Read Sidama_Qullaawa _Maxaafa AMOOTSI 4 Bible Online

AMOOTSI 4 - Sidama_Qullaawa _Maxaafa bible

AMOOTSI 4

¹Maqalloonnihu Baasaani lali gede missinoonniri, Samaariyu meenti, konne coye macciishshe. Ki'ne wolqa hoogginore raateessitinanni; buxane gawajjitinanni; wo'manka woyite ayyiddaanna'ne, dimbisanno ago abbanno'ne gede qarrissinanni.

²Kunnira Mootichu Kaaliiqi qullaawa ikkasinni, «Ki'ne baalunku qarawunni amande, goshoonshanni qulxu'mi gede ikkitinanni barri daanno.

³Mitte mitte'ne, mule'ne noo xullo lulluqqinannite giddoonni goshoonshe fushshine, Harmooni tunganni'ne» yee xaari.

⁴Mootichu Kaaliiqi, «Israeelete manna! Beeteli hadhine cubbo loosse; Galgalano martine hakkiinni roore bunshe loosse. Barru barrunkunni kakkalo'ne shiqishidhe; sayikki sayikki barrano tonnunni mitto uyidhe.[2]

⁵Assate hasidhinanni coye ikkino daafira, Magano galatate shiishino tima shiqishshesi; baxxine shiqishshinanni kakkalono, naaxxitinanni uuyyesi. Konne coye coyi'roommohu ani Mootichu Kaaliiqaati» yii.

⁶Kaaliiqi qole, «Hinkotenni qassinanni sagale ho'le, katamma'ne baalate qarra facci asse agureemmo. Ki'ne kayinni gaabbitine, galagaltine anewa dihigginoonni.

⁷Loosidhinoonni gidi iillara, sasu agani gate hee'reenna, xeena ganannokki gede assoommo. Mittu qachira gane, wolu qachira ganannokki gede assoommo. Mittu gati xeena ganeenna, wolu gate hooge moolino.

⁸Mannu aganno waa hasi'ranni, katamunni katama saino. Ikkollana goo'ro fushshanno waa diafi'rino. Ki'ne kayinni gaabbitine, galagaltine anewa dihigginoonni. Konne coye coyi'roommohu ani Mootichu Kaaliiqaati.

⁹«Jajja'ne mooshshitannota, wolqaataame bubbe soommo; kaashsho'nenna woyine'ne, balase'nenna zayitete ejedhe'ne baala, kanchafaru itino. Ki'ne kayinni gaabbitine, galagaltine anewa dihigginoonni. Konne coye coyi'roommohu ani Kaaliiqaati.

¹⁰«Gibitsete gobbara soommohu gedee qoomama soommo'ne; wedella'ne bise shitanno gede, faradi'neno qafadamanno gede assoommo. Nafara'ne reyino manni reeshshi boshshino. Ki'ne kayinni gaabbitine, galagaltine anewa dihigginoonni. Konne coye coyi'roommohu ani Kaaliiqaati.

¹¹«Soddoomanna Gomoora hunummonte gede ki'ne giddonnino lowo manna hunoommo. Ki'ne giddonnino gattinoonnire giira ittuhu gedensaanni gate fulino haqqichi gedeere ikkitinoonni. Kuni baalu ikke hee'reennanni gaabbitine anewa dihigginoonni. «Konne coye coyi'roommohu ani Kaaliiqaati.

¹²«Israeeli manna, kuneeti kunni garinni qorichishammo'neraati. Halaalenka yoo yeemmo'nehura, ane Magani'ne ledo xaaddinara qixxaabbe» yii.

¹³Ilaalla loosinohu, bubbe kalaqinohu, hedino coye mannaho leellishannohu, barri xawaabba tunsichoho soorrannohu, baattote tulluwa aana qaafannohu, Maganoho. Iso, «Wo'manka Dandaannohu Olantote Magani Kaaliiqi» yine woshshinanni.