kakkalote darguwa batidhu deerrinni cubbinsa lexxino.

¹²Ani insara seera'yanna hajajo'ya borreesse oommonsa. Insa kayinni wosinchu coyi gede assite kiirte adha gibbino.

¹³Insa anera kakkalo shiqishshanno; kakkalote maalano ittanno. Ani kayinni insa kakkalonni dihagiidheemmo. Saonsa kiireemmo; cubbinsa daafira qorichisheemmonsa; galagalte Gibitse hadhanno gede asseemmonsa.

¹⁴«Israeelete manni uminsara jajjabba mootete minna mi'nino. Ane Kalaqaanchonsa kayinni hawino. Yihudu mannino haammata qiishote katamma mi'nino. Ikkollana katammansanna qiishonsa ittanno giira soyemmo» yii.