Read Sidama_Qullaawa _Maxaafa HAGE 2 Bible Online

HAGE 2 - Sidama_Qullaawa _Maxaafa bible

HAGE 2

¹Hakko dironni, lamalki agani eihunni lemiina mitikki barra, Kaaliiqi lede himanaanchu Hage widoonni qole coyi'ri.

²Yihudu gashshaanchira Zerubaabeelira qeesootu qarira Iyyaasuranna mannu baalunkura,

³«Kunni Qullaawu Minihu albi biinfilli hiittoohoro afinohu ki'ne giddo no? Xa kayinni, hiitto ikke nooha la'inanni heedhinoonni? Kuni ki'nera dimullare lawe leellanni noo'ne?

⁴‹Xa kayinni baalunku jawaatte! Ani ledo'ne noommona minne!› yaanno Olantote Mootichi Kaaliiqi.

⁵Gibitsete gobbanni fultini waro, ‹Ledo'ne noommo› yuummo qaali garinni xaano Ayyaani'ya ledo'ne noona jawaatte! Waajjitinoonte» yee kulinsa.

⁶Olantote Mootichi Kaaliiqi, «Harancho yanna giddo, galagale gordonna gobba baaranna baatto shafeemmo;

⁷gashshoote baala galcheemmo; jironsa baalantano kawiira dagganno gede asseenna, Qullaawa Mine jiro wo'mitanno.

⁸Baattote aana noohu culkunna birru baalu aneho.

⁹Haaru Qullaawu Mini albihunni roore xu'minoha ikkanno. Kunni katamira keere eemmo; manna'yano duroonseemmo» yaanno.

¹⁰Daariyoosi moohihunni layinki diro, honsikki agani eihunni lemiina shoolki barra, Olantote Mootichi Kaaliiqi ane himanaanchu Hage widoonni qole,

¹¹«Qeesoota, kunni coyira seeru mayaannoro xa'minsa.

¹²Lawishshaho, mittu manchi qullaawa maala kakkallanni darginni haa're uddi're noo uddanora woriro, woy uddanosinni sagalenna qaamatto, woyinete xajjenna zayite, woy mayi gari sagaleno kisiha ikkiro, hatti sagale qullaawa ikkitara dandiitannoni?» yii. Qeesootuno, «Qullaawa ikkitara didandiitanno» yite dawartusi.

¹³Hageno galagale, «Reeshsha amade lagaawinohu mittu manchi, tenne sagale giddonnni mitte kisiro, hatti kisino sagale lagaabbannoni?» yee xa'minsa. Qeesootuno, «Eewa, lagaabbannowe» yite dawartusi.

¹⁴Hageno qole, «Kaaliiqi, ‹Kuni manninna insa loossanno loosi baalu hattooho; kakkalote dargira shiqishshannori baaluno kunni garinni lagaawinoho› yaanno» yii.

¹⁵Kaaliiqi, «Mayi dayino'nero diwodanchitinanni? Qullaawa Mine hananfara albaanni,

¹⁶200 kiilo gide afi'rate gide duunnanniwa martinoonni; kayinnilla, afidhinoonni gidi 100 kiilo calla ikkino; 100 litire woyinete xajje afi'rate hasidhine, woyine huuncinanniwa martinoonni; kayinnilla afidhinoonniti woyinete xajje 40 litire calla ikkitino.

¹⁷Kunni garinni loosidhinoonni jajja baala hunate dhibba, mooshshitanno bubbenna kaade soommo'ne; ki'ne kayinni, kuni duuchu iilleenna'ne nafa anewa dihigginoonni.

¹⁸Kuneeti honsikki agani einkunni techo 24 barra ikkino; Qullaawa Mine sanfihunni kunni barrinni kayise daannore baala wodanchitine la'e.

¹⁹Xa wixaho ikkanno gidi gootaraho hoogiro nafa, woyinenna balase, roomaanenna ejersu guma aa hoogirono, kunni barrinni kayise maassi'reemmo'ne» yii.

²⁰Hakko aganiranni lemiina shoolki barra, Kaaliiqi galagale himanaanchu Hage widoonni qole,

²¹Yihudu gashshaanchira Zerubaabeelira, «Gordonna baatto shafeemmo barri daanno.

²²Hatte yannara, gashshootu baalunniha ayirrinyu barcima galcheemmo; wolqansano co'o asse gudeemmo; gaarete farado gantannoreno gaarensa ledo galcheemmo; faradinsa goofanno; faradaasinensano mimmitonsa shitanno.

²³Soqqamaancho'ya Zerubaabeeli! Hakko barra ani ate haa're ane su'minni gashsha dandaatto gede moohiseemmohe; ani ate dooroommohe; farrammannita roorrete cuuicho'yano woreemmohe» yaanno Olantote Mootichi Kaaliiqi.