Read Sidama_Qullaawa _Maxaafa KIIRO 28 Bible Online

KIIRO 28 - Sidama_Qullaawa _Maxaafa bible

KIIRO 28

¹Kaaliiqi Musera,

²«Israeelete mannira kunninni aante noo hajajo uyinsa: Giiratenni rainsoonni sagale anera su'niitannoe gede assitine yanna yannantenni shiqishshe"e.

³«Qolteno, anera shilqote kakkalora mittu dirire muso afi'rinokkire 2 ge'reewu wilii'le barru barrunkunni shiqishshe.

⁴Mitto soodo, mitto hawarro shiqishshe.

⁵Mittu mittunku wilii'lichi ledo mitte litire ikkitannota xalala ejersu zayitenni liinsoonnita 2 kiilo ikkitanno bullee gidu fushshaatira shiqishshe.

⁶Kuni fushshaati wo'manka woyite gudinse giirranniho. Konne fushshaateno balanxe ane Kaaliiqira Siina Ilaalira su'naannoha assine shiqinshoonni.

⁷Mittu mittunku wilii'lichi ledo agattote fushshaatira mitte litire woyinete xajje abbitine kakkalote darga ane Kaaliiqira dunne.

⁸Hawarro shiqinshanniha layinki wilii'licho soodo shiqinshanni fushshaati garinni shiqishshe. Kuni lamunku fushshaati ane Kaaliiqira su'naannoha ikkanno yiinsa.

⁹«Qoleno Fooliishshote Barra, mittu dirire 2 muso afi'rinokkire ge'reewu wilii'le ejersu zayitenni liinsoonnita 2 kiilo bullee agattote fushshaati ledo shiqishshe.

¹⁰Konne fushshaate barru barrunkunni shiqinshanni fushshaati sagalennihunna agattonnihu ledo Fooliishshote Barra wo'manka woyite shiqishshe.

¹¹«Aganaho umi barra, muso afidhinokkire 2 middo, 1 ge'rechu goconna mittu dirire 7 ge'reewu wilii'le[9] shilqote kakkalo assitine ane Kaaliiqira shiqishshe.

¹²Mittu mittunku middichi ledo gidu fushshaatira ikkitannota sase sase kiilo liinsoonni bullee shiqishshe. Ge'rechu goci ledo liinsoonnita 2 kiilo bullee shiqishshe.

¹³Mittu mittunku ge'rechu wilii'lichi ledono gidu fushshaatira ikkitannota 1 kiilo liinsoonni bullee shiqishshe. Tinino ane Kaaliiqira su'niitannota shilqote kakkalo ikkitanno.

¹⁴Mittu mittunku middichi ledo agattote fushshaatira 2 litire, ge'rechu goci ledo 1 litirenna darate, mittu mittunku ge'rechu wilii'lichi ledono 1 litire ikkitannota woyinete xajje shiqishshe. Tenne kakkalo baalanka diro aganu leellihunni umi umi barra shiqishshinanni.

¹⁵Agattote fushshaati ledo, wo'ma woyite shiqishshinannita shilqote kakkalo agurranna 1 meichu goco cubbo agursiisate kakkalo assitine ane Kaaliiqira shiqishshe.

¹⁶«Umi agani eihunni tonaa shoolki barra ane Kaaliiqiha Mararrote Ayyaana ayirrisse.

¹⁷Kunni aganinni tonaa ontikki barri ayyaana ikkanno. Mitte lamala wo'ma shiishinokki tima itte.

¹⁸Umi barra magansi'rate xaadde; hakko barra mittoreno loossinoonte.

¹⁹Muso afidhinokkire 2 middo, 1 ge'rechu goconna mittu dirire 7 ge'reewu wilii'le shilqote kakkalo assitine ane Kaaliiqira shiqishshe.

²⁰Mittu mittunku middichi ledo gidu fushshaatira ikkitannota zayitetenni liinsoonnita 3 kiilo bulleenna ge'rechu goci ledono lame lame kiilo bullee shiqishshe.

²¹Lamalunku ge'reewu wilii'li ledo mitte mitte kiilo bullee shiqishshe.

²²Hakkunni aanano cubbi'ne aguramanno'ne gede 1 meichu goco cubbo agursiisate kakkalora shiqishshe.

²³Kore wo'manka woyite soodo soodo shiqishshinanni kakkalo shilqonnite ledo shiqishshe.

²⁴Tenne kakkalono ane Kaaliiqira su'niitanno garinni lamalanka barra sagalete fushshaate assitine shiqishshe. Tini barru barrunkunni agattote fushshaati ledo shiqishshinanni kakkalo shilqonnite ledo shiqqannote.

²⁵Lamalki barra magansi'rate xaadde. Hakko barra mittoreno loossinoonte.

²⁶«Gide Gamba Assinanni Ayyaanira umi laalcho ane Kaaliiqira fushshaate assitine shiqishshe. Hakko barra magansi'rate gamba yiiyye; mittoreno loossinoonte.

²⁷2 middo, 1 ge'rechu goconna mittu dirire 7 ge'reewu wilii'le ane Kaaliiqira su'niitannota shilqote kakkalo assitine shiqishshe.

²⁸Mittu mittunku middichi ledo gidu fushshaatira zayitetenni liinsoonnita 3 kiilo bulleenna ge'rechu goci ledo 2 kiilo bullee shiqishshe.

²⁹Mittu mittunku ge'rechu wilii'lichi ledo mitte mitte kiilo zayitetenni liinsoonni bullee shiqishshe.

³⁰Hakkunni aanano cubbo agursiisate ikkanno'neha 1 meichu goco shiqishshe.

³¹Gidu fushshaati ledo barru barrunku shiqishshinanni kakkalo shilqonnite ledo agattote fushshaateno shiqishshe. Shiqishshinanni saada muso afidhinokkita ikkansa buuxxe.