Read Sidama_Qullaawa _Maxaafa HAGE 1 Bible Online

HAGE 1 - Sidama_Qullaawa _Maxaafa bible

HAGE 1

¹Faarisi moote Daariyoosi moohihunni layinki diro, leelki agani eihunni umi barra, Kaaliiqi himanaanchu Hage widoonni qole coyi'ri; coyi'rinohuno, Yihudu gashshaanchira Shalitueeli beettira Zerubaabeeliranna qeesootu qarira Iyotsedeqi beetti Iyyaasuraati.

²Olantote Mootichi Kaaliiqi Hagera, «Kuni manni, ‹Qullaawu Mini galagale minamanno yanna di"iillitino› yaanni no» yii.

³Kunnira, Kaaliiqi himanaanchu Hage widoonni mannisira,

⁴«Manna'ya, ane mini diigame hee'reenna, ki'ne biiffino minnara hee'ra garahoni?

⁵Hanni xa iillino'ne coye baala wodanchitine la'e!

⁶Kuneeti lowoha wixidhine shiima gamba assidhinanni; ittinanni sagale diduushshitanno'nete; agginanniri kassi diassanno'neho; diphitinanniri di"iibbanno'ne; loossine afidhinanni woxi dadhanchu ogorira wodhitinoonnihu gedeeti» yii.

⁷Olantote Mootichi Kaaliiqi, «Kuni mayira ikkinoro wodanchitine la'e;

⁸xa ka'ine ilaalla fultine, haqqe murtine abbe; Qullaawa Mineno galagalchitine minne; anerano tashshi yaannoe; ani ayirreemmohuno kunninniiti» yii.

⁹Qoleno, Olantote Mootichi Kaaliiqi, «Ki'ne woyite lowo jajja afi'rate hexxitinoonni; kayinnilla shiima calla afidhinoonni; minira qo'litinoonniha ani ufuufe hunoommo; togo mayira assoommoha lawanno'ne? Hatto assoommohu, ane mini diigame hee'reenna, umi'ne mine biifisi'rate doddinannihuraati.

¹⁰Xeenu dirra giwinohunna baattono gide fushsha gibbinohu kunniraati.

¹¹Anino loosi'nanni gatira, ilaallate, gidehonna haaro woyinete xajjera, zayitete ejedhera, baatto fushshitannorira baalaho, mannunna saadate, hattono loosidhinoonniri baalu aana moolle abboommo» yii.

¹²Zerubaabeelinna Iyyaasu, qafadotenni higino manni baalunku, Maganinsa Kaaliiqi hajajinonsare baala assitu; Kaaliiqa waajjitino daafira, Kaaliiqi soqqamaanchisi himanaanchu Hage widoonni coyi'rino qaalira hajajantu.

¹³Himanaanchu Hageno mannaho, « ‹Ani ki'ne ledo noommo› yaanno Kaaliiqi» yee sokka kulinsa.

¹⁴Kaaliiqi Yihudu gashshaancho Zerubaabeeli, qeesootu qara Iyyaasunna qafadotenni higino manna baala, Qullaawa Mine galagalchite mintanno gede kakkayisi; insano Olantote Mootichi Kaaliiqi Mine mina hanaffu.

¹⁵Kuni ikkinohu Daariyoosi moohihunni layinki dirinninna leelki agani eihunni lemiina shoolki barraati.