Read Sidama_Qullaawa _Maxaafa AMOOTSI 8 Bible Online

AMOOTSI 8 - Sidama_Qullaawa _Maxaafa bible

AMOOTSI 8

¹Mootichu Kaaliiqi wole ajuujano leellishinoe. Anino le'ino laalo wo'mitino gimboola afoommo.

²Kaaliiqino, «Kuni la'anni noottohu maati?» yee xa'mie. Anino, «Le'ino laalo wo'mitino gimboola la"anni noommo» yoommo. Kaaliiqi qole, «Manni'ya Israeelete goofimarchu iillino.[3] Kunni ka'a insa qorichishummokkinni diagureemmo.

³Hakko barra, Qullaawu Mini faarso wi'late soorrantanno. Lowo manni reeshshi base baalate uwe leellanno; wi'linikkinni sammi yine base baalate tunge agurranni» yii.

⁴Ki'ne buxane kaddinanniri, gadadaamma gobbatenni huntinara hasidhinanniri baalu, konne coye macciishshe.

⁵Ki'ne, «Gidenke hirreemmo gede, tini Aganu Leellanno Ayyaanna, mayi rakke sa'a! Hiranna hidha dandiineemmo gede, kuni Fooliishshote Barri mayi rahe sa"a! Tini ayyaanna sa'oommero, gideho safaraasincho ajinshe, woxe naggi assine adhineemmohu baino; hanaaqu keenaasinchinni manna dongeemmohu gatino.

⁶Kura qamadete waagira hirreemmo; asale qola hoogino buxichonna, koattete woxe baata hooginoha, borojjimmate hidhineemmo» yitanno.

⁷Israeelete Hexxo ikkinohu Kaaliiqi su'misinni, «Ani Mootichu Kaaliiqi, insa loossino bunshe baala horonta dihaweemmo.

⁸Kunni coyira baatto shafantanno; hatte gobbara hee'rannohu baalu wi'lanno; Abbayi Wayi wo'me iima hige kae galagale dirrannonte gede, gobba gudisante tenqe yitanno.

⁹Arrishsho barru taalootira e'anno yanna dagganno; baatto barra tunsitanno gede asseemmo.

¹⁰Diru ayyaani hagiirri'ne dadilleho, faarso'neno wi'late soorreemmo. Afidhino beetto shiidhe wi'litannori gede, umo meexxitine xiddu uddano uddidhinanni gede asseemmo; hakko barri goofimarchi qaraaro ikkanno» yoommo.

¹¹Olantote Mootichi Kaaliiqi, «Baattote aanira hude abbeemmo yanna dagganno; hatti hudeno Kaaliiqi qaalite ikkinnina, sagalennitanna wayi goo'rota di"ikkitino.

¹²Mannu aliyyenni wodiidi geeshsha, soojjaatinni galchimi geeshsha, baattotenna baaru aana raataawanno; Kaaliiqi qaale afi'rate ka'a kawa dodamanno; ikkollana diafi'ranno.

¹³Hatte yannara, jawaante afi'rinohu aju labballinna meenti nafa, goo'rote batinyinni kainohunni daaqanno.

¹⁴‹Daani magano› woy ‹Bersaabehi magano› yitanni Samaariyu maganna battennite su'minni xaartannori ubbanno; ubbinowiinnino horonta dika'anno» yii.