Read Sidama_Qullaawa _Maxaafa MAATEWOOSI 14 Bible Online

MAATEWOOSI 14 - Sidama_Qullaawa _Maxaafa bible

MAATEWOOSI 14

¹Hatte yannara Galiilu gobba gashshaanchi Heeroodisi Yesuusi duduwo macciishshi.

²Ledosi gashshaanora, «Kuni Cuuaanchu Yohaannisiiti; isi reyotenni kaino; tini maalale isi widoonni loosantanni noohu kunniraati» yiinsa.

³Heeroodisi rodiisi Filiphoosi galte Heeroodiyaada adhino daafira, isenni kainohunni Yohaannisi usursiisino.

⁴Yohaannisi Heeroodisira, «Rodiikki galte adhattokki gede Seeru hoolannohe» yiinosi.

⁵Kunni daafira Heeroodisi Yohaannisi shaara hasi'ri. Ikkollana Ayihude Yohaannisi himanaanchu gede assite la'annosi daafira insa waajji.

⁶Heeroodisi ilamino barra ayirrinsanna Heeroodiyaada beetto dagge jilu mereero sirbitanni Heeroodisi hagiirsiissusi.

⁷Kunnira Heeroodisi, «Hasi'rittare baala xa'mi'ri eemmohena!» yee xaarise.

⁸Iseno amase amaaltinose garinni, «Cuuaanchu Yohaannisi umo saffeho worte xaanni uue» yitu.

⁹Moote kunni coyira dadilli; ikkollana xaarino xaaronna ledosi jilaho ofollino wosini saalira yee, Yohaannisi umo murre uyinannise gede hajaji.

¹⁰Kunnira usuru minira manna soye Yohaannisi goowa mursiisi.

¹¹Murroonni umono saffeho worre abbine beettote uyini. Beettono massite amasera uyitu.

¹²Yohaannisi rosaano dagge reeshshasi haadhe massite madaartu. Konne coyeno marte Yesuusira kultu.

¹³Yesuusi Yohaannisi reyo macciishshe, yowolote ofolle mannu nookkiwa hasi're callisi ha'ri. Mannuno konne coye macciishshe katammatenni fule lekkatenni faana gananni ha'ri.

¹⁴Yesuusi yowolote aaninni dirri woyite lowo manna lae mararinsa; dhiwamaasinensano hursi.

¹⁵Yanna hashshituta rosaano Yesuusiwa shiqqi yite, «Kuni hee'noommo dargi halallaati; yannano hawarritino. Kunni daafira mannu muli qacha ha're itannore hidhona ha'risi» yitu.

¹⁶Yesuusi kayinni, «Ha'ra dihasiissannonsana, ittannore ki'ne uuyyensa» yii.

¹⁷Insa qolte, «Ninkera noonkehu onte timaatinna lame qulxu'me callaho» yitu.

¹⁸Yesuusino, «Hakkonnenni anewa abbe!» yii.

¹⁹Hakkunni gedensaanni manna hayissote aana ofollanno gede hajaji. Ontenka timanna lamenka qulxu'me haa're gordo hige lae galatu huuccatto asse, timma hiiqqaqqe rosaanosira uyi; insano mannaho beekku.

²⁰Wo'munku itte duubbu; gatino hambaa rosaanosi tonaa lame soro wonshite kayissu.

²¹Hattenne sagale itinohu meentonna ooso kiirrikkinni onte kume manna ikkanno.

²²Hakkunni gedensaanni Yesuusi rosaanosi, «Ani manna ha'risammo geeshsha yowolote ofoltine balaxxine widira fulle!» yee hajajinsa.

²³Manna ha'risihu gedensaanni, huuccatto assi'rara callisi ilaalu iimira fuli. Hawarro yannara Yesuusi hakko callisi no.

²⁴Hatte yannara yowolo baaru mereero heedheenna, albiidinni daggino bubbe gantanna dambalu yowolo ka'anna kawa daassi.

²⁵Soodimaroho Yesuusi baaru aanaanni ha'ranni rosaanosiwa dayi.

²⁶Rosaanosi baaru aana ha'ranna affe lowo geeshsha masse, «Tini ekerate» yite waajjite raartu.

²⁷Yesuusi hakkawoyintenni, «Galfatte! Aneetina waajjitinoonte!» yiinsa.

²⁸Hatte yannara Pheexiroosi, «Mooticha'ya, ateetiro baaru aana ha'ranni atewa dayemmo gede hajajie!» yii.

²⁹Yesuusino, «Amo!» yiisi. Pheexiroosino yowolote aaninni dirre Yesuusiwa iillara baaru aana qaafanni ha'ri.

³⁰Ikkollana bubbete wolqa lae waajji; baaru itasira rahita, «Mooticha'ya gatisie!» yee raari.

³¹Yesuusi hakkawoyintenni anga diriirse amadesi, «Ati amma'na xe'inohehu, mayira huluullamitto?» yiisi.

³²Lamunku yowolote giddora e'uta bubbe uurritu.

³³Yowolote giddo noori baalu, «Halaalinta ati Maganu Beettooti!» yite Yesuusira kumbuultusi.

³⁴Yesuusinna rosaanosi baara fulte Gensereexi yinanni gobba iillitu.

³⁵Hatte gobbara hee'ranno manni Yesuusa ikkinota afe, qamatte baala manna soye dhiwantinore baala isiwa abbisiisi.

³⁶Dhiwantinori uddanosi qacce calla kisate huuccidhusi; kissuri baalu dhibbinsanni hurtu.