Read Sidama_Qullaawa _Maxaafa NAHOOMI 3 Bible Online

NAHOOMI 3 - Sidama_Qullaawa _Maxaafa bible

NAHOOMI 3

¹Lowo manna shiinohura, giddosi kaphu wo'minohura, saamatenninna mulqi'ratenni duroo'minohura, Nennewe Katamira aanne'e!

²Lichetenna gongo'mitanno qale luulo, faradu gulufanna faradi gaarete hirba macciishshinanni.

³Farashshaanni gulufanno; bise wala wala yitanno; urdeno bilicci bilicci yitanno. Kiiro nookki manna shinoonni daafira, reeshshu reeshshu aana duunamanno. Reeshshu batinyinni kainohunni, sa'nanni faro nafa diheedhanno.

⁴Kuni baalunku ikkinohu, Nennewe foorrenni kainohunniiti. Qoleno, biinfillisinninna wojji assitanno xummesinni, dagate mootoolla baalanta woshshaade amade, angasi galtanno gede assinohuraati.

⁵Olantote Mootichi Kaaliiqi, «Nennewe, kuneeti diinoomunni kaoommohe. Uddanokki aanikkinni mulqeemmo; teedakki dagate, saalakkino gashshoote baalaho reqecci asseemmo.

⁶Ishine tunganni darga asseemmohe; mishatenni laeemmohe; mannu baalunku diqatannohe gede asseemmohe.

⁷La"annohehu baalunku shagaggi're atewiinni shawwu yee, ‹Kuneeti Nennewe diigame mulla darga ikkino. Mayino mararannosi? Mayino sheshifachishannosi?› yaanno» yii.

⁸Nennewe! Ikkitano ikkeenna, ati Gibitsenniha dannawu katama Tebisi roorattoni? Isi nafa Abbayi Wayinni qoqqowaminoha ikkinohura, wayi huxxasiitinna qiishosiiti.

⁹Tebisi Itiyophiyunna Gibitse kaa'litannosi; wolqasira dannu dino. Fuuxinna Liibiyu olu garosiiti.

¹⁰Tenne kaa'lo giddoonni, Tebisi Katama diinu horreenna, mannisino qafadamino; qaaqquullesino kinnatenni cancanne doogga baalate tungoonni. Ejjeettonsano hixa ga'nite beeqqite cagaagetenni usurte haadhe hadhinonsa.

¹¹Nennewe! Ati dimbe gaggawanno manchi gede ikkattohunna diinnakkiwiinni xooqqe umo worattowa hasi'ratto yanna dagganno.

¹²Qiishokki baalanti balaxxe iillitino laalo amadde hunduruurritino haqqicho gedeeta ikkitanno. Shashshafante giggiltanno yannara, itannohu afiira ubbanno.

¹³Gaaddokki baalanti meyate gedee waajjaleeyye ikkitino. Qachikki waalchuwa diinnakkira fano ikkitino; cufannano giira ittino.

¹⁴Diinnakki gaangeessite shetissannohe yannara, agatto waa hinkii'lite qixxeessi'ri. Qiishokkino kaajjishi'ri; dora liisse uduunne seekkinanniha qixxeessi'ri; xuubeno seekki.

¹⁵Aye geeshshano qorophittoro, giiramakkinna bisetenni dereenqamakki digattannote. Kanchafaru itino gidi gede ikkite ba"atto. Kuneeti olantokki kanchafarunna qooliweelu kanchafari gede batidhino.

¹⁶Daddalaasinekki batinyi gordu beeddahe roorino. Ikkollana, qoola fane buuwanno kanchafari gede, kuni baalunku atewiinni ba"anno yanna dagganno.

¹⁷Ejjeettokkinna olantote hajajaasinekki batinyunni kainohunni, qiidu yannara kinchu huxxi mule gamba yee shaa'malannoha bati'ra kanchafare labbanno. Kanchafaru arrishsho fultanno yannara, buuwe ba"anno. Hiikka marannorono afannohu dino.

¹⁸Asoori moote, jajjabbikki gooffe hegere geeshsha reyite goxxino. Mannikki ilaalla baalantera billaallino; gamba assannohano diafi'ranno.

¹⁹Hiiqqammekki didhaawantanno; madakkino dihurtanno. Ateha baokki duduwo macciishshannohu baalunku hagiidhe anga gananno. Ate bunshenninna kaajjillikkinni gawajjaminokkihu nooha lawannoheni?