Read Sidama_Qullaawa _Maxaafa ZAKKAARIYAASI 13 Bible Online

ZAKKAARIYAASI 13 - Sidama_Qullaawa _Maxaafa bible

ZAKKAARIYAASI 13

¹Olantote Mootichi Kaaliiqi, «Hatte yannara, Daawiti sirchonna Yerusaalamete manni cubbo, qoleno kaphu maganna magansi'ratenni battaawansanni keereensitanno buicho fa'nantanno.

²Hakka waro, magannansa su'ma gobbate aaninni huneemmo; layinkimeeshsho qaagannonsahu dihee'ranno; battete ayyaaninni coyidhannore kaphu himanaano baattote aaninni hooleemmo.

³Kaphu himana coyi'rinohura annisinna amasi, ‹Kaaliiqi su'minni kaphu himana coyi'rootto daafira reyatto› yite kultannosi. Hakkiinnino sae himana coyi'rate wo'naaliro, annisinna amasi urdetenni qasse shitannosi.

⁴«Hatte yannara, kaphu himanaano himana coyi'ranna ajuujansa kula saalfattanno; halaalu himanaano uddidhannota saadate orda afidhino uddano uddidhe, manna diso'risiissanno.

⁵Hattenne agurte mittu mittunku, ‹Ani hee'rummo diri baalunkunni baatto loosi'rella galoommo ikkinnina, himanaancho di"ikkoommo› yitanno.

⁶‹Himanaancho ikka hoogittona, kuni qotikkira noo bassi mayinnihoyya?› yine xa'minannisi woyite, ‹Jaali'ya mine mannu ledo ganamanni madi'roommowaati›[1] yee dawaranno» yaanno.

⁷Olantote Mootichi Kaaliiqi, «Bise! Baqqi yite, ledo'ya nooha allaalaasincho'ya gani! Hakkawoyite, ge'reewu billaallanno; manna'ya ani umi'ya gawajjeemmo.

⁸Gobbate aana noo manni giddonni sasunni lame anga reyiteenna, sasunni mitte anga gattanno.

⁹Gatinoha mitte anga ikkanno manna haa're giiranniwa masse, birru gede daashshe, culku gede fonqole xalaltanno gede asseemmonsa. Hakkunni gedensaanni anewa higge huuccidhanno; anino dawareemmonsa. Anino, ‹Ki'ne manna'yaati› yeemmonsa; insano, ‹Kaaliiqi Maganonkeeti› yitannoe» yaanno.