Read Sidama_Qullaawa _Maxaafa MAATEWOOSI 13 Bible Online

MAATEWOOSI 13 - Sidama_Qullaawa _Maxaafa bible

MAATEWOOSI 13

¹Yesuusi hakko barranni mininni fule ha're baaru gama ofolli.

²Lowo manni isiwa daye gamba yiita, isino baaru giddo noo yowolo aana ofolli. Mannu baalunku hakkiicho baaru gama uurre no.

³Hakkunni gedensaanni masalsanni lowo coye kulanninsa, «Mittu manchi wixa wixi'rara fuli.

⁴Wixa wixi'ranni hee'reenna, mitu mitu gumi doogote gama uwi; ceano dagge xinqite ittu.

⁵Wolu gumi bushshu qawaaxxisinokkiwa carete aana uwi. Lowo bushshi nookkita giddo tula ikkitino daafira mulenni mu'ri.

⁶Arrishsho fultuta kayinni qoori; rumushsho afi'rinokki daafira mooli.

⁷Wolu qole utu giddo uwi. Utu lophe fuge amadisi.

⁸Wolu gumi dancha shaqqado baattora uwe mu'ri. Lophe dancha guma laali; mittu 100, mittu 60, mittu 30 laali.

⁹Macca noohu macciishsho!» yiinsa.

¹⁰Hakkunni gedensaanni rosaanosi Yesuusiwa shiqqe, «Mannaho masalsitanni coyi'rattohu mayiraati?» yite xa'mitusi.

¹¹Isi qole, «Ki'nera gordu gashshooti maana afate hayyo uyinoonni'ne. Insara kayinni diuyinoonninsa.

¹²Noosihura lende uyinannisi; noosikkihura kayinni hakkonnenni haa'ne hoollanni» yii.

¹³Ani masalsanni kuleemmonsahu, la'anni heedhe buuxxannokkire, macciishshitanni heedhe affannokkire, woy wodana assitannokkire ikkitinohuraati.

¹⁴Kunnira himanaanchu Isayaasi, «Macciishshate woyite macciishshitinanni; kayinnilla wodana diassitinanni. La"ano la'inanni; ikkollana dibuuxxinanni.

¹⁵Kunni manni wodani dillaawino; maccansano beebbino; illensano tunsitino. Hatto ikka hoogoommero, illensanni la'e, maccansanni macciishshite, wodaninsanni wodanchite, anewa higgeenna hurseemmonsahu baino» yee borreessino himani aanansa wo'manno.

¹⁶Ille'ne la'annohuranna macca'ne affanno daafira ki'ne ba'raadhinoonnireeti.

¹⁷Halaale kuleemmo'nena, lowo himanaanonna keeraano ki'ne la'inoonnire la'ara halchite hooggino; macciishshitinoonnireno macciishshate halchite hooggino.

¹⁸Yesuusi, «Xa ki'ne wixa wixi manchi masalo maatiro macciishshe.

¹⁹Doogote gama uwi wixi masalo: Maganu gashshooti qaale macciishshe wodana assannokki manchooti. Hakkawoyintenni Sheexaanu daye wodanisi giddo winxoonni qaale xinqe adhanno.

²⁰Carete aana uwino wixi masalo: qaale macciishshe hakkawoyintenni hagiidhe adhanno manchooti.

²¹Ikkollana, yannate geeshshaati ikkinnina rumushsho diassi'rino. Maganu qaali daafira qarrunna xiiwama iillitannosi woyite hakkawoyintenni gufi're uwanno.

²²Utu mereero uwino wixi masalo: Maganu qaale yannate geeshshira calla macciishshanno manchooti. Tenne gobba hedonna jirote baxilli wodanisi giddora e"e, macciishshino qaale beeshshe amadanno daafira gumiweele gatanno.

²³Shaqqado baattora uwino wixi masalo kayinni, qaale macciishshite wodanchitannore kulanno. Kunni garinni mittu 100, mittu 60, mittu 30 guma laalanno» yii.

²⁴Yesuusi lede wole lawishsha kulanninsa, «Gordu Gashshooti gatesi dancha wixa wixi'rino mancho lawanno.

²⁵Ikkollana mannu baalu goxihu gedensaanni baarigaaru daye qamadete wixi giddo santaata wixe ha'ri.

²⁶Qamade lophite guma dartu yannara santaatuno leelli.

²⁷Gatu anni loosaasine isiwa marte, ‹Mooticha, loosikki giddo didancha wixa wixi'ritto? Santaatu maminni dayiyya› yitu.

²⁸«Isi qole, ‹Konne assinohu baarigaaraho› yiinsa. Loosaasine, ‹Marre santaata giddonni xinqine hoollammora hasi'rattoni?› yite xa'mitusi.

²⁹«Isi kayinni, ‹Dee'ni, santaata xinqitinanni qamadeno ledo buqqissinannina agurre.

³⁰Gide murranni yanna dagga geeshsha qamadeno santaatuno mitteenni lophona; murranni yannara murtannori balaxxe santaata giirranni gede xinqite qawo qawo assite usurtanno; qamade kayinni gamba assite qaldi'yara wortanno gede kuleemmo› yiino» yee qolinsa.

³¹Yesuusi wole lawishshano, «Gordu Gashshooti mittu manchi gatesi masse wixi'rinoha shiima guma lawanno.

³²Hakku wixi baalunkunni ajinoho. Lophihu gedensaanni kayinni, wole mu'ro baalanta roore haqqa ikkanno. Cea dagge sinnasi aana mine mi'nite heedhanno» yii.

³³Yesuusi xaano masalsanni, «Gordu Gashshooti mitte mancho lowo waasira karsiissinoha shiima gamaancho lawanno. Gamaanchuno waasa baala hoqisi» yiinsa.

³⁴Yesuusi konne baala coye mannaho masalsanni coyi'rino; lawishshiweello mittoreno dicoyi'rinonsa.

³⁵Hatto assinohu himanaanchu, «Coye'ya masalsanni xawiseemmo; alame kalaqantunkunni kayise go'linore coyi'reemmo» yee borreessinori wo'manno gedeeti.

³⁶Hakkunni gedensaanni Yesuusi manna ha'rise kae minira ei. Rosaanosino isiwa shiqqe, «Loosu giddo santaati masalo maatiro xawisinke» yitu.

³⁷Yesuusi qole, «Dancha wixa wixi'rinohu Manchi Beettooti.

³⁸Gatu tenne alameeti; danchu wixi Maganu Gashshooti oosooti; santaatu Sheexaanu oosooti.

³⁹Santaata wixinohu baarigaaru Sheexaaneho. Gide murrannihu alamete goofimarchiraati; murtannori Maganu sokkaasineeti.

⁴⁰Santaata gamba assine giirranninte gede, alamete goofimarchirano hatto assinanni.

⁴¹Hatte yannara Manchi Beetti sokkaasinesi soyanno; insano manna cubbu giddora eanno gede assitannorenna bunshe loossannore baala Maganu Gashshooti giddonni xinqite fushshitanno.

⁴²Goolu giira giddo tungeenna hakkiicho wi'litanni suumensa ittanno.

⁴³Keeraano kayinni Anninsa Gashshootira arrishshote gede xabbanno. Macca noohu macciishsho!» yiinsa.

⁴⁴Yesuusi, «Gordu Gashshooti, loosu giddo maanxoonni jiro lawanno. Mittu manchi tenne jiro afi're kae wirri asse maaxi. Lowo geeshsha hagiidhino daafira ha're noosire baala hire mare hakkonne bayicho hidhi» yii.

⁴⁵Yesuusi xaano qole, «Gordu Gashshooti dancha ayirrado uduunnicho hidha hasi'rino daddalaancho lawanno.

⁴⁶Daddalaanchu lowo geeshsha ayirrado uduunnicho afi're, ha're noosire baala hire hakkonne ayirrado uduunnicho hidhi» yii.

⁴⁷Yesuusi lede, «Gordu Gashshooti baaru giddo tungoonni woshshaado lawanno. Woshshaado addi addi dani qulxu'me baala gamba assite amaddanno.

⁴⁸Woshshaadote wo'mihu gedensaanni woshshaaddannori qacce fushshite dancha dancha doorte uduunnichu aana wortanno. Busha busha kayinni hunte agurtanno.

⁴⁹Alamete goofimarchino hattooha ikkanno. Sokkaasine dagge cubbaataamma keeraanotewiinni baddanno.

⁵⁰Cubbaataamma goolu giira giddo tuggeenna hakkiicho wi'litanni suumensa ittanno» yii.

⁵¹Yesuusi, «Konne baalanka coye wodanchitini?» yiinsa. Insano, «Ee» yitu.

⁵²«Xa Gordu Gashshootire rosiinsoonnihu seeru rosiisaanchi baalu, miinju mininni haaronna akkala jajja haa're fushshanno mancho lawanno» yee qolinsa.

⁵³Yesuusi tenne masalo baala kule kaihu gedensaanni hakkiichinni kae ha'ri.

⁵⁴Gobbasi Naaziretete Katama daye xaadu minna giddo manna rosiisi. Macciishshituri baalu dhaggeeffattanni, «Kuni manchi tenne hayyonna tenne maalale maminni abbi?

⁵⁵Isi haqqa bocannohu beetto di"ikkino? Amasi Maariyaami di"ikkitino? Qoleno Yaiqoobi, Yooseefi, Simiooninna Yihudi rodoo di"ikkino?

⁵⁶Seennu roduuwisi baalu kawiicho dininke ledo no? Isi konne coye baala maminni abbiyya?» yitu.

⁵⁷Kunninni kainohunni iso adha gibbu. Yesuusi kayinni, «Himanaanchu gobbasiranna ayiddisi giddolla diayirranno» yiinsa.

⁵⁸Ammana gibbino daafira hakkiicho lowo maalale dileellishino.