Read Sidama_Qullaawa _Maxaafa ABIDIYU 1 Bible Online

ABIDIYU 1 - Sidama_Qullaawa _Maxaafa bible

ABIDIYU 1

¹Mootichu Kaaliiqi Edoomi daafira Abidiyu widoonni qole coyi'rino coyi kunninni aane nooho. Kaaliiqi sokkaanchosi daganniwa soye, «Edoomi qasate fuleemmo daafira, baalunku qixxaabbe!» yitanno sokka ninkeno macciishshinoommo.

²Kaaliiqi Edoomoota, «Kuneeti, dagate mereero ki'ne maa'ne gosa asseemmo'ne; lowo geeshsha mishantinoonnire ikkitinanni.

³Wodani'ne boo'na doggino'ne; ki'ne kaajjadu kinchi aana minnoonni katami giddo heedhinanni; galtinanni minino jajjabbu ilaali aana minaminoho. ‹Hee'neemmo darginni dirrisankera dandaannohu ayeti?› yitine boo'nitinoonni.

⁴Allamurchu gede iimira higgine buubbiniro nafa, beeddahete mereero teesso assidhinirono, hakkiichinni dirriseemmo'ne.

⁵«Mooraano woy mulqidhannori hashsha dagguro, ikkannonsa geeshshire calla adhitanno. Woyinete laalo gamba assi'ranno yannara, mannu dargaho xaro gatisanno; ki'ne kayinni diinna'ne co'o assite huntanno'ne.

⁶Ki'ne Eesawu sircho, kuneeti jiro'ne wo'manti saamantino.

⁷Jaalla'ne dogge amaddanno'ne; gobba'nenni fushshite shorritanno'ne; hexxitinoonni gosa diinoomunni ka'anno'ne. Ledo'ne ittanni keeshshitinori jaalla'ne woshshaado wortanno'ne; ‹Busullensa baala hiikkitu› yitanni qacifattanno'ne.

⁸«Hattenne yannara, Edoominni hayyoole'ne huneemmo; egennonsano nookki gede asseemmo.

⁹Temaani bareeddano waajjite huxidhanno. Edoomi noo manna baalanka shinanni» yii.

¹⁰Qeleno, «Yaiqoobi sircho ikkitinore roduuwa'ne, beebbatenni shitinoonni daafira shollitinanni; hegerera ba'ine gattinanni.

¹¹Diinnansa cufannansa cancante, jironsa baala saantu barra, ki'ne qaccete uurritine la'inoonni. Ki'ne Yerusaalamete jajja hixunni beeqqitinoriwiinni horonta diwoyyitinoonni.

¹²Yihudu gobbara heedhannore roduuwa'ne amadino qarrira, mayira hagiidhitini? Insara bao daggunsa barra mayira hisattini? Shette heedheenna mayira oso'litini?

¹³Qarrantenna mitii'mite heedheenna, jajjansa saamate manni'ya katami giddora mayira e'ini?

¹⁴Xooqqannore amadate, doogo xaaddannowa gaa'litine mayira agartini? Qarrantu barrano diinaho sayissine mayira uyitininsa?» yii.

¹⁵Lede, «Ani Kaaliiqi dagate yoo yeemmo barri mule no. Ki'ne Edoomi gosa, woloota assitinoonni beebba, ki'nerano iillitanno; assitinoonniri qole amadanno'ne.

¹⁶Manni'ya Qullaawu Ilaali'ya aana, qorichu finiincho cingiishshi'ranno gede assoommo. Qooxeessinsara noo daga kayinni, wo'manka woyite hakkiinni roorinoha, qaraarannoha qorichu finiincho cingiishshidheenna, higguwa hoonganninsa» yii.

¹⁷Baotenni gattannori Tsiyooni Ilaali aana heedhanno; Tsiyooni Ilaalino qullaawa ikkanno; Yaiqoobi ilama uminsa iqqa ragidhanno.

¹⁸Yaiqoobi ilama giirate gede, Yooseefi ilamano buwanu gede ikkite, Eesawu sircho galawimma giirtanno. Eesawu sirchi mittuno digatanno. Konne coyi'roommohu ani Kaaliiqaati.

¹⁹Yihudaho wodiidoonni noo gosa, Edoomi baatto adhitanno. Galchimi ilaallara lekkaalloonni noo baattora heedhanno gosa, Filisxeemete baatto amaddanno. Israeelootu Efireeminna Samaariyu gobba adhitanno; Biiniyaami ilamano Geleaadi baatto ragidhanno.

²⁰Qafadame hee'rannohu aliyye Israeele manni hige, Kana"aani baattora aliyyeenni noo katami Seraphitahu geeshsha noo gobba ragi'ranno. Sefaradiimi heedhannori, Yerusaalametenni qafadantinori, wodiidoonni noota Yihudu katamma adhitanno.

²¹Ani Kaaliiqi gatiseemmonsa gosa, Tsiyooni Ilaali aana heedhe, Edoomi gashshitanno. Gashshootuno ane Kaaliiqiha ikkanno.