Read Sidama_Qullaawa _Maxaafa AMOOTSI 5 Bible Online

AMOOTSI 5 - Sidama_Qullaawa _Maxaafa bible

AMOOTSI 5

¹Israeelete manna, ki'ne daafira wi'leemmo wi'la macciishshe.

²Kuneeti seemo Israeele ubbu; galagalte ka"a hoogginohura, baattote aana diriirtu; gotti assannose kaa'laanchono diafidhino.

³Mootichu Kaaliiqi, «Mittu Israeelete kataminni 1,000 bagadaano gaaddanno; gatte higgannori kayinni, 100 calla ikkitanno. Wolu kataminnino 100 bagadaasine gaaddanno; gatte higgannori kayinni, 10 calla ikkitanno» yii.

⁴Kaaliiqi, «Israeelete manna, lubbotenni heedhinannina, ki'ne ane hasidhe.

⁵Ane hasi'rate Beeteli hadhinoonte; Galgala martinoonte; magansi'rate Bersaabehi hadhinoonte. Beeteli diigante nookki gede ikkitanno; Galgalaho hee'ranno manni addinta qafadamanno» yii.

⁶Israeelete manna, lubbotenni heedhinanni gede, Kaaliiqa hasidhe. Gibbiniro kayinni, giirate gede ikke giiranno'ne. Beeteli heedhannoreno giira ittanno; hattenne giira xoyissannohu dihee'ranno.

⁷Yoo dawissinanniriranna, halaale kaphoho soorritinannirira ki'nera aanne'e!

⁸Piliyaadisi yinannire 7 beeddahenna, Ooriyooni yinanni beeddahe, hubbo hubbo asse kalaqinohu Maganoho. Hashsha barraho, barra hashshaho soorrannohu, baaru waa gordu iimira fushshe, galagalche baattote aana lolaasannohu, wolqaataammanna qiishonsa buluulo assannohu isooti. Su'misino Kaaliiqaati.

¹⁰Ki'ne yoote nafara, rufe seejjanno'neha gibbinoonni; halaale coyi'rannohano diqattinoonni.

¹¹Buxane miiccinoonni; gidensano wolqatenni adhitinoonni; minna kinchunni mi'nitinoonni; ikkollana diheedhinanni. Hagiirsiissannota woyinete haqqe kaasidhinoonni; ikkollana isenni worroonnita, woyinete xajje diagginanni.

¹²Bunshe'ne batidhino garanna, cubbi'neno ayirrino gara ani afoommo. Dancha manna qarrissinanni; yoote nafarrara gubbo adhitinanni, gadadaammu yoo shokkishshinanni.

¹³Kunni baalu coyinni kainohunni, diru busha ikkinohura, egennaamu manchi sammi yaanno.

¹⁴Lubbotenni heedhinanni gede, dancha ikkinnina busha coye hassinoonte. Hatto ikkitiniro, yitinanninte gede, halaalenka Olantote Mootichi Kaaliiqi, ki'ne ledo hee'ranno.

¹⁵Busha coye hunne; dancha coye baxxe; yoote nafara baala halaale xeissinoonte. Miteekke Olantote Mootichi Kaaliiqi, gatinoha Israeelete manna mararannoha ikkannona.

¹⁶Kunnira Olantote Mootichi Kaaliiqi, «Dooggatenna nafara baalaho, woo woo yine wi'linanni raare macciishshinanni. Baatto loosi're galanno manni gatikkinni lassame daye, hamaaraancho kiirtannori ledo, reyino mannira wi'lanno.

¹⁷Woyine kaansanni darga baalaho wi'la ikkanno; kuni baalu ikkannohu, ani ki'ne qorichishate giddo'neenni hige saeemmo daafiraati. Konne coye coyi'reemmohu ani Kaaliiqaati» yii.

¹⁸Kaaliiqi barra, hasidhinannirira ki'nera aanne'e! Hakku barri tunsichoho ikkinnina, xawaabba di"ikkinona, konne barra mayira hasidhinanni?

¹⁹Hakku barri, doobbiichuwiinni gate fule, dagunchunni xaade, dagunchuwiinnino xooqe minira e"e, anga xarrate irkisi're hee'reenna, hamashshu qasino manchi gede assannoho.

²⁰Kaaliiqi yoo barri tunsichoho ikkinnina, xawaabba di"ikkanno. Hakku barri xawaabba anfannikkiha, dhi'mote tunsicho ikkanno.

²¹Kaaliiqi, «Diru ayyaanna'ne baala giwoommo; amma'note xaado'neno shagaggi'roommo.

²²Shilqote kakkalo'nenna, gidu fushshaate'neno diadheemmo'ne; mittimmate kakkalora shiqishshinannita, coontino saadano caaqqi yee dilaeemmo.

²³Faarso'ne canco anewiinni fafisse; maasinqo'ne luulo macciishsha dihasi'reemmo.

²⁴Hatteentenni halaalaancho yoo, buichote wayi gede, keeraanchimmano xoannokki xashshi gede lolakko.

²⁵«Israeelete manna! 40 diro wo'ma halallitte gobbara, massagummo'ne yannara, kakkalonna fushshaate abbitinoonnieni?

²⁶Ki'ne kayinni anga'nenni seekkidhinoonnitera, Sakuuti yinannihura jawu magani'neranna, Kewaani yinanni beeddakko misilera kumbuultinanni. Qafadantine Demaasiqote ka'aanni sa'inanni gede, asseemmo'ne yannara, insa duqqitine hadhinanni. Konne coye coyi'roommohu ani Olantote Mootichi Kaaliiqaati» yii.