Read Sidama_Qullaawa _Maxaafa KIIRO 2 Bible Online

KIIRO 2 - Sidama_Qullaawa _Maxaafa bible

KIIRO 2

¹Kaaliiqi Museranna Aaroonira,

²«Israeelootu marte baxxisidhanno dargi baalaho mittu mittunku manchi gaamo bande anfanni gede qachinsa ga're ga'rensa sumudi hunda Qullaawu Dukkaniwinni shiimare fafe hee'rona.

³«Yihudu ga'renna ledonsa hadhannori Qullaawu Dukkanira soojjaatoonni uminsa sumudi mule baxxisidhona; Yihudunnihura 74,600 mannira addi addinni bandeenna Aminaadaabi beetti Nahisooni albisanno.

⁵Yihudu ga'rera mitto widoonni ha'rannohura Yisaakoori ga'rehura 54,400 mannira Tsuaari beetti Naatinaeeli albisanno.

⁷Wole widoonni ha'rannohura Zaabilooni ga'rehura 57,400 mannira Helooni beetti Eeliyaabi albisanno.

⁹Kunni garinni Yihudu ga're albaanni hadhanna mitteenni 186,400 manni ha'ranno.

¹⁰«Roobeeli ga'renna ledonsa hadhannori sasenti ga're sumudi sumudinsa mule baxxisidhanno; mitte mittente ga'reranna boosaallo boosaalloho albisoota ikkitinori su'mi kunninni aane nooho: Roobeeli ga'renni Shedeuuri beetti Elitsuuri 46,500 mannira albisanno.

¹²Roobeeli ga'rera mitto widoonni hee'rannohura Simiooni ga'rehura 59,300 mannira Tsurishaadayi beetti Shelumieeli albisanno.

¹⁴Roobeeli ga'rera wole widoonni noohura Gaadi ga'rehura 45,650 mannira Deueeli beetti Eeliyaasaafi albisanno.

¹⁶Kunni garinni Roobeeli ga're layinkita ikkite albaanni hadhanna 151,450 manni gaadanno.

¹⁷«Lame albiidi gaamonna lame badhiidi gaamo mereero Leewi ga're Qullaawa Dukkana dukke hadhanno. Mitte mittenti gaamo qachansa bande anfanni gede sumudansa anga adhite doyicho doyichonsa garinni hadhanno.

¹⁸«Efireemi ga'renna ledonsa hadhannori Qullaawu Dukkanira galchimi ragaanni umi uminsa sumudi mule baxxisidhanno. Amihuudi beetti Elishamai albisanna Efireemi ga're ledo 40,500 manni ha'ranno.

²⁰Efireemi ga'rera mitto widoonni Minaase ga'rehura 32,200 mannira Phedaatsuuri beetti Gemaalieeli albisanno.

²²Wole widoonni Biiniyaami ga'rehura 35,400 mannira Gidiooni beetti Abidaani albisanno.

²⁴Kunni garinni Efireemi ga're sayikkita ikkiteenna mitteenni 108,100 manni gaadanno.

²⁵«Daani ga'renna ledonsa hadhannori Qullaawu Dukkanira aliyyeenni uminsa sumudi mule baxxisidhanno. Daani ga'rehura 62,700 mannira Amishaadayi beetti Ahiezeeri albisanno.

²⁷Daani ga'rera mitto widoonni noohura Aseeri ga'rehura 41,500 mannira Okiraani beetti Faagieeli albisanno.

²⁹Wole widoonni noohura Niftaalemi ga'rehura 53,400 mannira Enaani beetti Ahiira albisanno.

³¹Kunni garinni Daani ga're shoolkita ikkiteenna mitteenni 157,600 manni gaadanno. Gaamo gaamonsa garinni insa gede'nite hadhanno.

³²«Ga're ga'rentenninna gaamo gaamontenni kiirre borreessinoonni Israeele mitteenni 603,550 mannaati.

³³Leewaawoota kayinni Kaaliiqi Musera hajajinonte gede wolootu Israeelete manni ledo dikiirroonni» yii.

³⁴Kunni garinni Israeelete manni Kaaliiqi Musera hajajinore baala wonshi. Mitte mittenti ga're sumudi sumudinsa mule baxxisidhu. Mittu mittunku boosaalli boosaallisi garinni gaammeenna ha'ri.