Read Sidama_Qullaawa _Maxaafa AMOOTSI 2 Bible Online

AMOOTSI 2 - Sidama_Qullaawa _Maxaafa bible

AMOOTSI 2

¹Kaaliiqi, «Moaabi manni marro marro hige loosino cubbi daafira, mararro nookki kaajjillinni qorichishummokkinni diagureemmo. Insa, Edoomi moote miqicho giirte buluulo assitino.

²Kunnira Moaabi baatto aana giira qaseemmo. Qiriyoti Qiishono giireemmo; olantote alaakanninna ufuunfanni xurumbi luulinni kainohunni, Moaabi manni waajje reyanno.

³Moaabi gashshaanchonna gobbasira noo albisaano huneemmo» yii.

⁴Kaaliiqi, «Yihudu manni marro marro hige loosino cubbi daafira, mararro nookki kaajjillinni qorichishummokkinni diagureemmo. Insa seera'ya huntino; hajajo'yano diagadhitino. Insano, annuwansa magansidhinoti kaphu maganna so'risiissinonsa.

⁵Kunnira Yihudu baattora giira qaseemmo; Yerusaalamete qiishono giireemmo» yii.

⁶Kaaliiqi, «Israeelete manni marro marro hige loosino cubbi daafira, mararro nookki kaajjillinni qorichishummokkinni diagureemmo. Insa asale qola dandiinokkiha beebbaataamonna koattete waaga baata dandiinokkiha buxicho mancho borojjimmate hirtino.

⁷Wolqa afidhinokkirenna kaa'lannohu nookkire bukote aana tugge umonsa kakkaddanno. Gadadaamma xiibbe doogote aaninni fushshitanno. Annunna beettu mitte soqqamaancho ledo foortanno. Kunni loosinsanni qullaawa su'ma'ya batteessitanno.

⁸Asale baata dandiitannokki buxane aaninni uddano amadote adhitanno. Kakkalo shiqishshanno darga baalawa hattenne uddano diphite goxxanno. Asalaasinete anganni murote adhitinota woyinete xajje abbite Maganinsa mine agganno.

⁹«Ani kayinni ki'ne daafira yee hojja daguwu gedeere, jawaante ejersu gedee Amooraawoota rumushshunkunni buqqise hunoommo.

¹⁰Gibitsete gobbanni fushshe 40 diro wo'ma halallitte gobbara massagoommo'ne. Amooraawootu baattono ki'nera iqqa asse oommo'ne.

¹¹Labballu ooso'ne mereerinni mito himanaano, wedelli'ne giddonnino mito Naaziroota[1] asse gaamoommo'ne. Israeelete manna! Kuni coyi dihalaaleho? Ani Kaaliiqi konne coye coyi'roommo.

¹²Ki'ne kayinni Naaziroota woyinete xajje hayikkissinoonni. Himanaanono himana coyidhannokki gede hooltinoonni.

¹³Kunnira, lowo gide hogomboonni faradi gaare gede asse hiiqqaqqeemmo'ne.

¹⁴Rakke doddannori nafa xooqqe difultanno. Wolqaataamu mannino wolqa hooganno. Bagadaanono umonsa gatisa didandiitanno.

¹⁵Maxxa oltannorino gargadha didandiitanno. Rakke doddannori xooqqe difultanno. Faradaasineno lubbo gatisi'ra didandiitanno.

¹⁶Hakko barra, lowo geeshsha jawaata olanto nafa bagadonsa hunte xooqqanno» yii.