Read Sidama_Qullaawa _Maxaafa KIIRO 22 Bible Online

KIIRO 22 - Sidama_Qullaawa _Maxaafa bible

KIIRO 22

¹Israeelete manni Moaabi xawo tayise sae ha're Yordaanoosi Wayira soojjaatoonni Iyyaarkora albaanni baxxisi'ri.

²Hatte yannara Moaabi Moote Sefoori beetti Baalaaqi, Israeele Amooraawoota assitinota macciishshi.

³Israeelete manni kiiro bati'rino daafira, Moaabi manni lowo geeshsha waajji.

⁴Moaabootu Midiyaamootu gashshaanora, «Kuni lowo manni, hayisso mucuqqi asse itanno booti gede, qooxeessinkera noore baala gudanno» yitu. Kunnira, Moaabi Moote Baalaaqi,

⁵Efiraaxisi Wayi gama ilaminoha Pitoori Katamira hee'rannoha Bioori beetto Beleaami woshshitannosirira, «Kuneeti baatto wo'mino manni Gibitsetenni fule daye gobba'ya mule baxxisi're no.

⁶Kuni manni ninkera wolqankera aleenni ikkinohona, eeggakkiitina dagge rumi. Kunni garinni miteekkine qeelle gobbate aaninni hoo'lineeemmoha ikkannona. Ati maassi'roottohu maassamannota, rumoottohu kayinni rumamannota afoommo» yii.

⁷Moaabinna Midiyaami gashshaano Israeele rumeenna baantannisi woxe haadhe Beleaamiwa marte Baalaaqi yiinoreno kultusi.

⁸Beleaamino, «Konne hashsha konniicho galtineenna Kaaliiqi yaannoere ga'a soodo kuleemmo'ne» yiinsa. Moaabi gashshaanono hakkiicho keeshshitu.

⁹Maganuno Beleaamiwa daye, «Kuri ate ledo noori ayeooti?» yee xa'misi.

¹⁰Beleaamino, «Moaabi moote Baalaaqi anewa soyinoreeti.

¹¹Insano, ‹Gibitsetenni fulino manni baatto wo'mino. Konne manna dagge rumi. Miteekke hakkunni gedensaanni qase gobba'yanni fushshi'reemmoha ikkannona› yitine kulle yeenna dagginoreeti» yii.

¹²Maganu qole Beleaami, «Insa ledo hadhooti. Israeelete manni maassaminohona runtooti» yiisi.

¹³Beleaami soodo gute Baalaaqi ledo gashshaanora, «Ledo'ne ha'reemmokki gede Kaaliiqi hoolinoena ki'ne gobba'ne hadhe» yiinsa.

¹⁴Insano galagalte Baalaaqiwa marte, Beleaami ledonsa daa giwinota kultusi.

¹⁵Hakkunni gedensaanni Baalaaqi albirinni roore haammatanna ayirradda ikkitino gashshaano soyi.

¹⁶Insano Beleaamiwa marte, «Baalaaqi mitto coye kullammohera soyinonke. Isino, ‹Anewa daattota hoolannoheri mitturino hee'roonke.

¹⁷Galatakki seekke qoleemmohe; yiittore baala asseemmohe. Kunnira dagge konne manna rumie› yiino» yite kultusi.

¹⁸Beleaami kayinni, «Wole agurranna Baalaaqi birrunna culku wo'minoha mootete mine uyiero nafa, Magani'ya Kaaliiqi hajajo sae mitto coyeno diasseemmo.

¹⁹Hanni ikkirono Kaaliiqi yaannoere afeemmona, ki'neno ku'uri gede techo konniicho galle» yiinsa.

²⁰Hakko hashshanni Maganu Beleaamiwa daye, «Kuni manni haa're ha'rahera dayinoha ikki woyite, ledonsa ha'ri. Ha'rittorolla kayinni ani yoommore calla assi» yiisi.

²¹Beleaami gute kae, harrichosi koodhe Moaabi gashshaano ledo ha'ri.

²²Ikkollana Beleaami ha'ranni hee'reenna Maganu lowo geeshsha hanqi. Beleaami 2 soqqamaasinesi hoodete adhe harrichosi gulufe ha'ranni no. Kaaliiqi sokkaasinchino ittisasira fule doogote uurri.

²³Harricho, Kaaliiqi sokkaasinchi bise amade doogote uurre nooha affe doogote aaninni wirri yite loosu giddora e'u. Beleaami kayinni doogote widira higganno gede ganise.

²⁴Sokkaasinchuno lamu waatira woyinete kaashsho kayinse kinchu huxxa huxxinoonnitera ruukkado doogora sae uurri.

²⁵Harricho Kaaliiqi sokkaasincho affe, kinchu huxxiwa gamba yite Beleaami lekka huxxu ledo xaadisse uurritu. Beleaami xaano lede ganise.

²⁶Kaaliiqi sokkaasinchi alba hige ha're, ka'anna kawa hinganniwa afidhinokkitera ruukkado farora mare uurri.

²⁷Harrichono Kaaliiqi sokkaasincho affe gadhe gibbu. Beleaami lowo geeshsha hanqe siqqichotenni ganise.

²⁸Hakkunni gedensaanni Kaaliiqi coyidhanno gede harrichote afoo fanise. Iseno Beleaamira, «Ma"asseennaheeti, togo assite 3 higge ganittoehu?» yitusi.

²⁹Beleaamino harrichote daware, «Godo'loottae daafiraatiwe! Anga'ya bise heedhoommero dargaho qocci asse agureemmohehu gatino» yiise.

³⁰Harrichono qolte, «Ani ate harricho di"ikkoomma? Techo geeshsha diati guluffannae noomma? Kunni albaanni togo ikke egennoommani?» yitusi. Isino, «Horonta togo ikkite diegennootta» yiise.

³¹Hatte yannara Kaaliiqi Beleaamira ille faneennasi, bise amade doogote uurre noo sokkaasincho afi. Isino umo heeshshi yee alba hige diriiri.

³²Kaaliiqi sokkaasinchino, «Harrichokki togo assite 3 higge mayira ganittose? Hadhanni nootto doogo aneta ikkitinokki daafira ittisammohera dayommo.

³³Harricho ane affe 3 higge shawwu yitino. Hatto ikka hooggoommero ate shee ise calla gatise hoogoommo» yii.

³⁴Beleaamino Kaaliiqi sokkaasinchira, «Cubbo loosoommo; ane ittisattora doogote uurrite noottota diafoommo; xaano ati ha'reemmota baxoottokkiha ikkiro agure higeemmo» yiisi.

³⁵Kaaliiqi sokkaasinchi Beleaamira, «Ha'rate woyite ha'ri. Kayinnilla ani kuleemmohere calla coyi'ri» yiisi. Beleaamino Baalaaqi soyino gashshaasine ledo ha'ri.

³⁶Moote Baalaaqi, Beleaami daanni noota macciishshe haa'rasira gobbasira Moaabi qaccera Arnooni Wayi mule noo Katama Eeri kae mari.

³⁷Baalaaqi Beleaami, «Umo soqqummo woyite mayira daa giwittoe? Halaalinta galatakki qole afeemmokkiha laweennaheeti?» yiisi.

³⁸Beleaamino, «Kune xa dayommowe! Ikkollana ani umi'yanni coyi'ra didandeemmo. Kaaliiqi coyi'ri yiinoere calla coyi'reemmo» yee dawarisi.

³⁹Hakkunni gedensaanni Beleaami Baalaaqi ledo Qiriyaati Hutsooti yinanni katama ha'ri.

⁴⁰Baalaaqino hakkiicho lalonna ge'reewo gorre, gama maala Beleaamiranna ledosi gashshaanora uyi.

⁴¹Layinki soodo guto Baalaaqi gamisa Israeelete manna la"anno gede Baleaami haa're Bamooti-Beaali yinanni gaara fushshisi.