Read Sidama_Qullaawa _Maxaafa MAATEWOOSI 1 Bible Online

MAATEWOOSI 1 - Sidama_Qullaawa _Maxaafa bible

MAATEWOOSI 1

¹Daawitinna Abirihaami sircho ikkinohu Yesuusi Kiristoositi ilamate kiiro aante noote.

²Abirihaami Yisihaaqi ilino; Yisihaaqi Yaiqoobi ilino; Yaiqoobi Yihudanna Yihudi roduuwa ilino.

³Yihudi Faareesinna Zaara Taamaari yinanni manchonni ilino. Faareesi Hetsirooni ilino; Hetsirooni Araami ilino.

⁴Araami Aminaadaabi ilino; Aminaadaabi Neasooni ilino; Neasooni Salmooni ilino.

⁵Salmooni Rahaabi yinanni manchonni Boeezi ilino; Boeezi Ruuti yinanni manchonni Iyoobeedi ilino; Iyoobeedi Isseyi ilino.

⁶Isseyi Moote ikkiha Daawiti ilino. Moote Daawiti Ooriyo galtenni Selemooni ilino.

⁷Selemooni Roobiaami ilino; Roobiaami Abiya ilino; Abiya Asaafi ilino.

⁸Asaafi Iyoosaafiixi ilino; Iyoosaafiixi Iyoraami ilino; Iyoraami Ooziyaani ilino.

⁹Ooziyaani Iyoataami ilino; Iyoataami Akaazi ilino; Akaazi Hiziqiyaasi ilino.

¹⁰Hiziqiyaasi Minaase ilino; Minaase Amooni ilino; Amooni Iyosiyaasi ilino.

¹¹Iyosiyaasi Israeele Baabilooni gobba qafadante hadhu waro Yoakiininna roduuwasi ilino.

¹²Baabilooni gosa Israeele qafadduhu gedensaanni, Yoakiini Salatiyaali ilino; Salatiyaali Zerubaabeeli ilino.

¹³Zerubaabeeli Abiyudi ilino; Abiyudi Eeliyaaqeemi ilino; Eeliyaaqeemi Azoori ilino.

¹⁴Azoori Saadooqi ilino; Saadooqi Akiimi ilino; Akiimi Eliyudi ilino.

¹⁵Eliyudi Aliaazaari ilino; Aliaazaari Mataani ilino; Mataani Yaiqoobi ilino.

¹⁶Yaiqoobi Yooseefi ilino; Yooseefi Yesuusi Kiristoosa iltu Maariyaamira minaannaati.

¹⁷Kunni garinni Abirihaaminni Daawiti geeshsha nooti 14 ilamaati. Daawitinni kayisse Baabilooni qafado geeshsha 14 ilamaati. Baabilooni qafadonni kayisse Kiristoosi ilama geeshshano 14 ilamaati.

¹⁸Yesuusi Kiristoosi ilaminohu kunninni aane noo garinniiti: Amasi Maariyaami Yooseefira huuccante heedhe adhantukkinni, Qullaawu Ayyaaninni godobbe noota anfi.

¹⁹Huucci're noosehu Yooseefi dancha mancho ikkinohura, Maariyaami mannu albaanni shollisha giwe, mannu afikkinni suutunni agurara hedi.

²⁰Konne coye wodanaho wodhe hee'reenna, Mootichu sokkaasinchi haaqeete leelle, «Daawiti Beetto Yooseefi, ati huucci'roottoti Maariyaami godobbinohu Qullaawu Ayyaaninniitina ise adha waajjitooti.

²¹Ise labbaa beetto iltanno; isi mannasi cubbunni gatisanno daafira su'masi Yesuusa yite fushshatto» yiisi.

²²Kuni baalu ikkannohu Maganu himanaanchi himanino coyi wo'manno gedeeti:

²³«Kuneeti, seemo godobbe labbaa beetto iltanno; su'masino Amaanueeli yinanni» Amaanueeli yaa, «Maganu ninke ledo no» yaate.

²⁴Yooseefi goxichunni baqqi yee kae Mootichu sokkaasinchi hajajinosire wonshi; Maariyaamino minisira abbi'ri.

²⁵Ikkollana qaaqqo ilta geeshsha ise ledo galtimmate xaadooshshe diassi'rino. Qaaqqohono su'ma Yesuusa yee fushshi.