Read Sidama_Qullaawa _Maxaafa MILKIYAASI 3 Bible Online

MILKIYAASI 3 - Sidama_Qullaawa _Maxaafa bible

MILKIYAASI 3

¹Olantote Mootichi Kaaliiqi, «Doogo'ya biddi assanno gede soqqamaancho'ya balaxe soyemmo. Agadhitinoonni Mootichi, hedeweelcho Qullaawu Minisira daanno. La"ate quqquxantinanni sokkaanchi'ya daye gondooro'ya lallawanno» yaanno.

²Isi imaana seekke fushshanno saamuninna siwiila daashshinanni giira gedee wolqaataamooti. Isi leellanno yannara albasiinni jawaate uurra dandaannohu ayeti? Daanno barra ittisasira dandaannohu ayeti?

³Isi birra daashshe ximbiiwanno manchi gede ikke yoote ofollanno. Birranna culka daashshe ximbiiwannohu gede sokkaanchu Leewi sircho keereensanno. Hakkunni gedensaanni Kaaliiqi halaalaancho kakkalo shiqishanno manna afi'ranno.

⁴Yihudunna Yerusaalamete manni shiqishanno kakkalo albinte gede Kaaliiqa hagiirsiissannota ikkitanno.

⁵Olantote Mootichi Kaaliiqi, «Yoo yaammora ki'newa dayemmo. Bitaammu, foortannori, kaphunni naqqassannori, loossinonsari hunkee gatisidhannori, galte shii'rino meentonna annanna ama afidhinokki ooso qarrissannori, manni gobba manniha halaale dawissannorinna ane waajjitannokki manni aana rahe naqqaseemmo.

⁶«Ani Kaaliiqi disoorrameemmo. Kunnira, ki'ne Yaiqoobi sirchino diba'inoonni.

⁷Akaakka'ne warinni kayissine seeri'yawiinni xeertidhinoonni; diagadhitinoonni. Anewa higge; anino ki'newa higeemmona. Ki'ne kayinni, ‹Atewa hiitto ikkine hingeemmo?› yitinanni.

⁸Maahoyyena, mannu Magano moorannoni? Ki'ne kayinni ane moortinoonnie. «Ki'ne, ‹Ate hiitto assine moorreemmo?› yitinanni. «Moortinoonniehu, tonnunni mittonna fushshaate ho'latenniiti.

⁹Ki'ne Israeelete manni baalunku ane moortinoonni daafira rumantinoonnireeti.

¹⁰Mine'ya intanniri hala'lanno gede uyitinanniha tonnunni mitto gudissine abbitine gootaraho worre. Hatto assitineenna, ani qole waalcho fane dancha attote batise aa hoogummo'nero tennenni affe"e. Konne coye coyi'roommohu ani Olantote Mootichi Kaaliiqaati.

¹¹Gidi'ne aaninni sixa hooleemmo. Woyine'ne laalo dixe'anno. Konne coye coyi'roommohu ani Olantote Mootichi Kaaliiqaati.

¹²Baatto'ne hee'rate toltinota ikkitino daafira, hatte yannara baattote aana noo manni baalu ki'ne, ‹Maassantino gosaati› yaanno'ne. Konne coyi'roommohu ani Olantote Mootichi Kaaliiqaati» yaanno.

¹³Kaaliiqi, «Ki'ne ane seyattinoonnie. «Qoltineno, ‹Ninke ate hiitto assine seyantummohe?› yitinanni» yiinsa.

¹⁴«Maganoho soqqama makaa'litanno? Hajajosi agadhatenninna Olantote Mootichi Kaaliiqi albaanni dadillaamma ikkine hee'ratenni ma lexxinoommo?

¹⁵Kunni ka'a boonaleeyye, ‹Baraadhinoreeti› yineemmo. Kune insa hagiidhite heedhanno. Bunshe assitannori jiro afi'ratenni sa'e Magano jiffanno; isino diqorichishinonsa» yitinoonni.

¹⁶Hatte yannara Kaaliiqa waajjitannorinna su'masi ayirrissannori insa insanaawa hasaabbu. Isino macca insa widira qoli; coyidhinoreno macciishshi. Hawantannokki gede su'mansa maxaafisira borreessi.

¹⁷Olantote Mootichi Maganu, «Insa anere ikkitanno; ani looseemmo waro insa anera baxxitino woxe ikkitanno. Annu soqqamannosi beetto mararannohu gede anino insa marareemmonsa.

¹⁸Hatte yannara anera soqqamannoehura danchu manchira assinannisi danchummanna soqqamannoekkihura bushu manchira iillannosi qarra manni'ya la"anno» yaanno.