Read Sidama_Qullaawa _Maxaafa ZAKKAARIYAASI 5 Bible Online

ZAKKAARIYAASI 5 - Sidama_Qullaawa _Maxaafa bible

ZAKKAARIYAASI 5

¹Galagale laeemmo woyite, borreessinoonnihu 1 xaaxo gogi iima buuwanna afummo.

²Sokkaasinchuno, «Maa la'anni nootto?» yee xa'mie. Anino, «Hojja 20 cigile, godowa 10 cigile ikkitinoti 1 borreessinoonniti gogu xaaxo iima buubbanna la"anni noommo» yoommo.

³Sokkaasinchuno qole, «Xaaxamino gogira giddoonni gobba baalante aana dagganno rumo borreessinoonni; mitto widoonni, mooraano baala baattote aaninni ba'annota, wole widoonni qolle, kaphunni xaartannori baalu ba'annota borreessinoonni.

⁴Olantote Mootichi Kaaliiqi, ‹Tini soyemmo rumo, mittu mittunku mooraanchi miniranna kaphunni xaarannohu minira e'anno; e'anno woyiteno, hakkiicho keeshshite minensa co'o assite diigganno yaanno› » yii.

⁵Sokkaasinchuno galagale anewa daye, «Kune lai, wolu coyino daanni no!» yiie.

⁶Anino, «Hakku daannohu maati?» yee xa'mummo. Isino, «Safarranni gimboolaati; kunino baatto baalate aana loonsanni hee'noonni cubbo leellishannoho» yiie.

⁷Gimboolu siwiilunni seekkinoonni tuana afi'rinoho; la"anni hee'reenna tuanu fa'nami; gimboolu giddono mitte mancho ofolte no.

⁸Sokkaasinchuno, «Tini mancho bunshete lawishshaati» yiiehu gedensaanni, mancho woro qole xiiwe tuana daware tui.

⁹Gotti yee la"anni hee'reenna, 2 meenti lowo qoola afi'rino bajji gede buuwanni anewa hige daye, gimboola uullanni kayise haa're buuwi.

¹⁰Anino, «Gimboola hiikka haa're ha'ranni no?» yee sokkaasincho xa'mummo.

¹¹Isino, «Baabiloonira haa're masse gimboolaho mine minaraati; minu miname goofihu gedensaanni, magansi'nanni gede gimboola masse mine woranno» yiie.