Read Sidama_Qullaawa _Maxaafa IYUEELI 1 Bible Online

IYUEELI 1 - Sidama_Qullaawa _Maxaafa bible

IYUEELI 1

¹Puteeli beetti Iyueeliwa Kaaliiqiwiinni dayinohu himanu qaali kunninni aane nooho:

²Ki'ne geerru konne coye macciishshe! Baattote aana heedhinanniri baalunku macca'ne kawa qolle! Togoo coyi yanna'nera, woy akaakka'ne yannara ikke egenninoni?

³Konne coye ooso'nera kulle; ooso'neno oosonsara kultona; ooso'ne oosono qolte dagganno ilamara kultona.

⁴Sixuwiinni gatino gide, kanchafaru gudino. Kanchafaruwiinni gatinoha, shiimmaaddu kanchafari itino; hakkiinni gatinoha qooliweelu kanchafari itino.

⁵Woyinete haqqe baalanti ba'ino daafira, kunni ka'a haaro woyinete xajje suumetenni dikissinanni. Kunni daafira ki'ne dimbaano, baqqi yitine ka'ine wi'le. Ki'ne woyinete xajje agginanniri, heqqifattinanni wi'le.

⁶Kiiro nookkihu wolqaataamu kanchafari, horranno diini gede baattonke aanira dayino. Hinkosino doobbiyunnite gede qaraamete. Keltisino meya doobbiyi gedeeho.

⁷Woyinete kaashshonke baala huni. Balasete haqqenkeno quuxare iti. Sinnano waajjo asse, omollano sholoole tugi.

⁸Kunnira, huucci'rinohu reennase, xiddu uddano uddidhe wi'litannote gede, ki'neno hatto ikkitine wi'le.

⁹Maganu minira uyinannihu, giduno woyinete xajjeno hooggino daafira, Maganu mine soqqantanno qeese wi'litanno.

¹⁰Gatu mullicho ikkino. Gidu baino. Woyinete kaashshi moolino. Zayitete ejedheno qoortino; kunni daafira baatto wi'litanno.

¹¹Qamadenna hayixu, wolu gidino baino daafira, ki'ne loosidhinanniri dadille; ki'ne woyinete kaashshi annuwa wi'le.

¹²Woyinete kaashshinna balase qoortino. Saattunna laaltanno haqqe baala mooltino. Kunninni kainohunni hagiirru mannuwiinni baino.

¹³Magani'nera uyitinanniri, gidinna woyinete xajje nookki daafira, ki'ne kakkallanni darga soqqantinanni qeese, xiddu uddano uddidhine dadille. Qullaawu Minirano e'ine hashsha wo'ma wi'le.

¹⁴Mannu itanna aga agure huucci'ranno gede lallabbe! Manna baala xaado woshshe! Geerranna gobbate manna wo'manka, Maganu Kaaliiqi Minira gamba asse. Kaaliiqi widirano raarre.

¹⁵Kaaliiqi barri gambisino. Wo'munkura Aliidi Magani bao abbanno barri iillino. Hakkunni barrira aanne'e!

¹⁶Gidinke ba"anna dadillunni la'neemmo. Qullaawaho Maganinke Kaaliiqi Minira, jilunna hagiirru dino.

¹⁷Winxoonni gidi baalu baattote giddo dukukke baino. Gidu hoogino daafira, gide worranni dargi baalu mulla ikkino. Gootarrano diigantino.

¹⁸Saada hayisso hoogge godooddanno; ge'reewuno hudi're raataawanno.

¹⁹Kaaliiqa ballo, xawu hayissonna dubbu haqqe baala, giirroonnihu gede co'o yite mooltino daafira, ate widira hige raareemmo.

²⁰Xashshuwa baalanti mooltinohuranna, xawu hayisso baala giirante ba'ino daafira, dubbu moyichi ate widira hige godoodanno.