Read Sidama_Qullaawa _Maxaafa YOONAASI 4 Bible Online

YOONAASI 4 - Sidama_Qullaawa _Maxaafa bible

YOONAASI 4

¹Yoonaasi kayinni kunni coyira hagiirraamo ikkinokki daafira, lowo geeshsha giirami.

²Kunnira, «Kaaliiqa, togo assattota ani balaxe gobba'yara hee're dicoyi'roommo? Atewiinni miliqe Terseesi ha'rate hedoommohuno kunniraati. Ati shaqqadonna maarattoha, hanqoho muddamattokkiha, bagamannokki baxilli wo'minohehanna hanqokkino agurte maaratto Magano ikkoottota afoommo.

³Xa Kaaliiqa'ya, anera hee'rantenni reyo woyyitannoena lubbo'ya haa'ri» yee huucci'ri.

⁴Kaaliiqino, «Halaalinta atera hanqa hasiissinoheni?» yiisi.

⁵Yoonaasino katamu giddonni fule ha're, soojjaati ragaanni mare mitto darga ofolli. Daaseno qasi're caaleho ofolle Nennewe aana daanno coye agari.

⁶Maganu Kaaliiqi, buqqiicho mu'rise, Yoonaasira caale ikkitaranna arrishshote iibbilli qarrisannosikki gede assate daaseho iimaanni daaddanno gede assi. Yoonaasino kunni coyinni lowo geeshsha hagiidhi.

⁷Ikkollana, layinki soodo Maganu da'muulcho tuge buqqiicho qasanno gede assi; iseno mooltu.

⁸Arrishsho fultuhu gedensaanni, Maganu giirtannota soojjaati bubbe soyi; arrishsho umo gantinosi daafira, Yoonaasi daaqi. Reyo hasi're, «Hee'rantenni anera reyo woyyitannoe» yii.

⁹Maganu kayinni, «Halaalinta buqqiichote daafira, hanqa hasiissannoheni?» yiisi. Yoonaasino, «Ee, addintanni hanqa hasiissannoe; isinni reyote geeshsha hanqa hasiissannoe» yii.

¹⁰Kaaliiqi qole, «Ati mitto barra mudhe, layinki barra mooltinotera, kaasi'roottokkiteranna daafuroottokkitera kageeshshi geeshsha dadillootto.

¹¹Bushanna dancha bade afinokkihu 120,000 manninna lowo saada heedhannoha, konne jawa Nennewe katama ani dimarareemmo?» yii.