Read Sidama_Qullaawa _Maxaafa NAHOOMI 1 Bible Online

NAHOOMI 1 - Sidama_Qullaawa _Maxaafa bible

NAHOOMI 1

¹Nennewe diigama daafira Elqoshichu Nahoomi coyi'rino qaalinna laino ajuuja aante noote:

²Kaaliiqi Maganu wole maganna magansidhannore wore dila"anno. Diinnasinna hettissannosire baala qorichishanno; hanqosi aanansa dirrisanno.

³Wolqasi jawa ikkituro nafa, Kaaliiqi hanqoho dimuddamanno. Ikkollana sao assinoha qorichishikkinni diaguranno. Kaaliiqira hombobolattete bubbenna, dambalu mereero nafa doogo noosi. Gomichuno Kaaliiqi qaafanno woyite ka'anno bukooti.

⁴Isi hajajonni, baarunna xashshu baalunku moolanno. Baasaaninna Qermeloosi Ilaallara noo mu'ro duuchanti qoortanno; Libaanoosi daraarono giggiltanno.

⁵Kaaliiqi albaanni ilaalla huxidhanno, gaarrano daaqqanno. Kaaliiqi daanno yannara, baatto shashshafantanno. Kalqenna aanase noori baalu huxi'ranno.

⁶Isi hanqanno woyite, albasiinni uurra dandaannohu ayeti? Hanqisi giirate gede buwanno yannara, gata dandaannohu nooni? Giirate gede buwannohu hanqisi dirranno yannara, kinna daddadhante billaallitanno.

⁷Kaaliiqi shaqqadoho, qarru yannarano mannisira dancha kaajjado maaxammanni dargaati. Isiwa eeggo e'annore baalanka agarannonsa.

⁸Diinnasi[1] lolahu egemmanno gede assanno. Gibbannosire dhi'mote tunsichiwa qole shorranno.

⁹Kaaliiqira gano gantiniro, isi ki'ne co'o asse hunanno'ne. Layinkita iso hettissinara horontanni didandiitinanni.

¹⁰Isiniiwa xaaxamino utinna, moola hayisso giirante ba'annonte gede, ki'ne dimbaanono giirantinanni.

¹¹Nennewe! Kaaliiqi aana gano ganannohunna, busha mala malanno manchi ate giddonni fulino.

¹²Kaaliiqi mannisira Yihudaho, «Asoori gosa wolqaataamenna, kiironsa bati'ra ikkiturono, nookki gede ikkite ba'anno. Manna'ya, kunni albaanni qarra batisoommo'neha ikkiro nafa, kunni ka'a hatto diasseemmo'ne.

¹³Asoori gosa duhisiissino'neha gadadu gashshoote hooleemmo'ne; lekka'ne usurroonnita siwiilu cagaage tattayiseemmo» yii.

¹⁴Kaaliiqi ki'ne Asoorootaho yiino yoo, «Kunni ka'a su'ma'ne woshshiishanno sirchi dihee'ranno. Maganna'ne mine noota bonce seekkinoonni misillanna daashshine seekkinoonnita kaphu maganna huneemmo. Ki'ne lowo geeshsha bushuulle ikkitinoonnihura, waammate bale umeemmo'ne» yitannote.

¹⁵Kuneeti dancha duduwo kulannohu, keereno lallawanno soqqamaanchi ilaallate aanaanni hige daanni no. Yihudu manna, bushuullu diinnakki co'o yite gooffinona, kunni ka'a gobbakki horonta dihorritanno. Kunni daafira, diru ayyaannakki hagiirrunni ayirrisi'ri. Xanokkino Kaaliiqira uyi'ri.