Read Sidama_Qullaawa _Maxaafa KIIRO 31 Bible Online

KIIRO 31 - Sidama_Qullaawa _Maxaafa bible

KIIRO 31

²«Israeelete aana assitino beebbara Midiyaamoota rabbisi. Hakkunni gedensaanni reyatto» yiisi.

³Museno mannaho, «Kaaliiqi aana assitino saora Midiyaamoota rabbisate olaho qixxaabbe.

⁴Mitte mittente Israeelete ga're giddonni mitto mitto kume manna olaho sokke» yiinsa.

⁵Kunnira mitte mittente ga'renni mitto mitto kume fushshineenna mitteenni 12,000 manni olaho qixxaawi.

⁶Museno insa ledo qeesichu Aliaazaari beetto Finihaasi olaho soyi. Finihaasi Qullaawu Dukkani uduunnenna mitto coye malaatisate ufuunfanniha buudu xurumba anga haa're no.

⁷Insano Kaaliiqi Musera hajajino garinni Midiyaamootu ledo olante labballo baala shite guddu.

⁸Ontenta Midiyaamootu mootoolla Eewi, Reqeemi, Tsuuri, Huurinna Rebaino mitteenni shitu. Bioori beetto Beleaamino shitu.

⁹Midiyaamootu meentonna qaaqquullensano qafaddu; lalo, me"enna ge'reewo baala horritu; jironsa baalano adhitu.

¹⁰Midiyaamootu katammanna qachansa baala giirtu.

¹¹Qafaddino manna, horritino saadanna adhitino jajja baala haadhe,

¹²Iyyaarkora widoonni Yordaanoosi Wayira soojjaatoonni Moaabi gobbara nooriwa Musewa, qeesichu Aliaazaariwanna Israeelete manni baalunkuwa daggu.

¹³Muse, qeesichu Aliaazaarinna Israeelete sooreeyye baalu doogora shiqqunsa.

¹⁴Muse kayinni oluwiinni higginorira xibbunna kumu roorrootira hanqe,

¹⁵«Meento mayira shaa hooggini?

¹⁶Fegoori hee'neenna Beleaami amaale adhe Israeele Kaaliiqiwiinni huninorinna mannu qoomamanno gede assinori di"insaati?

¹⁷Xa labballi oosonna meento baalanka shitine gudde.

¹⁸Mine assi'rinokki seenne kayinni umi'nera gatisidhe.

¹⁹Ki'ne giddo manna shiinohu woy reyinoha kisinohu baalu qachu gobbaanni 7 barra keeshshona. Sayikkinna lamalki barra umo'nenna qafaddinoonnire keereense.

²⁰Qoltineno imaana, gogunni woy meu ordanni woy haqqunni seekkinoonnire baala keereense» yiinsa.

²¹Hakkunni gedensaanni qeesichu Aliaazaari olaho hadhe daggino gaaddora, «Kaaliiqi Musera uyino seeri konneeti:

²²Culka, birra, camo, siwiila, qorqorro, irsaasenna

²³giira ittannokkire baala giiratenni daashshitine xalashshitine keereensate waa aanaho wixxe. Giira dandaannokki uduunne baalano hakko wayinni keereense.

²⁴Keeraa'mitinanni gede lamalki barra imaana'ne hayishshidhe. Hakkunni gedensaanni qachu giddora ea dandiitinanni» yiinsa.

²⁵Kaaliiqi Musera,

²⁶«Ati, qeesichu Aliaazaarinna Israeelete manni baalunku sooreeyye gamba yitine qafadame dayino mannanna saada kiirre.

²⁷Qafadono lamewa beekkine olante daggino gaaddoranna gatino mannira beekke.

²⁸Gaaddote beehachi giddonni manna ikko lalo, harre, ge'reewo woy me"e ontu xibbi giddonni mitto Kaaliiqira fushshaate assitine uuyye.

²⁹Konne fushshaateno beehachinsa aaninni haadhe ane Kaaliiqira addi fushshaate assite iillannoeha qeesichu Aliaazaarira uyi.

³⁰Israeelete oottohu giddonnino manna ikko lalo, harre, ge'reewo woy me"e woy wole saada ontawu giddonni mitto mitto doorte, aneha Qullaawa Dukkana annimmatenni agartannorira Leewaawootaho uyi» yiisi.

³¹Musenna qeesichu Aliaazaari Kaaliiqi hajajino gede assitu.

³²Qafadde abbitinohu giddonni gatinohu ge'reewu 675,000,

³³lalu 72,000,

³⁴harre 61,000,

³⁵macca qasi'rinokki seennu 32,000.

³⁶Olaho hadhe daggino gaaddo beehachi, 337,500 ge'reewooti.

³⁷Kuri giddonni Kaaliiqira 675 uyinoonni.

³⁸Lalu 36,000. Kuri giddonni Kaaliiqira 72 uyinoonni.

³⁹Harre 30,500. Kuri giddonni 61 Kaaliiqira uyinoonni.

⁴⁰Mannu 16,000. Insa giddonni Kaaliiqira 32 manna uyinoonni.

⁴¹Museno Kaaliiqi hajajinosi garinni Kaaliiqi beehacho Aliaazaarira uyi.

⁴²Muse gaadde dagginoriwiinni haa're wolootaho uyino beehachi giddonni,

⁴⁷Israeelete beehachi giddonni Muse Kaaliiqi hajajinosi garinni ontawu giddonni mitte beettonna saadate giddonnino mitto doore Kaaliiqi Dukkana annimmatenni agartannorira Leewaawootaho uyi.

⁴⁸Hakkunni gedensaanni olantote aana shoommoonniri kumunna xibbu roorrooti Musewa dagge,

⁴⁹«Ninke soqqamaanokki anganke noo gaaddo kiirroommo; giddonsanni mittuno dixeino.

⁵⁰Ninkeno agare gatisinonke daafira culku erra, lekkate gumenna angate gume, qubbete cuu'a, maccate butichuwanna goowu irra Kaaliiqira fushshaate assine abbi'noommo» yitu.

⁵¹Musenna Aliaazaari irru gede assine seekkinoonni culka baala anganni haadhunsa.

⁵²Musenna Aliaazaari fushshaatimma uyineenna kumunna xibbu roorrooti anganni haadhe Kaaliiqira shiqishshino culki 200 kiilo ikkanno.

⁵³Gaaddo kayinni iillinonsaha uminsara gaitisidhu.

⁵⁴Musenna Aliaazaari culka kumunna xibbu roorrooti anganni haadhe Israeelete qaaggo ikkanno gede abbite Kaaliiqi albaanni Qullaawu Dukkani giddo wortu.