Read Sidama_Qullaawa _Maxaafa IYUEELI 3 Bible Online

IYUEELI 3 - Sidama_Qullaawa _Maxaafa bible

IYUEELI 3

¹«Hatte yannara, Yihudunnitanna Yerusaalamete qafado qoleemmo.

²Daga baalanta gamba asse, Iyosaafiixi Lagicha dirriseemmo. Manni'ya aana assitino sao baalantera, hakkiicho yoo yeemmonsa. Hatto asseemmohuno, insa manna'ya dagate mereero billaallissinonna, gobba'ya Israeele beeqqite amaddinohuraati.

³Qafadaminoha manna'ya beeqqate hixa tuqqitino. Meentu ledo foortara yite labballi ooso sayisse uyitino; woyinete xajje aggara seenne borojjimmate hirtanno.

⁴«Ki'ne Xiroosi, Sidoonanna Filisxeemete ga're baala, ane aana ma"assitinara heddinoonni? Ani assoommo coyira rabbisidhinara hasidhinoonnini? Tenne heddinoonniha ikkiro, ani rahotenni balaxe rabbisi'reemmo'ne.

⁵Birra'yanna culka'ya, hattono ayirrado uduunne'ya baalanka, adhitine misilla guwisidhinanni minira eessidhinoonni.

⁶Yihudunna Yerusaalamete manna gobbansanni xeertissine Giriikete mannira hirtinoonni.

⁷Kuneeti xa hirtinoonninsa dargi baalunkunni fushshe abbeemmonsa. Insa aana assitinoonni beebba baalanta ki'ne aana daware abbeemmo.

⁸Ooso'nenna seenne'ne sayise Yihudu mannira eemmo. Insano xeertote noorira Saabaawootaho hirtannonsa. Konne coye coyi'roommohu ani Kaaliiqaati.

⁹«Konne coye daga baalantera dudubbe. Olaho qixxaabbe; bareedda'ne baalanta woshshe. Olamaasine'ne baalanti gamba yite olaho fulto.

¹⁰Maarasha'ne bise, haanto'ne amaxxo assitine tunsiisidhe. Wolqiweelu nafa, ‹Ani jawaataho› yoo.

¹¹Ki'ne qooxeessaho heedhinanni daga baala, rahotenni fultine, lagichaho gamba yiiyye» yiinsa. Kaaliiqa! Olamaasinekki soyi!

¹²Daga baalanti qixxaabbe, Iyosaafiixi Lagicha hadhona. Kaaliiqi qooxeessaho noo daga aana, yoo yaara hakkiicho ofollanno.

¹³Insa bunshe lowo geeshsha batidhino; kunni daafira, insa iillino gide mindannihu gede assitine midde. Kooffichoho wonshine kandanni woyine gede assitine kadde.

¹⁴Kaaliiqi barri yoote lagichira leellanno yanna iillitino! Kunni daafira, kiiro lowo geeshsha bati'rino manni, hakkiicho gamba yee no.

¹⁵Hakko barra arrishshonna aganu tunsanno; beeddaheno xo'anno.

¹⁶Kaaliiqi Tsiyooni Ilaalira, Yerusaalamete hee're harqanno; gordunna baatto shafantanno. Isi kayinni mannisira Israeelete, gaa'linanni qiisho ikkanno.

¹⁷«Israeele, ki'ne hatte yannara, ani Kaaliiqi Magano'ne ikkoommota affinanni. Qullaawu Ilaali'yara Tsiyooni hee'reemmo. Yerusaalameno qullaawa katama ikkitanno. Kunni ka'a manni gobba manni dikadannose.

¹⁸«Hatte yannara ilaalla baalanta, woyinete kaashshi guggushshanno. Gaarrate aanano lowo ado uyitanno saada hossanno. Yihudu baattora heedhanno lagga baalate, wayi wo'manno. Maganu Mini Qullaawu giddo buicho lolakkanno. Shixiimi Lagichano hayikkissanno.

¹⁹Yihudu manni aana beebba assitino daafiranna, beebbatenni manna shitino daafira, Gibitse moollete soorrantanno. Edoomino mannu hee'rannokki darga ikkanno.

²⁰Xaa geeshsha rabba qolummonsakkinni keeshshoommori daafira, beebba assitannore rabbiseemmo. Yihudanna Yerusaalame kayinni, hegerera manni'ya hee'rannowa asseemmo. Ani Kaaliiqino Tsiyooni Ilaali aana hee'reemmo» yaanno.