Read Sidama_Qullaawa _Maxaafa ZAKKAARIYAASI 9 Bible Online

ZAKKAARIYAASI 9 - Sidama_Qullaawa _Maxaafa bible

ZAKKAARIYAASI 9

¹Hadiraakinna Demaasiqote Katami qorichishamannota Kaaliiqi coyi'rinohu yoote qaali aane nooho: Israeele calla ikkitukkinni, isi ille manna baalanka la'anno.

²Hadiraakira aantinotera Hamaatinna hayyoole Xiroosinna Sidoona katammano la"anno.

³Xiroosi umosi agadhara lowo qiisho qiishi'rino; kaxxine shalanqanni birranna culka duu'nino.

⁴Ikkollana kayinni, gamba assi'rinoha Kaaliiqi haa're hoolanno; jirosi baaru giddo hunanno; katamuno giirame buluulo ikkanno.

⁵Asiqeloona Katami konne coye lae waajjanno; Gaazu Katamino tenne ikkito lae, lowo geeshsha shetanno; Eqirooni Katamino hexxo mudhanno; Gaazu mootesi hooganno; Asiqeloona baattono ona ikkite gattanno.

⁶Ashidoodira karsu manni hee'ranno. Kaaliiqi, «Kore boonaleeyye Filisxeemoota shollisheemmo.

⁷Kunni ka'a mundeete ledo noo maala woy hoolloonni sagale baala di"ittanno; insa giddonni gattinori manni'ya ledo karsante, Yihudu ayidde ikkitanno. Eqirooni manni Iyaabuusootu gede manni'ya ledoha ikkanno.

⁸Gobba'ya agareemmo; olanto aanaseenni higge disa'anno; manni'ya mageeshshi geeshsha qarraminoro ani afoommona, kunni ka'a miiccannori manna'ya digadadissanno» yaanno.

⁹Tsiyooni manna, hagiidhe! Yerusaalamete manna, hagiirrunni ilillisse! Kuneeti moote'ne ki'newa daanni no; isi qeelinohonna bareedaho. Joongillunni harricho, harrichote ilmicho gulufe daanno.

¹⁰Ani Kaaliiqi olu faradi gaare Israeeletenni huneemmo; faradono Yerusaalametenni hooleemmo; olu bagadi baalunku hiiqqaqqamanno. Moote'ne dagate mereero araara kalaqanno; mootimmasino baaru qaccenni qaccete geeshsha iillitanno. Gashshootisino Efiraaxisi Wayinni kayise, gobbate qacce geeshsha iillanno.

¹¹Ani Kaaliiqi, kakkalote mundeenni ki'ne ledo eoommo gondoori daafira, wayi nookki bale qafadonnite giddonni manna'ne haa're fushsheemmo.

¹²Qafadantine heedhinoonniri hexxote annuwa! Kaajjado qiisho ikkiteenna keerunni heedhinanni gobba higge; xaa geeshsha iillino'ne qarri daafira erote ero maasso eemmo'ne.

¹³Yihuda digaanu gede, Israeeleno worbichu gede asse horoonsi'reemmo. Giriikete bagadaano qasammora, Tsiyooni bagadaano bisete gede asse soyemmo.

¹⁴Kaaliiqi mannaho aleenni hige leellanno; digaanu worbichono banqote gede asse olanno. Mootichu Kaaliiqi buudu xurumba ufuufanno; Wodiidi hombobolatte gede asse diina gawajjanno.

¹⁵Olantote Mootichi Kaaliiqi mannisira gargaraancho ikkanno; insano diinnansa corqaayyete worroonni kinnanni guddanno. Kakkalote mundee kakkalote darga dunnannihu gede, diininsa mundee ga'nite dimbinohu gede ikkite alaakkanno.

¹⁶Hakku barri iillanno woyite, allaalaanchu ge'reewosi moyichuwiinni gatisannohu gede, Kaaliiqi mannasi gatisanno. Ayirrado ba'latto aana noo irri xawannohu gede, insano gobbasira heedhe hatto xabbanno.

¹⁷Mannu gobbate danchummanna biinfille maala'lanno; aju manni tenne dancha gobba sagalenninna, haaro woyinete xajjenni kaajje lophanno.