Read Sidama_Qullaawa _Maxaafa IMBAAQOOMI 1 Bible Online

IMBAAQOOMI 1 - Sidama_Qullaawa _Maxaafa bible

IMBAAQOOMI 1

¹Kaaliiqi himanaanchu Imbaaqoomira ajuujatenni leellishinosi himani kunninni aane nooho.

²Kaaliiqa'ya eeggatena, ani qoonqo'ya naggi asse wi'lanna macciishshattoekkihu mamooti geeshshaati? Assinanninke beebbanni gatisattonkekkihu mamooti geeshshaati?

³Konne qarra baala afeemmo gede mayira assittoe? Tenne beebba assinanna mayira sammi yite la"atto? Kuneeti lowo geeshsha batidhino baonna beebba gaangeessite nooe. Base baalate gibbonna yekkeerama no.

⁴Seeru shoshshoggino; yoono dabbino. Kunni daafira cubbaataammu keeraano doyissite amadde qarrissanni no.

⁵Hakkunni gedensaanni Maganu mannisira, «Hanni qooxeessi'nera noo daga la'e. Mule'ne nooha baala la'ine lowo geeshsha dhaggeeffattinanni. Ayino duduweenna'ne ammantinannikki coye yanna'nera asseemmo.

⁶Kune insaha ikkinokkire ragidhara gobba baala doyitannore, haxawarranna muddamaasine Baabilooni gosa aana'ne kayiseemmo.

⁷Insa waajjishshannoreetinna masissannoreeti; uminsa ayirrinye agarsiisi'rate seera qixxeessidhanno.

⁸«Faradinsa dagunchunni roore rahanno; hudidhino hiyyeeyyenni roore waajjishannoho. Faradaasinensano xeertotenni guluffe harfiixxanni dagganno. Hawulukke adhite ittara allaattete gede ikkite buubbanno.

⁹«Olantonsa baala beebba assitara gugguuffanno. Insa dagganna afihu baalu waajje huxi'ranno. Qafaddino manni baaru gami shaafi geeshsha ikkanno.

¹⁰Mootoolla mishshanno. Gashshaanono arrassitanno. Katammate qiisho baala mishshe oso'litanno. Qiishote aanchite bushsha duunte aanaanni higge fulte amaddanno.

¹¹Hakkunni gedensaanni baalankare hombobolattete gede assite fiite adhite hadhanno. Kuri haxawarrooti wolqansa maganu gede assite kiirtanno» yii.

¹²Imbaaqoomi qole, «Kaaliiqa Magano'ya, ati bi're hundinni kayisse nootto qullaawaatinna hegerera hee'rattoho. Ninkeno direyineemmo. Golonke ikkoottohu Maganonke, cubbinkenni kainohunni Baabilooni gosa aananke kayisoottohunna wolqano oottonsahu ateeti.

¹³Illekki lowo geeshsha keeraancho ikkitinohura busha coye dila'anno. Atino busha coye assinanna la'e dicincatto. Hatto ikkina, kore haxawarroota hiitto sammi yite la"attoyya? Cubbaataammu insawiinni woyyinoha dancha manna huntanna mayira sammi yaattoyya?

¹⁴«Manna massagannohu nookki qulxu'minna godowunni ha'ranno kalaqami gede assattohu mayiraati?

¹⁵Baabiloonootu manna qulxu'mu gede qarawunni amaddanno. Meemmaame woshshaadonni goshooshshanno. Kunnirano hagiidhite ilillissanno.

¹⁶Qawaaxxidhe heedhanno gede kaa'lannonsare baala abbitannonsa daafira woshshaadonsara kakkalo shiqishshanno.

¹⁷«Maahoyyena, tini gosa wo'manka woyite mararro nookkiha manna guddanni heedhanno?