Read Sidama_Qullaawa _Maxaafa AMOOTSI 6 Bible Online

AMOOTSI 6 - Sidama_Qullaawa _Maxaafa bible

AMOOTSI 6

¹Israeelete manni ayirrisanno'nerinna huucci'ranno'neri, Tsiyooni qawaaxxaamminna, Samaariyaho waajjitinikkinni heedhinanniri, egennantinoonni gashshaano, ki'nera aanne'e!

²Hanni Kaaline katama martine la'e; hakkiinnino sa'ine jawa Hamaati katamanna, Filisxeemootu katama Gaati dirre. Insa ki'newiinni woyyitannoni? Gashshootinsa ki'ne gashshootiwiinni roorannoni?

³Ki'ne, «Bushu barri rahe didaanno» yitine heddine barshe loossinanni.

⁴Daaniichu hinkonni seesiinsoonni daallasira goxxinanni; ge'reewu wilii'lenna, lalu siitta ittinanni; haranchu daallasi aana gangalattinanni.

⁵Daawiti gede addi addiha muuziiqu uduunne seekkidhine, maasinqotenni addi addiha mullicho sirba, sirbitinanni hagiidhitinanni.

⁶Woyinete xajje birilletenni ikkikkinni, gawatetenni agginanni. Lowo geeshsha waaga iibbado shitto buudhitinanni; Israeelete aana daggino baora kayinni, horonta didadillitinanni. Konne baala coye assitinanni daafira, ki'nera aanne'e!

⁷Kunnira, qafadame ha'rate, ki'ne umire ikkitinanni; hatte yannara la'ma'neranna, misingila'nera gawalo ikkanno.

⁸Wo'manka Dandaannohu Mootichu Kaaliiqi, «Israeelete manni naaxxa giwisinoe; qinaado minna'neno tiyyi'roommo. Kunnira katamanna, katamu giddo heedhannore baala, diinaho sayise eemmo» yee su'misinni xaarino.

⁹Mittu mini manni giddonni 10 manni gatirono, hakkurino reyitanno.

¹⁰Reyinohura muli fiixa ikkinohunna madaarannohu reeshsha mininni fushshe haa're ha'ranno. Hatte yannara mitto mine maaxame noo mancho woshshe, «Ate ledo gatinohu wolu nooni?» yee xa'manno. Manchuno, «Wolu gatinohu dino» yee dawaranno. Xa'mihuno, «Kaaliiqi su'ma gana dihasiissannonkena sammi yii» yaanno.

¹¹Kaaliiqi hajajonni jajjabba minna cancanantanno; shiimmaadda minnano butu butu yitanno.

¹²Farashsho kinnate aana gulunfannini? Handunni baara hawuurrannini? Ki'ne kayinni yoo qaraarote soorritinoonni; halaaleno kaphoho galchitinoonni.

¹³Lodebaari Katama qeeltinoonni daafira hagiidhitinoonni; «Qarinayimi Katamano wolqankenni amandoommo» yitine boollaqidhinoonni.

¹⁴Olantote Mootichi Kaaliiqi, «Israeelete manna, horrannoha wole gobba manna aana'ne kayisammoraati; insano aliyyeenni Hamaati e'nanni waalchinni kayisse, wodiidoonni Araba Lagichi geeshsha iillite qarrissanno'ne» yii.