Read Sidama_Qullaawa _Maxaafa KIIRO 4 Bible Online

KIIRO 4 - Sidama_Qullaawa _Maxaafa bible

KIIRO 4

¹Kaaliiqi Museranna Aaroonira,

²«Leewaawootu ga'renni shoolenta Qehaati ilama boosaalli boosaallinsanninna mini mininsa garinni kiirre.

³Qullaawu Dukkani giddo soqqama dandiitannore 30-50 diri geeshsha ikkannonsare labballo baala kiirre.

⁴«Insa Qullaawu Dukkani giddo nooha qullaawa uduunne towattanno.

⁵Mannu noowiinni ha'rara ka"anno woyite, Aarooninna oososi Dukkanu giddora e'e Taaboota golloonni Dukko dirrisse Taaboota isenni xaaxxona.

⁶Aanaanni qolte cuukkinoonni itiille dibbe bule hocco iimaho leddona. Dawaayyeno base basensara wortona.

⁷«Qullaawa Tima worranni xarapheezzira aanaanni bule hocco dibbona. Xiltuwa, mooqquwa, ifichuwa, anganni fushshaate worranni maaqquwa isi aana wortona. Timuno wo'manka woyite aanaho hoogoonke.

⁸Kore baalaho duumo hocco dibbe, cuukkinoonni itiilleno aanaho gante dawaayye darga dargansa wortona.

⁹«Qolteno bule hocco haadhe caabbicho worrannihuranna caabbiyyete, qarabbatenna bacceho, hattono zayitete uduunnira dibbona.

¹⁰Hakkunni gedensaanni konne baala cuukkinoonni itiillenni xaaxxe dunkanni dawaayyi aana wortona.

¹¹«Culkunni seekkinoonnihura kakkalote uduunnichira bule hocco dibbe, aanaho cuukkinoonni itiille gante dawaayye base basensara wortona.

¹²«Qullaawu Mini hajora ikkanno uduunne baalanka haadhe bulu hoccinni xaaxxona. Aanaho cuukkinoonni itiille dibbe dunkanni dawaayyi aana wortona.

¹³Camotenni seekkinoonnihu kakkalote uduunnichi aaninni buluulo fiite hoolte xiillicha hocco aanaho dibbona.

¹⁴Hakkunni gedensaanni kakkalote uduunne, giira giirranni uduunnicho, sutaasine, giirate baccenna xiltaame saanna aanasi wortona. Kuri aanano cuukkinoonni itiille dibbe dawaayye base basensara wortona.

¹⁵«Aarooninna oososi Qullaawa Dukkananna uduunne baalanka xaaxxeenna, Qehaati ilama dagge dukkona. Mannuno hakkunni gedensaanni ha'rona. Reyitannona qullaawa uduunnella kisidhoonke. Qullaawu Dukkani giddo noore baala Qehaati ilama dukkanno.

¹⁶«Qeesichu Aarooni beetti Aliaazaari caabbichu zayite, tanni yee su'naanno hixaana, wo'manka woyite shiqinshanniha gidu fushshaatenna buurranni zayite towatanno. Qullaawa Dukkananna giddo noo uduunneno isi la"anno» yii.

¹⁷Kaaliiqi Museranna Aaroonira qole,

¹⁸«Qehaati ilama Leewaawootu ga're giddonni reyite gooffanno gede assitinoonte.

¹⁹Qullaawu uduunniwa shiqqi yite reyitannokki gede, Aarooninna oososi e'e, mittu mittunkura loossannorenna dukkannore badde kultonsana.

²⁰Aarooninna oososi qullaawa uduunne usurte ka'a geeshsha, Qehaati ilama ikkitinori reyitannona hakkiira caaqqi yite nafa la'oonke» yiinsa.

²¹Kaaliiqi Musera,

²²«Gershooni sircho ikkitinore Leewaawoota boosaalli boosaallinsanna mini mininsa garinni kiiri.

²³Qullaawa Mine soqqama dandiitannore 30-50 diri geeshsha ikkinonsare labballo baala kiiri.

²⁴«Insa addi addi uduunne dukkannoreeti.

²⁵Kunni garinni Qullaawu Dukkani dukkuwa, Qullaawa Dukkana, giddoonninna gobbaanni dimbannire, aanaanni qolle gannannita cuukkinoonni itiille, e'nanni waalchi dukko,

²⁶Qullaawu Dukkaninna kakkalote uduunnichi laayyora noota nafari dukkuwa, e'nanni waalchi dukko, siibbanna Qullaawu Mini Dukkani hajora ikkanno uduunne baala insa dukkanno. Kunni uduunnira assinanni coye baala insa wonshitanno.

²⁷Gershooni ilama uyinoonninsa looso garunni loossinoronna hoogginoro Aarooninna oososi la'ona. Duhate hasiisannore baala insara uyi.

²⁸Qullaawu Dukkani giddo Gershooni ilama loosi konneeti. Loossanno loosono qeesichu Aarooni beetti Itaamaari laona.

²⁹«Meraari ilama, boosaalli boosaallinsanna mini mininsa garinni kiiri.

³⁰Qullaawu Dukkani giddo soqqama dandiitannore 30-50 diri geeshsha noore labballo baala kiirte borreessi.

³¹Insa, Qullaawu Dukkani dawaayye, waawanna, tuuqqanna lekkuwansa,

³²Dukkanu gaangaawira noo nafarira uurrinsanni tuuqqa lekkuwansa ledo, ciffa, siibbanna ledo noo uduunne baalanka dukkanno gede anna annaho beehi.

³³Qullaawu Dukkani giddo Meraari ilama loosi konneeti. Insa loosono Aarooni beetti Itaamaari la"anno» yii.

³⁴Muse Aarooninna gosate roorrooti Qehaati, Gershooninna Meraari ilama ikkitinore sasu boosaallira beehantino Leewaawoota Kaaliiqi Muse hajajino garinni kiirtu. Boosaallu boosaallunninna minu minu garinni kiirtuhu gedensaanni, Qullaawu Dukkani giddo soqqama dandiitannore 30-50 diri geeshsha ikkinonsare labballo baala kiirtu. Insano: Qehaati ilama 2,750, Gershooni ilama 2,630, Meraari ilama 3,200, mitteenni 8,580 mannaati.

⁴⁹Togoonni manna Kaaliiqi Muse widoonni qole uyino hajajo garinni kiirri. Mittu mittunkura loossanno loosonna dukkannore bande kullinsa.