Read Sidama_Qullaawa _Maxaafa ZAKKAARIYAASI 3 Bible Online

ZAKKAARIYAASI 3 - Sidama_Qullaawa _Maxaafa bible

ZAKKAARIYAASI 3

¹Hakkunni gedensaanni Kaaliiqi, Qeesootu Qara Iyyaasu Kaaliiqi sokkaasinchira albaanni uurre nooha ajuujatenni leellishie. Sheexaanu Iyyaasu yekkeerara qiniitesiinni uurre no.

²Kaaliiqi sokkaasinchino Sheexaane, «Ate Sheexaane, Kaaliiqi rufohe! Yerusaalame baxannohu Maganu rufohe! Kuni manchi, Kaaliiqi boosaasinchu gede giirate giddonni haa're fushshinohowe!» yiisi.

³Iyyaasuno xurtino uddano uddi're sokkaasinchu albaanni uurre no.

⁴Sokkaasinchuno soqqamaanosi, «Tenne xurtino uddano fushshesi!» yee hajajinsa. Falaqqi yee Iyyaasuwa hige, «Kuneeti saokki atewiinni hooloommo; faayya qeesimmate uddanono uddisiiseemmohe» yiisi.

⁵Anino, «Xurinokkiha xaaxi'nanni koffiya umisi aana wora habbinoonte» yuummo. Insano Kaaliiqi sokkaasinchi hakkiicho uurre hee'reenna, Iyyaasura umoho xurinokkiha xaanxoonni koffiya worte, faayya qeesimmate uddanono uddisiissusi.

⁶Hakkunni gedensaanni sokkaasinchu Iyyaasu qorophisiisanni,

⁷«Olantote Mootichi Kaaliiqi, ‹Doogo'ya aana ha'rittoronna looso'ya baala guutittoro, qullaawa mine'yanna gudumaali'yara mookke hee'ratto; alba'yaanni uurrite noo sokkaasine huuccatto macciishsheemmonte gede, ate huuccattono macciishsheemmo.

⁸Qeesootu qara Iyyaasu, Macciishshi! Ki'neno ledosi soqqantinannirinna albillittete ikkannorira, danchu coyi malaate ikkitinoonniri konne coye wodanche; kuneeti, «Sina» yine woshshinanniha soqqamaancho'ya leellisheemmo.

⁹Kuneeti Iyyaasu albaanni 7 suude afi'rinoha mitto kincho woreemmo; isi aanano borrote xawishsha borreesseemmo; tenne gobba cubbono mittu barrinni haa're hooleemmo.

¹⁰Hakku barri iillanno woyite, umi'ne woyinenna balase'ne hunda ofoltine ollaa'ne jilaho woshshitinanni qawaaxxidhine heedhinanni› yaanno» yii.