Read Sidama_Qullaawa _Maxaafa SOFFOONIYAASI 1 Bible Online

SOFFOONIYAASI 1 - Sidama_Qullaawa _Maxaafa bible

SOFFOONIYAASI 1

¹Soffooniyaasi Kuushiho; Kuushi Gedaaliyaho; Gedaaliya Amaariyaho; Amaariya qole moote Hiziqiyaasi beettooti. Amooni beetti Iyosiyaasi Yihudaho moohe noo waro, Kaaliiqi Soffooniyaasira coyi'rinosihu himanu qaali kunninni aane nooho:

²Kaaliiqi, «Baalanka coye baattote aaninni co'o asse huneemmo;

³mannanna saada, iimi ceanna baaru qulxu'me huneemmo. Haxawarroota galcheemmo; mittu nafa gatikkinni mannu sircho baattote aaninni gudeemmo. Konne coyi'roommohu ani Kaaliiqaati.

⁴«Yerusaalametenna Yihudu manna baala qorichisheemmo. Hakkonne dargano Ba"aali yinanniha kaphu magano maganisidhannore, gattinorenna qeesootano co'o asse huneemmo.

⁵Gumayicho giddite arrishshote, aganahonna beeddahete kumbuultannore huneemmo. Ane magansidhanninna su'miyanni xaartanni heedhenni, wirri yite Melkoomi yinannihu kaphu magani su'minni xaartannore huneemmo.

⁶Anewiinni faffinore, ane hoode ha'ra agurtinorenna anewa dagge albiseemmonsa gede xa'midhannokkire huneemmo» yii.

⁷Kaaliiqi yoo barri gambisinona, Mootichu Kaaliiqi albaanni sammi yiiyye. Kaaliiqi manna, kakkalote gorrinanni saada gede gorrara qixxaawanni no. Wosinasino kakkalote sagalera keereensino.

⁸Kaaliiqi, «Ani kakkaleemmo barra jajjabba, mootete oosonna wosincho woga ha'runsitannore baala qorichisheemmo.

⁹Kaphu maganna magansidhannore, mootichinsa mine hanaaqunninna xagarrotenni afidhino jiro wonshitannore qorichisheemmo» yaanno.

¹⁰Qoleno Kaaliiqi, «Hakko barra Yerusaalamete huxxira qulxu'mu waalchi widoonni raare fultanno. Haaru gudumaalirano wi'la shooshshitanno; gaarrate qooxeessino luulo ikkanno.

¹¹Ki'ne katamaho eelaanni heedhinoonniri baalu tenne huuro macciishshitinanni yannara, ‹Wuu! Wuu!› yitinanni raarre. Ki'ne Makiteeshi heedhinanniri, Kana"aani manni baalu reyinohuranna daddalaasinensa gooffino daafira wi'le.

¹²«Hakka waro Yerusaalame caabbichunni qonqolche laeemmo. La'minyunni boo'nite, ‹Kaaliiqi danchano ikko busha coye horontanni diassanno› yitannore qorichisheemmo.

¹³Jironsa baalanti saamantanno; minnansano diigantanno. Hattenne yannara mine mi'nitanno; ikkollana digaltanno. Woyineno kaasidhanno; kayinnilla woyinete xajje diagganno» yaanno.

¹⁴Jawu Mootichu barri gambisino; daasino addintanni rakkino. Hakko barri addintanni waajjishannoho. Hakko barra bareedda nafa hexxo mudhite qoonqonsa naggi assite raartanno.

¹⁵Hakku barri hanqunniha, qarrunnihanna shettonniha, baonnihanna diigamanniha, tunsichunnihanna limixenniha, guunjonnihanna gomichunniha ikkanno.

¹⁶Hakko barra, qiinshoonni katammanna seeddaanna kinchu huxxuwa amaddara dagganno gaaddo olu xurumba ufuuffanni roqonsitanno.

¹⁷Kaaliiqino, «Ane albaanni cubbo loosatenni sao assitinohura, ballinohu gede jaanjura geeshsha mannu baalu aana wolqaataamo qarra abbeemmo. Mundeensa wayi gede lolakkanno; reeshshinsano fudu gede mullawa tugamanno» yaanno.

¹⁸Kaaliiqi hanqosi leellishanno barra, manna birrisinna culkisi gatisasira didandaanno. Giirate gede bubbanno laalasinni baatto hunanno. Baattote aana noori baalunku hedeweelcho giiramanno.