Read Sidama_Qullaawa _Maxaafa SOFFOONIYAASI 2 Bible Online

SOFFOONIYAASI 2 - Sidama_Qullaawa _Maxaafa bible

SOFFOONIYAASI 2

¹Ki'ne saalfattinannikki gosa, hajajosi fultukkinni rahotenni mittowa gamba yiiyye. Hakkunni ka'a kayinni, galawu gede billaallitinanni. Giirate gede buwannohu Kaaliiqi hanqi daanno'ne; hakko barra aarisi dirranno'ne.

³Hajajosi wonshitinanniri, tenne baatto aana heedhinanniri, ki'ne jooguullu Kaaliiqiwa higgine, dancha looso loosse. Kaaliiqi albaanni umo'ne heeshshi asse; kunni garinni Kaaliiqi hanqosi leellishanno barra miteekkitine qorichunni gattinanniha ikkanno.

⁴Gaaza yinanni katami onanno; Asiqeloona yinanni katamino diigamanno; Ashidoodi katamira heedhannorino barru taalootira heedhannowiinni shorrantanno; Eqirooni mannino katamisinni buqqisame ba"anno.

⁵Ki'ne Kana"aani gobbara baaru gama heedhinannirira Kelitootaho yinanni Filisxeemootira aanne'e! Kaaliiqi, mittuno gattinikkinni co'o asse hunanno'ne.

⁶Baaru gama nooti baatto'ne baala saada hossannowa, allaalaasine galtannowanna saada galtanno hoowe ikkitanno.

⁷Qafadotewiinni gatinohu Yihudu manni baatto'ne ragi're saada hosiisi'rannowa assi'ranno; Asiqeloonaho nootera minnansara galanno. Kaaliiqi Maganinsano towatannonsa; qafadaminonsare baala daware riqiwannonsa.

⁸Olantote Mootichi Kaaliiqi, «Moaabinna Amooni manni manna'ya arrassanninna qacifatanni baattonsa adhara boollaqi'rinota macciishshoommo.

⁹Ani Israeelete Magani Olantote Mootichi Kaaliiqi heeshshonnihu su'miyanni xaareemmo. Moaabinna Amooni, Soddoomunna Gomooru gede ikkite ba'anno. Maxinete balenna ishinu guggushshinowa loonsannikki baatto gede ikkitanno. Qafadotewiinni gatinohu manni'ya jajjansa saamanno; baattonsano ragi'ranno. Kuni ikkanno gede ani Kaaliiqi heeshshonnihu su'mi'yanni xaareemmo» yii.

¹⁰Moaabinna Amooni manna kuni baalunku qarri amadannonsahu, giddonsa hettisamanna boo'na wo'miteenna Olantote Mootichi Kaaliiqi manna xontanni shollishshinohuraati.

¹¹Baattonsara noota kaphu maganna duuchanta hune Kaaliiqi callu insawa waajjinoonniha ikkanno. Baattote aani daga baala noowa heedhe isira kumbuultanno.

¹²Ki'ne Itiyophiyootu bise'yanni murantinanni.

¹³Kaaliiqi aliyye mannira wolqasi leellishanno. Asoorino hunanno; Nennewe katamano wayi nookkiha moolanna diigamino katami gede mullicho darga assanno.

¹⁴Ge'reewunna meu, lalunna moyichu hosannowa ikkanno. Awulo diigammete giddo heedhanno; masikoottate aana heedhe raartanno. Haraqeeyyeno nafarrate raartanno. Minna minnoonni daguwino reqecci yaanno.

¹⁵Kuni katami, «Ane ka'a wolu dino!» yee hawaqi're keerunni hee'rino. Xa kayinni, moyichu hosannowa mulla darga ikke gatanno. Hakkaanni hige sa"annohu baalu addintanni maala'lanni umo shafanni fiiqanno.