Read Sidama_Qullaawa _Maxaafa MIKIYAASI 6 Bible Online

MIKIYAASI 6 - Sidama_Qullaawa _Maxaafa bible

MIKIYAASI 6

¹Kaaliiqi Israeelete manna abbooshshi'rino gara macciishshe. Kaaliiqa ballo ka'e, mannikki aana noohe hanqo xawisi; ilaallanna gaarra ati yaattore macciishshito.

²Ki'ne ilaalla Kaaliiqi Maganu manna abbooshshi'rino gara macciishshe. Ki'ne kaajjaddu baattote rumuddano macciishshe. Kaaliiqi mannasi Israeele abbooshshi'rino; qoleno boroorino.

³Kaaliiqi, «Manna'ya ma"assummo'ne? Hiittono duha ikkummo'ne? Hanni kulle"e.

⁴Gibitsete gobbanni borojjimmate mininni wodoommo'ne; Muse, Aarooninna, Maariyaami alba'neenni hadhanni massaganno'ne gede assoommo'ne.

⁵Manna'ya, Moaabi moote Baalaaqi maricho hedino'neronna Bioori beetti Beleaami mayee qolinosiro wodanche. Konne duuchanka qaagge. Shixiiminni ka'ine Galgala hadhini doogora ikkinore baala qaagge. Konne duuchanka qaagginiro gatisammo'nera assoommore baala wodanchitinanni» yaanno.

⁶Ayirradu Kaaliiqira kumbuulammora maa haa're shiqo? Isira shilqote kakkalo ikkitanno gede doorroonni siitta haa're dayoni?

⁷Kumunni kiirranni gocca ge'reewunnita, woy tonne kume lowiddaanna daadanno wayi geeshshita ejersu laalonni qixxeessinoonni zayite shiqishummosiro hagiidha ikka? Bayira beetto'ya kakkalummosiha ikkiro cubbo'ya agurae ikka?

⁸Dee'ni; danchu coyi maatiro Kaaliiqi kulinoe. Isi ninkewiinni hasi'rannohu, taalo ikkino coye assinammora, danchumma wo'mitino baxille leellinshammoranna Maganu ledo gudisamme joongillunni hee'nammoraati.

⁹Kaaliiqa waajja egennote. Isi katama, «Katamu giddo gamba yitine heedhinoonni manni macciishshe!

¹⁰Cubbaataammu minensa kaphunninna dogatenni afidhino jiro wonshidhino. Ani giwoommoha kaphu safaraasincho horoonsidhino.

¹¹Hatto ikkiro dharu keenaasinchonna safaraasincho horoonsi'ranno manni sao hiitto asse agureemmo?

¹²Mereero'ne noore buxane gadadissino. Wo'munku kapho coyidhinannireeti.

¹³Kunnira, cubbi'nenni kainohunni ki'ne hunammoranna diigammora kaoommo.

¹⁴Ittinannillana, diduubbinanni; hudeno ki'newiinni diho'litanno. Lowo coye gamba assidhinanni; ikkollana kassi diyitinanni. Gamba assidhinoonni jiro heedhurono olunni huneemmo.

¹⁵Gide wixidhinannita ikkinnina, gamba diassidhinanni. Ejersu laalo huuncidhinannita ikkinnina zayitesi dihoroonsidhinanni. Woyinete laalo huuncidhinannita ikkinnina diagginanni.

¹⁶Kuni duuchunku iillanno'nehu moote Omiirihanna gashshootesi ragi'nohu beettisi Akiaabi miniha busha rosonna busha looso ha'runsitinoonnihuraati. Isi amaale adhitinoonni daafira huneemmo'ne. Mannu wo'munku albaanni oso'linannire asseemmo'ne. Manni'ya mereero mishantinoonnire ikkitinanni» yaanno.