Read Sidama_Qullaawa _Maxaafa KIIRO 8 Bible Online

KIIRO 8 - Sidama_Qullaawa _Maxaafa bible

KIIRO 8

¹Kaaliiqi Musera,

²«Aarooni lamalanta caabbiyye caabbicho worranni uduunnichira albiido xawissanno gede asse worona kulisi» yii.

³Aarooni hajanjoonni garinni caabbiyye caabbicho worranni uduunnichira albiido xawissanno gede asse wori.

⁴Caabbiyye worranni uduunnichi alinni eeli geeshsha daashshinoonni culkinni seekkinoonniho. Konneno Kaaliiqi Musera kulino garinni seekkinoonni.

⁵Kaaliiqi Musera,

⁶«Israeelete manni giddonni Leewaawoota badde keeraa'mitanno gede assi.

⁷Keereensatto woyite, keereensate yine qixxeessinoonni waa aanansa wixi; bisinsa danancho baala meexxite, imaanansa hayishshidhe seeru garinni keeraabbanno gede assi.

⁸Hakkiinni aanchite 1 middichanna gidu fushshaatira zayitetenni liinsoonni bullee abbitona. Atino cubbo agursiisate kakkalora ikkannoha wole 1 middicha haa'ri.

⁹Hakkunni gedensaanni, Israeelete manna gamba assite Leewaawootano Qullaawu Dukkani albaanni uurritanno gede assi.

¹⁰Leewaawoota ane Kaaliiqi albira shiqishsheenna, Israeelete mannino anga aanansa worona.

¹¹Aarooni Leewaawoota anera soqqantanno gede Israeelete manni giddonni baxxino afansha asse shiqishoena.

¹²Hakkunni gedensaanni, Leewaawootuno lamunku middooti umi aana angansa wortona. Insano mitto cubbo agursiisate kakkalora, layinkiha shilqote kakkalora Kaaliiqira shiqishshona. Leewaawootu cubbo agursiisate seera kunni garinni wonshitanno.

¹³Insa Aarooninna oososi albaanni uurriteenna anera addi afansha assite shiqishshoena. Aarooninna oososino insa aana shoomi.

¹⁴Kunni garinni Leewaawoota Israeelete manni giddonni badde anere ikkitanno gede assi.

¹⁵Keereensite maassi'rittonsahu gedensaanni, Qullaawu Dukkani giddo soqqantaera addi afansha assite shiqishie.

¹⁶Israeelete meenti umo ilino ooso labballiti baalanti anete. Ikkollana insa darga doodhoommore ikkitino daafira Leewaawootu ane calli'yareeti.

¹⁷Gibitsete gobbara nooha umiha baala shuummo waro, Israeelenniha umiha mannano ikko saada aneneete baxxe gatisi'roommo daafira Leewaawootu anereeti.

¹⁸Kunnira umo ilantino ooso Israeelennite darga Leewaawoota doodhoommo.

¹⁹Israeelete manni Qullaawu Dukkaniwa shiqqi yee qoomamannokki gede cubbo agursiisate, Israeelete manni giddonsanni Leewaawoota baxxino afansha asse eennae adhe Aarooninna oososi anga woreemmo» yiisi.

²⁰Musenna Aarooni qoleno Israeelete manni baalunku Leewaawoota Kaaliiqi Muse hajajino gede assitu.

²¹Leewaawootuno insanaa keereensidhu; imaanansano hayishshidhu. Aaroonino addi afansha asse Kaaliiqi albira shiqishe, cubbo agursiisinsa.

²²Hakkunni gedensaanni mannu Kaaliiqi Muse widoonni hajajinore baala assi. Kunni garinni Leewaawootu Aarooninna oososi anga heedhe Qullaawu Dukkanira soqqamate qixxaabbu.

²³Kaaliiqi Musera,

²⁴«25 dirinna hakkuyi ali Leewaawooti baalu, Qullaawu Dukkani giddo soqqantona.

²⁵Dirinsa 50 wo'manno yannara, soqqanshonsa uurrissona.

²⁶Hakkunni gedensaanni roduuwinsara Leewaawootaho kaa'litannota ikkinnina uminsanni soqqama didandiitanno. Leewaawoota kunni garinni soqqantanno gede assi» yiisi.