Read Sidama_Qullaawa _Maxaafa KIIRO 16 Bible Online

KIIRO 16 - Sidama_Qullaawa _Maxaafa bible

KIIRO 16

¹Leewi ga'rehu Qehaati ilama ikkinohu Yisiaari beetti Qore, Roobeeli ga'renni qolte Eeliyaabi ooso Daataaninna Aberooni, hattono Feleeti beetti Ooni busha hedo amadde,

²egennantinore manna gashshitannore 250 manna anga adhite Muse aana ka'u.

³Musewanna Aarooniwa dagge, «Ki'ne quwa mayira sa'inanni? Mannu baalunku qullaawaho. Kaaliiqi ninke ledono noowe. Wo'munku coyira ki'ne calluwu albaanni mayira sa'inanni?» yitunsa.

⁴Museno konne coye macciishshanni hee'renni, alba hige gombisame Kaaliiqa huucci.

⁵Hakkunni gedensaanni, Qoreranna ledosi noorira baalaho, «Isiha ikkinohunna qullaawu ayetiro Kaaliiqi ga'a soodo badanno. Isiwa gamba yee soqqamara doorinohu ayetirono leellishannonke.

⁶Ga'a soodo atinna ledokkiri baalu hixaanunnihanna giirate baccicho haadhine amme.

⁷Baccichu aanano Kaaliiqi albaanni giiranna hixaana worre. Kaaliiqi doodhe baxxino manchino ayetiro hakkawoyite anfanni. Quwa sa'inoonniri ki'ne Leewi ilamaati» yii.

⁸Qoleno Muse Qorera, «Ki'ne Leewaawootu macciishshe!

⁹Israeelete Magani ki'ne wolootu Israeelootinni bade Kaaliiqi Dukkani giddo soqqantinara umisiwa gamba assi'netinna soqqantinannisi gede mannu albaanni uurrisino'neti ajju'neni?

¹⁰Atenna ledokki noore fiixakki Leewaawoota baala umisiwa gamba assino'ne. Ki'ne kayinni qeesimmano aanaho lexxitinara hasidhinoonni.

¹¹Atinna ledokkiri mimmito amaddine Aaroonira gunguma'ne Kaaliiqa yorate» yii.

¹²Hakkunni gedensaanni Muse Daataaninna Aberooni woshshiishi. Insa kayinni, «Ninke didangeemmo!

¹³Halalla shaattonkera malawunna ado lolakkanno gobbanni fushshoottonketi ajjeennahe tenne ninke aana moohattora hasi'ritto?

¹⁴Qolteno malawunna ado lolakkannota danchanna shaqqado gobba woy loosi'neemmowanna woyine kaasi'neemmowa diragisiisoottonke. Xaano dogattonkeraati? Horonta atewa didangeemmo!» yitu.

¹⁵Museno lowo geeshsha hanqe Kaaliiqira, «Kuni manni aannohe fushshaate adhitooti. Ani kunni manni giddonni mittono dimiicoommo; insawiinni wole agurranna harricho nafa diadhoommo» yii.

¹⁶Muse Qorera, «Atinna ledokki noori 250 manni ga'a Kaaliiqi albira shiqqe. Aaroonino hakkiicho noona.

¹⁷Mittu mittunku manchi hixaana aanaho wore baccichosi anga adhe Kaaliiqi albira dayona. Atinna Aaroonino bacce'ne adhitine shiqqe» yii.

¹⁸Kunnira, mittu mittunku baccichinsara giiranna hixaana worte Musenna Aarooni ledo Qullaawu Dukkani xullichira uurritu.

¹⁹Hakkunni gedensaanni Qore manna baalanka gamba asse Dukkanu xullichira uurri yannara, Kaaliiqi ayirrinyisi xawaabba mannu baalunkura leellishi.

²⁰Kaaliiqi Museranna Aaroonira,

²¹«Mitte hige co'o asse gudeemmona, ki'ne Israeelete manni baalunku mulinni ho'le» yiinsa.

²²Musenna Aarooni kayinni alba higge gombisante, «Mannu baalunkura lubbo worootto Magano! Mittu manchi loosino cubbira wo'munkura hanqatto?» yitanni woxarattu.

²³Hakkunni gedensaanni Kaaliiqi Musera,

²⁴«Manna, ‹Qore, Daataaninna Aberooni dukkaniwiinni ka'a shiqqi yiiyye› yiino yite kuli» yiisi.

²⁵Museno Israeelete roorroota hoodete adhe Daataaniwanna Aberooniwa mari.

²⁶Isino manna, «Kunni bushu manni dukkaniwiinni ka'a shiqqi yiiyye! Insare mittoreno kisidhinoonte. Hakkunni ka'a kayinni cubbinsanni insa ledo gooffinanni» yee qorophisiisi.

²⁷Kunnira mannu Qore, Daataaninna Aberooni dukkaniwiinni xeerti'ri. Daataaninna Aberooni meentinsanna oosonsa ledo fulte dukkannansa xullichira uurrite no.

²⁸Hatte yannara Muse mannaho, «Konne coye assammora Kaaliiqi soyinoetanna ani umi'yanni assoommoha ikkinokkita kunninni affinanni.

²⁹Kuni manni Kaaliiqi hanqinni ikkikkinni mannu reyanno garinni reyannoha ikkiro, ane Kaaliiqi disoyinoe.

³⁰Kaaliiqi anfe egenninoonnikkiha haaro coye abbeenna lubbotenni heedhe waamma e'anno gede baatto afoose fante insanna insare baala egemmituro, kuni manni Kaaliiqa mishinoha ikkinota hatte yannara affinanni» yiinsa.

³¹Muse konne coye coyi're ka"anni hee'reennanni Daataaninna Aberooni uurrite noo baatto dadhante,

³²insanna maatensa, Qorenna ledosi noo manna jajjinsa baalu ledo egemmitu.

³³Kuni manni noonsari baalunku ledo lubbotenni hee'renni waamma ei; baattono afoose gamba assidhu; insano ba'e gattu.

³⁴Hakkiicho noohu Israeelete manni baalu raarensa macciishshe, «Baatto ninkeno egemmitankeraatiwe!» yee xooqe bai.

³⁵Giirano Kaaliiqiwiinni dirrite hixaana giiranni nooha 250 manna ittu.

³⁶Kaaliiqi Musera,

³⁷«Hixaana worranni bacci qullaawahona, giirami manni mulinni hoole giddo noo buluulo xeertote masse hunanno gede Qeesichu Aarooni beettira Aliaazaarira kuli.

³⁸Kuni bacci qullaawa ikkinohu Kaaliiqi albira shiqinshi yannaraati. Kunnira, cubbo loose reyi manni bacce haa'ne shaashshine ganne kakkalote uduunnichira tu'nanni gede assi. Kunino Israeelete mannira qorophishiishsha ikkona» yii.

³⁹Qeesichu Aliaazaarino giirami manni abbinoha camote bacce gamba asse shaashshe gane kakkalote uduunnichira tu'nanni gede asse seekki.

⁴⁰Konne assinohuno Kaaliiqi Muse widoonni qole hajajino garinniiti. Kunino Aarooni sircho agurranna wolu ayino Kaaliiqi albira shiqe hixaana giirannokki gedenna, giwe sairo kayinni Qorenna ledosi manni gede ikkannota kulle Israeele qorophisiisateeti.

⁴¹Layinki soodo Israeelete manni baalunku, «Ki'ne Kaaliiqi manna shitinoonni» yee Museranna Aaroonira gungumi.

⁴²Mannu Musenna Aarooni boroorara gamba yee hee're caaqqi yee la"anno woyite, gomichu Dukkana guggushshe noota afi. Kaaliiqihu ayirrinyu xawaabbino leelli.

⁴³Musenna Aaroonino Qullaawu Dukkanira albaanni marte uurritu.

⁴⁴Kaaliiqi Musera,

⁴⁵«Konne manna mitte hige gude agureemmona ka'a shiqqi yiiyye» yiisi. Musenna Aarooni kayinni baattote aana gombisante Kaaliiqa huuccitu.

⁴⁶Muse Aaroonira, «Ateha hixaanu baccicho abbite kashilono kakkalote darginni haadhe wori. Kune Kaaliiqi hanqi dayino daafira qoomamu manna gudanni noona rahi. Kashilu aanano hixaana worte rakke marte kunni manni cubbo agursiisi» yii.

⁴⁷Aaroonino Muse yiinosinte gede hixaanu baccicho haa're rahe mannu mereerira mari. Isi maranno woyite qoomamu balaxe mannu giddora e"e no. Ikkirono Aarooni hixaana giire mannu cubbo agursiisi.

⁴⁸Isino noorinna reyitinori mereero uurri; qoomamuno ittisami.

⁴⁹Ikkollana Qore ledo reyino manna agurranna hatte yannara 14,700 manni qoomame reyino.

⁵⁰Qoomamu uurrihu gedensaanni, Aarooni Muse noowa Qullaawu Dukkani xullichiwa galagale higi.