Read Sidama_Qullaawa _Maxaafa MAATEWOOSI 11 Bible Online

MAATEWOOSI 11 - Sidama_Qullaawa _Maxaafa bible

MAATEWOOSI 11

¹Yesuusi tonaa lamenka rosaanosi hajajihu gedensaanni, hakkiichinni kae mule noo katammara rosiisaranna kulara ha'ri.

²Cuuaanchu Yohaannisi usuru mine hee're Kiristoosi loosanni noore macciishshe, rosaanosi giddonni lame Isiwa soye,

³«Daanno yinihu ateetinso wole agadhino?» yite xa'mitanno gede assi.

⁴Yesuusino, «Hadhine Yohaannisira la'inoonnirenna macciishshitinoonnire kullesi.

⁵Illiweelootu la'anno; naafootu uurrite hadhanno; dhiigaammu keeraabbanno; macciweelootu affanno; reyitinori ka'anno; buxanete Dancha Duduwo kullanni.

⁶Anere huluullamannokkihu ba'raa'rinoho» yee qolinsa.

⁷Yohaannisi sokkaasine hadhuhu gedensaanni Yesuusi Yohaannisire coyi'ranni, «Halalla ma la'inara fultini? Bubbe milli assitanno leemma la'inaraati?

⁸Xa maricho la'inara daggini? Biifado uddano uddi'rinoha la'inaraati? Biiffino uddano uddidhannore mootete mine anfanni.

⁹Mayiralla dagginoonni? Himanaancho la'inaraati? Ee kuleemmo'nena, himanaancho roorinoha la'inaraati.

¹⁰«Isi, ‹Kuneeti doogo'ya biddi assanno gede, soqqamaancho'ya balaxe soyemmo› yine borreessinoonnisiho.

¹¹Halaale kuleemmo'nena, baattote aana ilamino manni giddo Cuuaancho Yohaannisi roorannohu dino. Gordu Gashshootira kayinni woriidiha ikkinohu roorannosi.

¹²Cuuaanchu Yohaannisi yannanni kayise xaa geeshsha gordu Gashshooti fiddote aana no; jawaatte sharrantannori adhitanno.

¹³Himanaanote rosi baalunna Musera uyinoonni Seeri Cuuaanchu Yohaannisi geeshsha himana kultino.

¹⁴Xa insa coyidhinore adha hasidhiniro, hakku daanno yini Eeliyaasi konne Yohaannisiiti.

¹⁵Macca noohu macciishsho!

¹⁶«Xa tenne yanna manna mayinni masalseemmo? Gudumaaleho ofolte mimmito woshshitanni,

¹⁷‹Suusulle ufuunfummo'ne; ki'ne kayinni disirbitinoonni; hamaraancho kiirrummo'ne; ki'ne kayinni diwi'litinoonni› yitanno ooso labbanno.

¹⁸Cuuaanchu Yohaannisi itikkinninna woyinete xajje agikkinni dayita, ‹Kunnira giddo durriisu no!› yitino.

¹⁹Manchi Beetti itanninna aganni dayita kayinni, ‹Kuni itonna ago baxannoho; qaraxaasinetenna cubbaataammu jaalaati› yitino. Egennote halaalaanchimma gumisenni leeltanno» yiinsa.

²⁰Yesuusi wole katammanni roore maalale assino katamma aagintaabbinokki daafira,

²¹«Koraaziinira aanne'e; Beetesayidaho aanne'e; ki'ne giddo assinoonni maalale Xiroosinna Sidooni katammara assinoommero, hakkiicho hee'ranno manni xiddu uddano uddi're, buluulo aanaho giggishshi're, bi're albanni aagintaawe higinohu baino.

²²Kunnira, kuleemmo'nena yoote barra qorichu ki'nenni roore Xiroosinna Sidooni mannira shotannonsa.

²³Ati gordu geeshsha gotti yootta Qifirinahoomi! Jeennaate dirratta. Ate giddo assinoonni maalale Soddoomaho assinoommero, hakko katami baikkinni techo geeshsha hee'rannohu baino.

²⁴Kunnira halaale kuleemmo'nena, yoote barra qorichu ki'nenni roore Soddoomaho shotannosi» yii.

²⁵Hatte yannara Yesuusi, «Gordunna baattote Mooticha Anna'ya, konne coye hayyooletenna egennaammaho golte qaaqquulleho leellishootto daafira galaxxeemmohe.

²⁶Ee Anna'ya, konne coye assate hagiidhootto.

²⁷Anni'ya baalanka coye uyinoe. Annu ka'a Beetto egenninohu ayino dino. Beettu ka'a Anna afinohu ayino dino. Beettu leellishinonsare agurranna Anna afinohu dino.

²⁸«Ki'ne daafurtinoonniri, duhu ayirrino'neri baalu anewa amme! Ani fooliishshiisheemmo'ne.

²⁹Qambara'ya qoti'nera dukke; anewiinni rosse. Ani joogahonna shaqqadoho; lubbo'nerano fooliishsho afidhinanni.

³⁰Qambari'ya diayirranno; duhi'yano shotaho» yii.