Read Sidama_Qullaawa _Maxaafa KIIRO 3 Bible Online

KIIRO 3 - Sidama_Qullaawa _Maxaafa bible

KIIRO 3

¹Kaaliiqi Muse Siina Ilaalira hasaawisi waro, Aaroonitinna Muse ilama kunninni aante noote:

²Aaroonira 4 labballi ooso noosi. Bayiru Naadaabiiti; isinni aantinori Abihuuti, Aliaazaariitinna Itaamaariiti.

³Insa baalanka qeesimmate soqqanshora bande buurri.

⁴Naadaabinna Abihu kayinni Siina Halallittera qullaawa ikkitinokki giiranni Kaaliiqira kakkalo shiqishshino daafira qoomantino; oosono di"iltino. Kunnira, Aarooni lubbotenni noo geeshsha Aliaazaarinna Itaamaari callu qeesimmatenni soqqantanni heedhu.

⁵Kaaliiqino Musera,

⁶«Aarooni kaa'litanno gede Leewi ga're abbite albasiinni uurrisi.

⁷Qullaawu Dukkani giddo isiranna mannaho hasiisanno looso baalanka loossona.

⁸Qullaawu Dukkani giddo loonsanni loosonna Israeelete mannira assate hasiisanno coye baalanka assitanni Dukkana agartona.

⁹Leewaawoota Aarooniranna oososira soqqantanno gede Israeelete manniwiinni badde isira uyi.

¹⁰Qeesimmate soqqanshora Aarooninna oososi wori; insa agurranna Dukkanunniwa shiqqi yaannohu reyo» yii.

¹¹Kaaliiqi lede Musera,

¹²«Umo ilamannohu labbaahu baalu darga Israeelete giddonni Leewaawoota adhoommo; kunni daafira Leewaawootu anereeti.

¹³Gibitsenniha umo ilaminohanna umo qalaminoha baala shuummo waro, Israeelete gobbara umo ilamannohanna umo qalamannoha baala umi'yara baxxoommo. Xa kayinni hakkuri darga Leewaawoota doodhoommo; insano anere ikkito. Ani Kaaliiqaati» yiisi.

¹⁴Kaaliiqi Musera halallitte gobbara Siina,

¹⁵«Leewaawoota mini mininsanna boosaalli boosaallinsa garinni mittu aganirenna hakkuyi alire labballo baala kiiri» yiisi.

¹⁶Museno Kaaliiqi hajajinosi garinni kunninni aante noore kiiri.

¹⁷Leewira 3 labballi ooso noosi. Insano: Gershooni, Qehaatiitinna Meraariiti.

¹⁸Gershooni ilama Libinanna Shimi"i yinanni.

¹⁹Qehaati ilama Amiraami, Yitsihaari, Kebirooniitinna Uzieeliiti.

²⁰Meraari ilama Mahiliitinna Muushiiti. Insano su'mi su'minsa garinni Leewaawootaho boosaallu boosaallu annuwate.

²¹Libinanna Shimi"i boosaalli Gershooni ilamaati.

²²Gershooni ilamanni kiirroonniri mittu aganirinna hakkuyi ali labballi mitteenni 7,500 mannaati.

²³Kuni boosaalli Dukkanaho badheenni galchimi ragaanni dukka'ne hee'ranno.

²⁴Insa roorrichi Laeeli beetti Eeliyaasaafiiti.

²⁵Insa Qullaawa Dukkana, Dukkanu aanaanni dimbanniha, Dukkanu waalchira noo dukko,

²⁶Dukkanunna kakkalote uduunni gaangaawira noo dukkuwa, e'nanni waalchi dukkonna siibba baala agartanno.

²⁷Amiraami, Yitsihaari, Kebirooninna Uzieeli ilama Qehaati boosaallooti.

²⁸Tenne ilama giddonni kiirroonniri mittu aganirinna hakkuyi ali labballi mitteenni 8,600 mannaati. Insa Qullaawa Dukkana agartannoreeti.

²⁹Qehaati ilama Dukkanaho wodiidi ragaanni dukka'nite heedhanno.

³⁰Qehaati ilamara sooreessu Uzieeli beetti Elitsaafaaniiti.

³¹Insa Taaboota, xarapheezza, caabbicho worranni uduunnicho, kakkalote uduunne, Qullaawu Dukkani uduunne baala, Qullaawu Holgi waalchi dukkonna ledo noo uduunne baala agartanno.

³²Leewaawootu roorrichi qeesichu Aarooni beetti Aliaazaariiti. Isi Qullaawa Mine agartannore hajajanno.

³³Mahilinna Muushi boosaalli Meraari ilamaati.

³⁴Tenne ilamanni kiirroonniri mittu aganirinna hakkuyi ali labballi baalu 6,200 mannaati.

³⁵Meraari ilama sooreessi Abieeli beetti Tsurieeliiti. Insa Qullaawu Dukkani mule aliyye ragaanni dukka'nite heedhanno.

³⁶Qullaawu Dukkani xiyyo, waawanna, dereersuwa, tuuqqa lekkuwansa ledo, uduunne baala agartanno.

³⁷Qolteno huxxu gaangaawira noo tuuqqa lekkuwansa ledo, ciffanna siibba agartanno.

³⁸Muse, Aarooninna oososi soojjaati ragaanni Qullaawu Dukkanira albaanni heedhanno. Insa Qullaawa Darga Israeelete manni daafira assinanni coye baala towattanno. Insa agurranna, hakkiira shiqqi yaannohu wolu manni kayinni reyanno.

³⁹Kaaliiqi hajajino garinni, Musenna Aarooni boosaalli boosaallinsa garinni kiirtinori mittu aganinna hakkuyi ali labballi mitteenni 22,000 mannaati.

⁴⁰Kaaliiqi Musera, «Umo ilantinore Israeelennita labballi ooso mittu aganirenna hakkuyi alire su'mi su'minsa garinni kiirte borreessi.

⁴¹Insa darga Leewaawoota doodhoommo; qoleno umo qalantino saada Israeelennite darga Leewaawootu saada doodhoommo. Ani Kaaliiqaati» yii.

⁴²Museno Kaaliiqi hajajinonte gede Israeelenniha bayira bayira beetto kiiri.

⁴³Kiirroonniri mitto agananna hakkuyira aleenni ikkinonsari umo ilantino labballi baalu 22,273 mannaati.

⁴⁴Kaaliiqi Muse,

⁴⁵«Umo ilantanno ooso Israeelennite darga, Leewaawoota anera badie. Saadansano umo qalantanno saada Israeelennite darga anera badie. Leewaawootu anereeti. Ani Kaaliiqaati.

⁴⁶Umo ilantinori Israeelenniti labballi ooso Leewaawootuwiinni 273 kiironni roortanno daafira, gattinore woxunni wodi.

⁴⁷Mittu mittunkura Qullaawu Mini keenaasinchi garinni onte onte kinchu birra baati.

⁴⁸Woxeno Aarooniranna oososira uyi» yiisi.

⁴⁹Museno Leewaawootunni wonde gatinsoonniri 273 manniwiinni gamba assinoonni woxe haa'ri.

⁵⁰Wodote haa'noonni woxi mitteenni 1,365 kinchu birraati.

⁵¹Kaaliiqi hajajino garinni Muse wodote birra Aarooniranna oososira uyi.