Read Sidama_Qullaawa _Maxaafa ZAKKAARIYAASI 2 Bible Online

ZAKKAARIYAASI 2 - Sidama_Qullaawa _Maxaafa bible

ZAKKAARIYAASI 2

¹Wole ajuujanni anga bikkinanni siiwo amadinoha mitto wedellicha afe,

²«Hiikka hadhanni nootto?» yee xa'moommo. Isino, «Yerusaalamete hojjanna godowa bikke la"ammora ha'ranni noommo» yiie.

³Hakkunni gedensaanni, ledo'ya hasaawanni noo sokkaasinchi alba hige qaafita, wolu sokkaasinchi isi ledo xaadara daanna afummo.

⁴Umi sokkaasinchi layinkihura, «Bikkinanni siiwo amadino wedellichiwa dodde marte, ‹Yerusaalamete lowo manninna lowo saada heedhannohura lowoha kinchu huxxa huxxinara didandiinanni;

⁵ani umi'ya gaangaawisera giirate huxxa ikke katama agareemmo gedenna wo'mu ayirrinyi'yanni hakkiicho mereerosi hee'reemmo› yee hexxo uyinosita kuli» yiisi.

⁶Kaaliiqi mannisira, «Ki'ne base baalate billaalliseenna'ne wole gobbara qafadantine heedhinoonniri, xa ka'ine Baabilooninni rahotenni xooqqine fultine Yerusaalame higge.

⁸Ki'ne kisannohu ille'ya diikkicho kisannoho yaate» yaanno. Olantote Mootichi Kaaliiqi mannasi mulqidhino dagara konne qaale coyi'reemmo gede ayirrinyesi leellishe soyinoe.

⁹Qoleno, «Kaaliiqi umisi ki'ne qasanno'ne; soqqamanno'ne mannino daware ki'ne mulqi'ranno» yii. Kuni duuchu ikkanno woyite, ane soyinoehu Olantote Mooticha Kaaliiqa ikkinota mannu baalu afanno.

¹⁰Kaaliiqino, «Yerusaalamete manna! Ani mereero'ne hee'rammora ki'newa daanni noommo daafira, hagiirrunni ilillisse» yii.

¹¹Hatte yannara, lowo daga Kaaliiqiwa dagge mannasi ikkitanno. Isino mereero'ne hee'ranno; ane ki'newa soyinoehuno Olantote Mooticha Kaaliiqa ikkinota affinanni.

¹²Yihudu gobba qullaawa layinkimeeshsho Kaaliiqira addi jiro ikkitanno; Yerusaalameno layinkimeeshsho aneta assi'reemmo.

¹³Kaaliiqi qullaawu dargisinni daanno daafira, baalunku albasiinni sammi yiiyye.