Read Sidama_Qullaawa _Maxaafa KIIRO 17 Bible Online

KIIRO 17 - Sidama_Qullaawa _Maxaafa bible

KIIRO 17

¹Kaaliiqi Musera,

²«Israeele baalantera ga're ga'rete sooreeyye ikkitinori mitte mitte siqqo haadhe mitteenni 12 siqquwa abbitanno gede assi. Mitte mittente siqqo aana mittu mittu manchi su'ma borreessi.

³Mittu mittunku ga'rete sooreessira mitte mitte siqqo hee'ra hasiissanno daafira, Leewi ga're siqqo aana Aarooni su'ma borreessi.

⁴Tenne siqquwano ki'ne ledo xaadeemmowa Qullaawu Dukkani giddo Taabootu albaanni wori.

⁵Hatte yannara, ani dooreemmo manchi siqqo ciirtanno. Israeele ki'nera gunguntanno gunguma hakko gawa'litanno gede asseemmo» yii.

⁶Museno Israeelete konne coye kulinsa. Sooreeyyensano ga're ga'rete su'minni 12 siqquwa haadhe abbitu. Aarooni siqqono tenne siqquwa ledo no.

⁷Museno siqquwa haa're Dukkanu giddo Kaaliiqi Taabootira albaanni wori.

⁸Layinki soodo Muse Dukkanu giddora eanno woyite, Leewi ga're su'minni shiqinshoonniti Aarooni siqqo ciirte noota afi. La"anno woyite ciira calla ikkitukkinni gubbe daraarte kookete guma laalte no.

⁹Hakkunni gedensaanni Muse siqquwa baalanta Kaaliiqi albinni haa're abbe Israeelete leellishi. Siqquwa la'uhu gedensaanni mittu mittunku umi umisi siqqo adhi.

¹⁰Kaaliiqi Musera, «Kuni haxawarru Israeelete manni anera gunguma agura giwiro, reyannota qorophisiisate Aarooni siqqo galagalchite Taabootu albaanni massite wori» yiisi.

¹¹Museno Kaaliiqi yiino gede assi.

¹²Hakkunni gedensaanni Israeele Musera, «Kune baalunku reyine goonfammoraati!

¹³Kaaliiqi Dukkaniwa shiqqi yaannohu baalu reyaraati. Ninke baalunku goonfammoraati!» yitu.