Read Sidama_Qullaawa _Maxaafa MILKIYAASI 2 Bible Online

MILKIYAASI 2 - Sidama_Qullaawa _Maxaafa bible

MILKIYAASI 2

¹Olantote Mootichi Kaaliiqi lede, «Qeesoota, tini hajajo ki'nera uyinoonnite.

²Assitinanni coyi baalunni ayirrisse"e. Yoommo'ne gede ikka hoogginiro kayinni, rumo soyemmo'ne; atoote'neno rumeemmo. Wodancha giwa'nenni kainohunni hatto assoommo.

³Ooso'neno rufeemmo. Kakkalote abbitinoonniha saadate cuma albi'nera wixeemmo. Ki'neno cumunku ledo ishine tunganniwa massine hunnanni'ne.

⁴Leewi sircho ikkitino qeesootira oommo gondoori diigamikkinni hee'ranno gede, tenne hajajo oommo'nehu ane ikkoommota hatte yannara affinanni. Konne coye coyi'roommohu ani Olantote Mootichi Kaaliiqaati.

⁵«Leewira oommo gondoori heeshshonnihonna keerunniho; waajjannoe gede koreno ani isira oommo. Hatte yannara isino ayirrisinoe; su'ma'yano waajjino.

⁶Isino halaale ikkinnina so'rote coye dirosiisino; ane ledo keerunninna sumbetenni hee'rino; lowo mannano cubbuwiinni qolino.

⁷Qeese ane Olantote Mootichi Kaaliiqi sokkaano ikkitino daafira, arrawinsa egenno coyi'rannoha ikka hasiissanno; hajajo'ya macciishshate mannu insawa daannore ikka hasiissannonsa.

⁸«Xa ki'ne qeesootu halaalaancho doogowiinni wirri yitinoonni; rosiissinanni coyinni lowo manna so'risiissinoonni. Ani Olantote Mootichi Kaaliiqi Leewi ledo eoommo gondooro diigginoonni.

⁹Ane seera agadha giwa'nenni halaale dawissinanni daafira, mannu baalu albaanni mishantinanninna shollitinanni gede asseemmo'ne» yii.

¹⁰Ninke baalunku mittu anni ooso di"ikkinoommo? Ninke baalanka kalaqinohu mitto Magano di"ikkino? Mayiraatiyya mimmitonke monganni Kaaliiqi akaakkanke ledo eino gondooro mullare assineemmohu?

¹¹Yihudu manni Kaaliiqira ammanaminokkiha ikkino. Israeelete gobba baalatenna Yerusaalamete tiyyi'nanni batte assitino. Kaaliiqi baxannoha Qullaawa Mineno batteessitino. Labballuno wole gobba maganna magansi'ranno meento adhitino.

¹²Hattoore assannoha baala Kaaliiqi Israeelete manni giddonni fushshe hunosi! Hattoo manchi, mannu Olantote Mootichi Kaaliiqira shiqishanno kakkalora karsamannokki gede fulino widoonni gato!

¹³Ki'ne assitinannihu wolu coyino no. Kaaliiqi kakkalo'ne adhannokki daafira wi'litinanni kakkalote darga hindiiddo lolaassinanni.

¹⁴«Kakkalonke mayira adha giwi?» yitiniro, qeedhimmatenni heedhine adhitinoonni galte ledo e'inoonni gondooro diigginoonni. Muttaara galte gondooru baxillaanchooti. Ki'ne kayinni Kaaliiqi albaanni gondoorunni adhitinoonni galte xagartine ammanama'ne huntinoonni. Ki'ne qeedhimmatenni heedhine adhitinoonni galte ledo assidhinoonni gondoorira Kaaliiqi naqaashshete.

¹⁵Kaaliiqi ki'neranna galte'nera mitto bisonna mitto ayyaana uyino'ne. Hatto assinohuno, Maganu manna ikkitino ooso iltinara hedeeti. Kunnira ki'ne giddonni mittuno galtesi ledo eino gondooro diigannokki gede seekke agadho.

¹⁶Israeelete Magani Kaaliiqi, «Ani ayiddaanninna ayiddaama babbaxxitannota giweemmo. Ani, togoo kaajjillinni galte fushshine ha'rinsannita giweemmo. Kunnira, galte'nera ammanantinanni gede e'inoonni gondooro diigginannikki gede seekkitine agadhe» yaanno.

¹⁷Kaaliiqa haafu coyi'nenni hifachiishshinoonnisi. Ki'ne kayinni, «Hiissine hifachiinshummosi?» yitinanni. Iso, «Olantote Mootichi Kaaliiqi bunshe assitannore naadanno» woy, «Halaale coyi'ranno Magani hiikko no?» yitinanni hifachiishshinoonnisi.